Tej cypacban Pablo tucꞌix Bernabé tuj tnam Iconio
14
Junxtzun e ocx Pablo tucꞌix Bernabé tuj ja te cꞌulbil cye xjal judiy tuj tnam Iconio,
e yolintzun tuj tumelxix,
cyjaꞌtzun e ocslan nim xjal,
ke xjal judiy ex ke xjal mya judiy.
2 Atzun cye xjal judiy mya ocslal ke,
baj cytzpet-saꞌn cynabl txkantl xjal mya judiy ke tuꞌn cykꞌojin cyiꞌj erman.
3 Cyjaꞌtzun ax e ten apostl nim kꞌij,
in che yolin mintiꞌ in che xob,
kꞌukl cycꞌuꞌj tiꞌj Kajaw;
ex tzaj tyecꞌun Kajaw ka ax toc ju yol tiꞌj t-xtalbil Dios,
tzaj tkꞌoꞌn cyoclen apostl tuꞌn cybinchanjtz ke señ ex ke binchben nim cyipumal.
4 Atzun cye xjal tuj tnam attok jun pabl tib cyxol;
jun cꞌloj in che oc lpeꞌ cyiꞌj ke xjal judiy,
ex juntl cꞌloj cyiꞌj apostl.
5 Entons bant tiꞌj cyuꞌn xjal judiy cyucꞌix txkantl xjal mya judiy ke ex ke nejenel cyxol,
tuꞌn cyyajlanjtz apostl cyuꞌn ex tuꞌn cyoc cyxoꞌn tuꞌn abj.
6 Pero tej cybinte apostl jlu,
e ex ok e pon tuj tnam Listra ex tuj tnam Derbe,
ex cyuj mastl tnam tiꞌjele,
atzun ateꞌ tnam lu tuj txꞌotxꞌ Licaonia,
7 ex atzun e pacban tiꞌj tkanil jun colbil.
Tej toc xoꞌn Pablo tuꞌn abj tuj tnam Listra
8 Ex at jun xjal aj Listra mintiꞌ tipun tkan tuꞌn tbet,
kꞌukltok porque cox titzꞌjlenx,
ex mintiꞌ bant chꞌin tbet.
9 Tbitzun xjal lu in yolin Pablo,
atzunte Pablo oc tqueꞌyinxix,
ex tej tlonte ka at tocslabl xjal tuꞌn tbanix,
10 jaw tkꞌajkꞌajel twiꞌ Pablo cyuw ex tma:
—Weꞌctza,
jikumanx tiꞌja,
chi Pablo.
Atzunte cox jaw tꞌicpaj ex oc ten betel.
11 Tejtzun cyqueꞌyinte xjal aju tbincha Pablo,
e jaw schꞌin in cymaꞌn tuj cyyol xjal aj Licaonia:
—Ma che cubil dios kucꞌile,
ic che queꞌyin ic tzaꞌn ke xjal.
12 Octzun cykꞌoꞌn tbi Bernabé Júpiter,
atzunte Pablo oc cykꞌoꞌn tbi Mercurio,
porque ate Pablo o yolin.
13 Atzun tja dios Júpiter tcub ttxaꞌn tnam;
atzunte pal teju dios Júpiter pon tiꞌn cabe tor tucꞌix bech ttzi tpwertil tnam,
ex o tajbe pal ex ke xjal tuꞌn cycub ke wacẍ te jun oyaj cywitz apostl.
14 Tejtzun cybinte Bernabé tucꞌix Pablo jlu,
el cysbitꞌun cyxbalun,
e ocx kelan cyxol xjal ex jaw tkꞌajkꞌajel cywiꞌ cyuwxix:
15 —Akeye xinak.
¿Tikuꞌn in cybinchaꞌne jlu?
Icx keye xjal koꞌye icx tzaꞌn cyeye,
ex in xi kpacbaꞌne cyeye tuꞌn tcyaj cykꞌoꞌne aju nokx gan,
ex tuꞌn cyoc lpeꞌye tiꞌj Dios itzꞌ,
aju binchante cyaꞌj tucꞌix txꞌotxꞌ ex tcyakilju at twitz,
tucꞌix mar ex tcyakilju at tuj.
16 Cyuj ke tkꞌijlalil ojtxi xi tkꞌoꞌn Dios ambil cye cycyakil xjal tuꞌn cybet tuj cyex cybe;
17 pero mintiꞌ cyaj ten Dios mintiꞌwt testiw tiꞌj,
porque tzaj tkꞌoꞌn aju baꞌn cye,
ex in cuꞌtz tkꞌoꞌn jbal kibaj,
ex in tzaj tkꞌoꞌn tkꞌijlalil tuꞌn tchmet kawal,
ex in tzaj tkꞌoꞌn kwa tuꞌn ttzalaj kanmi,
che chi apostl xi cymaꞌn cye xjal.
18 Penitzun e mayet ke xjal cyuꞌn apostl tuꞌnju yol lu,
tuꞌn miꞌn tcub cybyoꞌn ke wacẍ te jun oyaj cywitz apostl.
19 E ultzun junjun xjal judiy tzajni ke tuj Antioquiy ex tuj Iconio,
cub tiꞌj cynabl xjal cyuꞌn,
octzun xoꞌn Pablo tuꞌn abj cyuꞌn;
ex ex cyjawoꞌn tiꞌjxi tnam,
tuj cynabl ka otok cyim.
20 Pero baj cytxolbaꞌn cyib ocslal tiꞌj,
atzunte Pablo jaw weꞌ ex ocx tuj tnam;
ex te juntl kꞌij ex tuj tnam tucꞌix Bernabé,
pon tuj tnam Derbe.
21 Xi cypacbaꞌn tkanil colbil tuj tnam Derbe,
ex nim xjal e ocslan;
e ajtztzun meltzꞌaj ke apostl tuꞌn cyul tuj tnam Listra,
ex tuj tnam Iconio,
ex tuj tnam Antioquiy.
22 In cycyuwsaꞌntok cyanmi ke ocslal,
ex in cykꞌoꞌntok cynabl tuꞌn cyweꞌxix tuj cyocslabl,
ex in cymaꞌn ka ilxix tiꞌj tuꞌn ttzaj nim yajbil ke,
tuꞌntzun kocx tuj tcawbil Dios.
23 Ex octzun cykꞌoꞌn cyoclen ansyan cyxol ocslal tuj junjun tnam,
ex cybajlenxi naꞌn Dios ex tcublenxi cyyoꞌn weꞌyaj,
cyajtzun cyokxenan tuj tkꞌab Kajaw,
aju otok che ocslan tiꞌj.
Tej tul meltzꞌaj Pablo tucꞌix Bernabé tuj Antioquiy tuj txꞌotxꞌ Siria
24 E icꞌxtzun tuj txꞌotxꞌ Pisidia,
e pon tuj txꞌotxꞌ Panfilia.
25 Ex t-xilenxi cypacbaꞌn tyol Dios tuj tnam Perge,
e cuꞌpun tuj tnam Atalia.
26 E etztzun tuj tnam Atalia,
e ocx tuj barc tuꞌn cypon tuj tnam Antioquiy,
atzun tzaj xeꞌt cyakꞌun tuj tnam lu nej,
ex oc naꞌj Dios cyiꞌj tuꞌn ttzaj tkꞌoꞌn Dios t-xtalbil cye tuꞌn cyex akꞌnal;
japuntzun akꞌuntl cyuꞌn aju otok tzaj kꞌmaꞌn cye.
27 Tejtzun cypon tuj tnam Antioquiy e baj cychmoꞌn ke ocslal,
ex xi cytxꞌolbaꞌn tcyakilju otok tbincha Dios tuꞌn cyakꞌunben,
ex tzaꞌn tten otok txi tkꞌoꞌn Dios ambil cye txkantl xjal mya judiy ke tuꞌn cyocslan.
28 Ex axtzun e cyaj ten Pablo tucꞌix Bernabé nim kꞌij cyucꞌil ke ocslal.