2 Tcyakil kꞌij cxel nkꞌoꞌne chjonte teya ex cjawil nnimsaꞌne tbiya te jumajx.

3 Baꞌn tuꞌn tjaw knimsaꞌn tbi Kman porque maꞌ toclen. Mlay tzꞌel baj knicꞌ tiꞌj toclen maꞌxix.

4 Cxel cytxꞌolbaꞌn ke mambaj cye cycꞌwaꞌl cyiꞌj ke tbinchbena nim cyipumal, ex cxel cykꞌoꞌn chjonte teya tiꞌj takꞌunbena.

5 Che yolil tiꞌj tajwalila ex tiꞌj toclena maꞌxix, atzun weye chin yolile tiꞌj tbinchbena maꞌ t-xilen.

6 Che yolil tiꞌj tbinchbena maꞌ tipumal ex xobajilxix, atzun weye chin yolile tiꞌj toclena maꞌxix.

7 Che yolil tiꞌj t-xtalbila maꞌxix, ex che bitzal tuꞌn cymante ka aya tzꞌaklxix.

8 In kꞌakꞌan tcꞌuꞌj Kman kiꞌj ex in tzꞌeꞌy tcꞌuꞌj kiꞌj; yaj in tzaj tkꞌoj ex nim tcꞌujlalil kiꞌj.

9 Baꞌnte Kman cyucꞌil cycyakil, ex cꞌujlaꞌn cycyakil tchꞌisben tuꞌn.

10 Nman, cycyakil tchꞌisbena baꞌn tuꞌn t-xi cykꞌoꞌn chjonte teya, ex ke ocslal tiꞌja baꞌn tuꞌn t-xi cykꞌoꞌn chjonte teya.

11 Baꞌn tuꞌn cyyolin tiꞌj tajwalila tuj tcawbila, ex baꞌn tuꞌn cyyolin cyiꞌj ke tbinchbena maꞌxix cyipumal.

12 Baꞌn tuꞌn cyyolin ke xjal tiꞌj tipumala ex tiꞌj tajwalila tuj tcawbila.

13 Mintiꞌ bajsbil te tcawbila, ex ccawila tuj tcyakil tabkꞌiyil te jumajx.

14 Ate Kman onil cye keju in che jaw tolj ex in che jaw twaban keju cyjaꞌ cyicꞌ tzꞌak.

15 Cycyakil in che queꞌyin tiꞌja ex in che ayon tuꞌn cyxi tcꞌaꞌchana oc tpon tajben cye.

16 Tcyakil in xi tkꞌoꞌna cye ax tuꞌn t-xtalbila, ex in che noj cycyakil ke tchꞌisbena.

17 Tzꞌaklxix te Kman tuj tcyakilju in tbinchaꞌn, ex at tcꞌujlalil cyiꞌj cycyakil.

18 Nikayin taꞌ Kman cyiꞌj keju in che cubsan twitz, akeju axix toc cyuꞌn.

19 In xi tkꞌoꞌn aju in cykanin keju in che niman te, ex oc t-xi cykanin onbil te in che tzaj tbiꞌn ex in che clet tuꞌn.

20 Ate Kman clol cye keju in che cꞌujlan te, atzun ke xjal mya baꞌn in che naj tuꞌn.

21 Cjawil nnimsaꞌne tbi Kman, ex baꞌn tuꞌn tjaw nimsaꞌn tbi xjan cyuꞌn cycyakil xjal, te jaꞌlo ex te jumajx.