Cjawil nnimsaꞌne Kman tuꞌn tcyakil ncꞌuꞌje.

2 Cjawil nnimsaꞌne Kman acux itzꞌx kine; cxel nbitzane bitz te Ndiose acux atinxe twitz txꞌotxꞌ.

3 Miꞌn tzꞌoc keꞌ cycꞌuꞌje cyiꞌj ke xjal maꞌ cyoclen, porque ax xjal ke, ex mintiꞌ colbil cyucꞌil,

4 oc cycyim oc che oquel te kuk juntl maj, ex axtzun kꞌij lu cbajel aju otok cub cyximan tuꞌn tbant.

5 At tzalajbil teju xjal in tcꞌmoꞌn onbil tuꞌn Tdios Jacob ex nnoꞌc keꞌ tcꞌuꞌj tiꞌj Kman, aju Tdios.

6 Tuꞌn o bant cyaꞌj tucꞌix txꞌotxꞌ ex mar ex tucꞌix tcyakilju at cyuj. Cucx in japun tuꞌn Dios aju yol in tzaj ttziyan.

7 In xi tbinchaꞌn cyiꞌj keju in che baj yajlaꞌn ex in xi tkꞌoꞌn cywa keju nneꞌl cycꞌuꞌj.

In che etz ttzokpiꞌn Kman ke pres;

8 In jaket cywitz ke moẍ tuꞌn, in che jaw twaban keju o che cub tzꞌak; in tcꞌujlaꞌn ke xjal tzꞌaklxix;

9 in colin Kman cyiꞌj ke stranjer xjal ex in che oc tcwentin ke cꞌwaꞌl mintiꞌ cyman ex cytxuꞌ ex cyucꞌix ke meba xuꞌj; atzun cye xjal mya baꞌn in che el tzpet tiꞌj cybe tuꞌn.

10 Aya tnam Sión, cucx ccawil Kman; aju Tdiosa cucx ccawil tuj tcyakil tabkꞌiyil.

Nimanxwit tbi Kman.