2 ojtzkiꞌn tuꞌna tcyakilju in bant wuꞌne; masque najchak taꞌya, pero baꞌntl nximbetze tuꞌna.

3 Ojtzkiꞌntl tuꞌna ka in chin bete ex ka in chin ojlane, baꞌntl tuꞌna tcyakilju in bant wuꞌne.

4 Oc naꞌnxtok tetz jun yol tuj ntziꞌye, lu ojtzkiꞌntl tcyakil tuꞌna, Nman.

5 Txolin wiꞌje tuꞌna; ex tzyuꞌn kine tuꞌn tkꞌaba.

6 Nimxix nneꞌla tnabla tuj nwitze, mlayx canun nnable tiꞌj ex maꞌ t-xilen, tuꞌntzunju mlayx chin canune tuꞌn tel nnicꞌe tiꞌj.

7 ¿Tzaꞌn ban nxiꞌye najchak twitz T-xewa? ¿Ex tzaꞌn ban nxi oke twitza?

8 Ka ma chin jaxe max twitz cyaꞌj, atzun taꞌya ma chixin, ex ka ma chin cuꞌxe t-xeꞌpun txꞌotxꞌ jatum taꞌ cynajbil cyimni, ex axtzun taꞌya ma chixin;

9 ka ma chinx lipane jatum in tzaj spicꞌeꞌ t-xe cyaꞌj, ex ka ma chin najane jlajxi mar tuj telex kꞌij,

10 ax icx ma chixin ẍakluꞌn kine tuꞌn tkꞌaba, ex mlayx chinx ttzokpiꞌn tbankꞌaba.

11 Ka ma cub nximane tuꞌn tcub wewan wibe tuj klolj, ex ka ma cub nximane tuꞌn tchꞌexpet spicꞌun at wiꞌjele tuꞌn toc te klolj,

12 mlayx bant tuꞌn ncub ewane tuꞌn klolj twitza; porque in koptzꞌaj konicꞌan twitza ic tzaꞌn kꞌijl. Junx nneꞌla klolj teya ic tzaꞌn spicꞌun.

13 Aya binchante nximlale; tuꞌna in bante tuj talbil ntxuꞌye.

14 Cxel nkꞌoꞌne chjonte teya tuꞌnju maꞌxix t-xilen takꞌunbena; in chin labine tiꞌj ex ma tzꞌel nnicꞌe tiꞌj ax toc jlu.

15 Mintiꞌ ewat nximlale twitza tej twinikax ex tej nbante tuj ewaj tuj talbil ntxuꞌye, ax icx tej nwinikaxe tuj ewaj, mer ic tzaꞌncu t-xeꞌpun txꞌotxꞌ tuj klolj.

16 O chin tila tej matok in chin winikaxe; tcyakil jlu tzꞌibamaj tuj tuꞌja. Ximamajtl tuꞌna jteꞌ abkꞌi tuꞌn ntene tej naꞌnxtok wul itzꞌje.

17 Nman Dios, maꞌxix t-xilen t-ximbetza tuj nwitze porque nimxix cyajlal.

18 Nokwit chin oc tene ajlal cye, maslo nim cyajlal twitz ttxa tzꞌaꞌn; ex oc tel nwatle ax atine tucꞌila.

19 Nman Dios, byoncuya keju binchal mya baꞌn, ex lakꞌbaꞌmila wiꞌje ke byol xjal,

20 ex keju in che xmayin tiꞌja, akeju in che kꞌojin tiꞌja nokx gan.

21 Nman, in che el wicꞌune keju in che icꞌun teya. Ncꞌiꞌye tuꞌn ntene cyxol aj kꞌoj tiꞌja.

22 Te jumajx ma che el wicꞌune. Ma che oc nkꞌoꞌne te aj kꞌoj wiꞌje.

23 Nman Dios, chin t-xpichꞌun baja ex ojtzkima wanmiye; e ticꞌ twitza wiꞌje ex ojtzkima tuj nnable;

24 ex queꞌyintza ka in chin bete tuj be mya baꞌn, ex chin t-ẍakluma tuj be te jumajx.