3 E jeꞌxtzun samaꞌn cyuꞌn ke ocslal tuj tnam Antioquiy,

e icꞌxtzun tuj txꞌotxꞌ Fenicia ex tuj txꞌotxꞌ Samaria,

xi cytxꞌolbaꞌn tzaꞌn tten otok che ocslan txkantl xjal mya judiy ke,

cyaj cykꞌoꞌn ojtxi cyten e oc lpeꞌ tiꞌj Dios.

Ex nim e tzalaj cycyakil erman tej cybinte jlu.

4 Tejtzun tpon Pablo tucꞌix Bernabé tuj Jerusalén,

baꞌn e cꞌmonjtz cyuꞌn cycyakil ocslal ex cyuꞌn apostl ex cyuꞌn ansyan,

ex xi cytxꞌolbaꞌn tcyakilju otok tbincha Dios tuꞌn cyakꞌunben.

5 Pero at junjun parisey otok che ocslan,

e jaw weꞌ kꞌmalte cyjaꞌ:

—Ilxix tiꞌj tuꞌn cysircunsidarinjtz keju ma che ocslan mya judiy ke,

ex tuꞌn t-xi kꞌmet cye tuꞌn tjapun cyuꞌn aju ley cyaj tkꞌoꞌn Moisés,

che chi.

6 Octzun cychmon cyib ke apostl cyucꞌix ke ansyan tuꞌn cyyolin tiꞌj jlu.

7 Ex cybajlenxi yolin nim tiꞌj,

jawtzun weꞌ Pedro ex xi tmaꞌn cye:

—Erman,

biꞌmaj cyuꞌne,

elaꞌxi kꞌij njawlen scꞌoꞌne tuꞌn Dios cyxole tuꞌn t-xi nmaꞌne tkanil colbil cye txkantl xjal mya judiy ke,

ex tuꞌn cyocslan.

8 Ate Dios ojtzkiꞌn tuj cyanmi xjal tuꞌn,

ex tzaj tyecꞌun ka baꞌn tuꞌn cyclet,

porque tzaj tkꞌoꞌn Xewbaj Xjan cye,

ic tzaꞌn tzaj tkꞌoꞌn ke.

9 Ex mintiꞌ o tma Dios ka junxitl koꞌ ex ka junxitl ke txkantl xjal,

oꞌcx sakix tuj cyanmi tuꞌn cyocslabl ic tzaꞌn ke.

10 Jaꞌlotzun,

¿tikuꞌn cyaje tuꞌn tmaket t-xtalbil Dios cyuꞌne?

Porque in cub cykꞌoꞌne jun iktz cyibaj ke erman lu,

aju mintiꞌ cꞌisj cyuꞌn kxeꞌchel ojtxi,

ax icx ke mintiꞌ in cꞌisj kuꞌn.

11 Mya tuj tumel aju in cymaꞌne,

porque ic tzaꞌn ke ma keꞌ kcꞌuꞌj tiꞌj ma ko clet tuꞌn t-xtalbil Kajaw Jesús,

ic tzaꞌnx cye ma che clet,

chi Pedro xi tmaꞌn cye.

12 Entons cycyakil xjal mintiꞌ e kꞌajt,

xi cybiꞌn aju tyol Bernabé ex tyol Pablo tzaj cytxꞌolbaꞌn,

tzaꞌn tten tbincha Dios ke señ ex ke tbinchben nim cyipumal cyxol txkantl xjal mya judiy ke,

xi tkꞌoꞌn Dios cyipumal Pablo tuꞌn cybant ke señ lu.

13 Tejtzun cybaj yolin Pablo,

oc ten Jacobo yolil ex tma:

—Akeye erman,

cybintze nyole:

14 Ma tzaj ttxꞌolbaꞌn Simón tzaꞌn tten cub t-ximan Dios tuꞌn ttzaj tkꞌoꞌn t-xtalbil tnejel maj cye txkantl xjal mya judiy ke ma che jaw t-scꞌoꞌn junjun cyxol tuꞌn cyoc etzan tuꞌn.

15 Ax yol jlu ic tzaꞌn cyaj cytzꞌiban ke t-sanjel Dios in tmaꞌn tuj Tuꞌjil,

chi cyjaꞌ:

19 Cyjaꞌtzun ma cub nximane tuꞌn miꞌn klabt cyiꞌj ke txkantl xjal mya judiy ke,

akeju in che ocslan,

ma cyaj cykꞌoꞌn ojtxi cyten ex ma che oc lpeꞌ tiꞌj Dios.

20 Oꞌcx tuꞌn t-xi tzꞌibet jun uꞌj cye tuꞌn miꞌn t-xi cychyoꞌn cychibjal alumaj in cub kꞌoꞌn te chojbil cywitz ke tilbilal,

ex tuꞌn miꞌn cybinchante aj pajil,

ex tuꞌn miꞌn t-xi cychyoꞌn tchibjal alumaj aju nnoꞌc jatzꞌoꞌn tkul,

ex tuꞌn miꞌn t-xi cychyoꞌn chicꞌ.

21 Porque atxix ojtxi in pacbanjtz tley Moisés cyuj cycyakil tnam cyuj ja te cꞌulbil,

ex atzun in jaw schꞌiꞌn tuj tcyakil kꞌij te ojlabl,

chi Jacobo.

22 Baꞌntzun eꞌla tuj cywitz apostl cyucꞌix ke ansyan ex cycyakil ocslal tuꞌn cyjaw scꞌet cabe xinak cyxolx ex tuꞌn t-xi cysamaꞌn tuj tnam Antioquiy junx tucꞌil Pablo ex Bernabé;

ate Judas jaw scꞌoꞌn,

aju Barsabás tcabin tbi,

tucꞌix Silas;

akeju xinak lu nejenel ke cyxol erman.

23 Ex xi cytzꞌiban jun uꞌj tuꞌn t-xi cyiꞌn Pablo;

ex atzun in tmaꞌn tuj uꞌj cyjaꞌ:

Akoꞌye apostl,

cyucꞌix ke ansyan ex ke erman,

in cheꞌx kkꞌolbeꞌne akeye erman mya judiy keye ateꞌye tuj tnam Antioquiy,

ex tuj txꞌotxꞌ Siria ex tuj txꞌotxꞌ Cilicia.

24 Ma kbiye at junjun xjal e jeꞌx kxole,

ma che labt cyiꞌje tuꞌn cyyol,

ex ma jolpajeꞌ cycꞌuꞌje cyuꞌn,

[in cymaꞌn tuꞌn cysircunsidarinjtze ex tuꞌn tjapun cyuꞌne aju ley cyaj tkꞌoꞌn Moisés,]

pero mintiꞌ xi kkꞌoꞌne orden cye tuꞌn cymante icju.

25 Cyjaꞌtzun bant tiꞌj kuꞌne ex baꞌn eꞌla tuj kwitze tuꞌn cyjaw scꞌet cabe xinak kxole ex tuꞌn t-xi ksamaꞌne tuꞌn cypon cyucꞌile tucꞌix Bernabé ex Pablo,

akeju at kcꞌuꞌje cyiꞌj;

26 akeju erman lu cykꞌon cyib tuꞌn cycyim nok tuꞌn tlaj ocslal ke tiꞌj Kajaw Jesucrist.

27 Cyjaꞌtzun ma txi ksamaꞌne Judas tucꞌix Silas,

ax jlu cxel cymaꞌn cyeye oc cypon cyucꞌile.

28 Baꞌn ma tzꞌeꞌla tuj twitz Xewbaj Xjan ex tuj kwitze tuꞌn miꞌn tcub kkꞌoꞌne jun iktz cyibaje,

nok oꞌcx tuꞌn cybinchanteye aju ilxix tiꞌj:

29 tuꞌn miꞌn txi cychyoꞌne cychibjal alumaj in cub kꞌoꞌn te oyaj cywitz ke tilbilal,

ex tuꞌn miꞌn t-xi cychyoꞌne chicꞌ,

ex tuꞌn miꞌn t-xi cychyoꞌne tchibjal alumaj aju nnoꞌc jatzꞌoꞌn tkul,

ex tuꞌn miꞌn cybinchanteye aj pajil.

Ka ma tzꞌoc cycwentin cyibe tuꞌn miꞌn cybinchanteye jlu,

baꞌn oc cybinchaꞌye.

Cylomtzun cyibe,

chi tuj uꞌj.

30 Cyjaꞌtzun,

akeju e jeꞌx samaꞌn e pon tuj tnam Antioquiy,

e oc cychmoꞌn ke ocslal,

ex xi cykꞌoꞌn ju uꞌj cye.

31 Tejtzun tjaw cyschꞌiꞌn erman ju uꞌj lu,

e jaw tzalajxix tuꞌnju kꞌukbabl cycꞌuꞌj.

32 Ex ate Judas tucꞌix Silas t-sanjel Dios ke,

xi cykꞌukbaꞌn cycꞌuꞌj erman ex nimcu yol xi cymaꞌn cye tuꞌn cyweꞌxix tuj cyocslabl.

33 Axtzun e cyaj ten nim kꞌij;

yajxitzun e ajtz samaꞌntl cyuꞌn erman tuj tzalajbil tuꞌn cyul juntl maj cyucꞌil keju e jeꞌx saman cye.

34 [Atzunte Silas baꞌn eꞌla tuj twitz ax tuꞌn tcyaj ten.]

35 Ax icx te Pablo tucꞌix Bernabé ax e cyaj ten tuj tnam Antioquiy,

in cykꞌoꞌn xnakꞌtzbil tiꞌj tyol Kajaw ex in cypacbaꞌn tkanil baꞌn,

cyucꞌix nimcutl erman.

36 Tel-lenxitzun chꞌin kꞌij xi tmaꞌn Pablo te Bernabé:

—Koꞌ juntl maj visitaril cye erman cyuj cycyakil tnam jatum o txi kpacbaꞌn tyol Kajaw,

tuꞌntzun tkil tzaꞌn ateꞌ,

chi Pablo.

37 O tajbe Bernabé tuꞌn t-xiꞌ Juan cyucꞌil,

aju Marcos tcabin tbi;

38 atzunte Pablo,

mya baꞌn eꞌla tuj twitz tuꞌn t-xiꞌ Juan cyucꞌil,

porque otok tzꞌel tpaꞌn tib cyiꞌj max tuj txꞌotxꞌ Panfilia,

ex mintiꞌ xiꞌ cyucꞌil tuj akꞌuntl.

39 Ex jaw jun yol cyuw cyxolx,

cyjaꞌtzun cub cypaꞌn cyib;

ate Bernabé xi ucꞌinte Marcos,

e jeꞌx tuj barc tuꞌn cypon tuj txꞌotxꞌ Chipre;

40 atzunte Pablo jaw scꞌonte Silas tuꞌn t-xiꞌ tucꞌil;

atzun cye erman e naꞌn Dios cyiꞌj tuꞌn cyxiꞌ tuj akꞌuntl ex tuꞌn ttzaj tkꞌoꞌn Dios t-xtalbil cye.

41 E icꞌxtzun tuj txꞌotxꞌ Siria ex tuj txꞌotxꞌ Cilicia,

in cycyuwsaꞌn cynabl ocslal tuj junjun tnam.