Baꞌn tuꞌn kbitzan bitz te nimbil te Kdios. Baꞌn tuꞌn t-xi kꞌot nimbil tbanilxix te.

2 In jaw tbinchaꞌn Kman juntl maj aju tnam Jerusalén ex in che oc tchmoꞌn ke aj Israel ma che el sputj.

3 Nneꞌl tiꞌn bis tuj cyanmi keju nim in che bisun, ex nnoꞌc tkꞌanan aju cꞌixbleꞌn cyiꞌj.

4 In baj tajlaꞌn jteꞌ cybaj ke cheꞌw, ex toc tbi teyle junjun tuꞌn.

5 Maꞌxix te Kman Dios, ex maꞌxix tipumal ex mintiꞌ bajsbil te tojtzkibl.

6 In jaw tnimsaꞌn Kman ke xjal mans, atzun ke xjal mya baꞌn biꞌx nneꞌl tiꞌn cyoclen.

7 Che bitzane te Kman Dios tucꞌil akꞌbil chjonte; che bitzane bitz te nimbil te tucꞌil tkꞌajkꞌajel twi chnab arpa.

8 Tuꞌn nnoꞌc muj twitz cyaꞌj, tuꞌn in tzaj jbal twitz txꞌotxꞌ, tuꞌn in tzaj chꞌiy chꞌim cywi witz,

9 tuꞌn in xi tkꞌoꞌn cywa ke alumaj ex cywa cyal ke joj oc in che jaw okꞌ.

10 Mintiꞌ tajben te Kman ke chej nim cyipun ex mintiꞌ in tzalaj tiꞌj xjal cyuw kelan tuj kꞌoj;

11 oꞌcx in jaw tzalaj cyiꞌj keju in che niman te, ex cyiꞌj keju kꞌukl cycꞌuꞌj tiꞌj tcꞌujlalil.

12 Akeye najl tuj tnam Jerusalén, cynimsaꞌn jawe tbi Kman; akeye najl tuj tnam Sión, cynimsaꞌn jawe tbi Cydiose.

13 Porque ma tzꞌoc tcyuwsaꞌn ke tranc cyocsaꞌn cywitz ke tlamel tnam, ex ma che cub tcyꞌiwlaꞌn ke xjal ateꞌ tuj tnam.

14 Tuꞌn ma weꞌ kꞌoj tuj cytanmiye ex ma che ten xjal tuj tzalajbil ex ma che noje tuꞌnju tbanil triw tuꞌn.

15 Tuꞌn in tzaj tmaꞌn alcye tuꞌn tbant tzalu twitz txꞌotxꞌ, ex aju in tzaj tmaꞌn jurat in bant.

16 In tzaj tkꞌoꞌn tkꞌab cheꞌw ex nnoꞌc tuꞌn mer ic tzaꞌn lan, ex tuꞌn in baj t-sputun ttxa cheꞌw mer ic tzaꞌn tzaꞌj.

17 In tzaj t-samaꞌn sakbakun mer ic tzaꞌn tal abj ke; tuꞌnju cheꞌw in tzaj t-samaꞌn in jaw ttuxin tib aꞌ.

18 Pero in tzaj jun tyol, ex tuꞌn in nneꞌl ulj aꞌ otok cub ttuxin tib; in tzaj t-samaꞌn cykꞌikꞌ tuꞌn tcub ulj, ex tuꞌn jlu nnicꞌ bet aꞌ.

19 Xi tchicꞌbaꞌn tyol cye tiyjil Jacob, akeju aj Israel, cyucꞌix ke tley ex ke t-xnakꞌtzbil.

20 Mintiꞌ tbincha icju cyiꞌj mastl nasyon, mintiꞌ xi tchicꞌbaꞌn t-xnakꞌtzbil cye.

Nimanxwit tbi Kman.