2 at tcꞌujlalil wiꞌje ex ate colbil wibe, ate wewbil wibe mas maꞌ tjax ex tzokpilte weye; ic tten te weye ic tzaꞌn jun makbil in ajben tuj kꞌoj ex tucꞌil in pon nclon wibe; ate in cub kꞌonte cye ke tnam tjakꞌ ncawbile.

3 Nman Dios, ¿ti cyxilen ke xjal tuꞌnju cucx in ximana cyiꞌj? ¿Ti cyxilen ke xjal tuꞌnju cꞌujlaꞌn ke tuꞌna?

4 Ic tten xjal ic tzaꞌn chꞌin cykꞌikꞌ in tzaj ex jurat nneꞌx, ex ic tten tchwinklal ic tzaꞌn jun xlecun in cub naj.

5 Nman, jakoꞌn ela twitz cyaꞌj ex tcuꞌtza; macon oca ke witz tuꞌntzun tetz sib cyuj;

6 samantza tkan kꞌancyok tuꞌn cybaj sputj ke aj kꞌoj tiꞌja, xoꞌnxa ke tplecha cyiꞌj tuꞌn cyel ok.

7 Nukpintza tkꞌaba max jawni ex chin tcloma tuj nimxix xobajil; chin tcloma tuj cykꞌab xjal cyuj mastl nasyon,

8 ex cywitz keju in cymaꞌn nicꞌaj yol ex in jaw cyyecꞌun cybankꞌab twitz cyaꞌj te cyuwsabl te jun yol mya ax toc.

9 Nman Dios, cxel nbitzane jun acꞌaj bitz te teya; che xel nbitzane ke bitz te teya tucꞌil quitar.

10 Tuꞌna in xi tkꞌoꞌna cambabl cye ke rey; tuꞌna o chin clete akine David aju tmajena, mintiꞌ ma chin cube tuꞌn spad;

11 coꞌpin ela kine ex chin tcloma tuj cykꞌab xjal cyuj mastl nasyon, ex cywitz keju in cymaꞌn nicꞌaj yol ex in jaw cyyecꞌun cybankꞌab twitz cyaꞌj te cyuwsabl te jun yol mya ax toc.

12 Che chꞌiyxwit ke kcyꞌajal ic tzaꞌn ke tzeꞌ, ex ke kmeꞌjel tbanilxixwit che queꞌyin ic tzaꞌn ke tkan ja cꞌochimaj cyiꞌj ateꞌ tuj tja rey.

13 Che nojxwit ke ktxꞌutxꞌ tuꞌn tcyakil twitz awal baꞌn tnicꞌbenjtz. Che chmet-xwit ke kẍneꞌl tuj milin cybet, elaꞌwt mil cybaj che ten cyuj kcojbil.

14 Atwit cyipun kwacẍ tuꞌn cyjawon iktz, miꞌnwt che oc tzokpaj xjal kiꞌj, ex miꞌnwt ko el ok cywitz. Ex miꞌnwt ko jaw schꞌin tuꞌn xobajil cyuj cay.

15 At tzalajbil cye xjal at tcyakil jlu cye. At tzalajbil cye xjal a Kman toc te Cydios.