Nimanxwit tbi Kman max tuj cyaꞌj. Akeye najl tuj cyaꞌj, cynimsaꞌn jawe tbi Kman.

2 Akeye t-anjel Kman, cynimsaꞌn jawe tbi cycyakile. Akeye nimxix cyajlale ateꞌye tuj cyaꞌj, cynimsaꞌn jawe tbi cycyakile.

3 Aya kꞌij ex aya xjaw, cynimsaꞌn jawe tbi. Akeye cheꞌw in che koptzꞌaj, cynimsaꞌn jawe tbi.

4 Aya cyaꞌj maꞌ tjaw, nimsaꞌn jawa tbi, aya aꞌ at twitz cyaꞌj, nimsaꞌn jawa tbi.

5 E tjaw nimset tbi Kman porque a o kꞌmante tuꞌn cybant cycyakil jlu;

6 e cub tkꞌoꞌn tuꞌn cyten tuj cylugar te jumajx, cub tkꞌoꞌn jun tley cyibaj ex mlay che icꞌ tibaj.

7 Ax icx cyeye akeye ateꞌ tuj tcyakil twitz txꞌotxꞌ, cynimsaꞌn jawe tbi Kman: Akeye nmak txcup ateꞌ tuj mar ex aya mar maꞌ t-xeꞌ,

8 ax icx teya tkan kꞌancyok ex sakbakun, aya ttxa cheꞌw ex muj, ex aya cykꞌikꞌ nim tipuna ex in japun tuꞌna aju in tzaj kꞌmaꞌn teya;

9 akeye nmak witz ex ke tal witz, akeye tzeꞌ wiꞌten ex ke tzeꞌ baꞌn tloꞌnjtz cywitz,

10 akeye alumaj ex ke txcup tuj cꞌul, ke chyuꞌj, ex ke jil in xi cyjakuꞌn cycꞌuꞌj twitz txꞌotxꞌ;

11 akeye rey twitz txꞌotxꞌ ex cycyakil tnam; cycyakil ke nejenel ex ke cawil twitz txꞌotxꞌ,

12 ke cuꞌxun ex ke kꞌapoj; ke tij xjal ex ke cꞌwaꞌl.

13 Cycyakile cynimsaꞌn jawe tbi Kman, porque oꞌcx te maꞌ t-xilen. Mas maꞌ tajwalil twitz tajwalil cyaꞌj ex tajwalil txꞌotxꞌ.

14 Ma txi tkꞌoꞌn cyipumal ke xjal etzan tuꞌn.

E tjaw nimsaꞌn tbi cyuꞌn ke ocslal tiꞌj, akeju aj Israel nikayin ateꞌ ttxlaj ex etzan ke tuꞌn.

Nimanxwit tbi Kman.