Aju tley Dios puro tbanil
-1-
119
At tzalajbil cye keju in che bet mintiꞌ cypaltil ex in japun tley Kman cyuꞌn.2 At tzalajbil cye keju in cybinchaꞌn aju in tmaꞌn Dios tuꞌn tbant ex in che jyon tiꞌj Kman tuꞌn tcyakil cyanmi,
3 akeju mintiꞌ in cybinchaꞌn jun mya baꞌn, ex in che bet tuj tbe Kman.
4 Aya o kꞌmante tuꞌn cyjapun ke t-xnakꞌtzbila ic tzaꞌnx cyten.
5 Cucxwit chin tene waꞌlxix tuꞌntzun t-xi nnimane ke tleya.
6 Mlay chin chꞌixwiye oc t-xi nnimane cycyakil tmandamyenta.
7 Axix toc cjawil nnimsaꞌne tuꞌn wanmiye oc cybant wuꞌne ke tleya tzꞌaklxix.
8 Waje tuꞌn cyjapun ke tleya wuꞌne. Miꞌn chin cyaj tcolina te jumajx.
-2-
9 ¿Ti jacu tenba tuꞌn jun cuꞌxun tuꞌn tten tchwinklal sak? Oꞌcx tuꞌn tankꞌin ic tzaꞌnx in tmaꞌn tyola.
10 In chin jyone tiꞌja tuꞌn tcyakil wanmiye; miꞌn takꞌa ambil tuꞌn tel npaꞌn wibe cyiꞌj ke tmandamyenta.
11 O txi ncꞌuꞌne ke tyola tuj wanmiye tuꞌntzun miꞌn nbinchane il twitza.
12 Nimanxwit tbiya Nman. Chin t-xnakꞌtzantza cyiꞌj ke tleya.
13 O cheꞌx nchicꞌbaꞌne cycyakil ke tleya akeju o tmaya.
14 Mas in chin tzalaje tuꞌn woc lpeꞌye cyiꞌj ke tmandamyenta twitz tcyakil kꞌinumabl.
15 Chin bel tene ximal cyiꞌj ke t-xnakꞌtzbila ex cꞌoquel nkꞌoꞌne nwitze tiꞌj ju in bant tuꞌna.
16 Chin tzalajele cyiꞌj ke tleya ex mlay tzicꞌ tnaꞌl tyola wuꞌne.
-3-
17 Binchama baꞌn weye akine tmajena, tuꞌntzun wankꞌine ex tuꞌn t-xi nnimane tyola.
18 Spicꞌbama tuj nnable tuꞌntzun twile ke t-xnakꞌtzbila maꞌxix cyxilen ex tbanilxix.
19 Betin xjal kine tzalu twitz txꞌotxꞌ. Miꞌn tzꞌel tewana ke tmandamyenta nwitze.
20 Ma baj wipune tuꞌn tlaj waje tuꞌn wojtzkinteye ke tmandamyenta.
21 In xi tmayoꞌna keju in jaw cyniman cyib ex mya baꞌn ke, akeju nneꞌl cypaꞌn cyib cyiꞌj ke tmandamyenta.
22 Lakꞌbaꞌn ela ke wiꞌje tuꞌn miꞌn cyxmayin wiꞌje ex tuꞌn miꞌn wel icꞌune cyuꞌn, porque ma txi nbiꞌne ke tmandamyenta.
23 Masque che yolin ke nejenel cyxol xjal tuꞌn cybinchante mya baꞌn wiꞌje, pero akine tmajena cucx chin ximale cyiꞌj ke tleya.
24 In chin tzalaje cyiꞌj ke tmandamyenta; atzun ke jlu in che kꞌonte nnable.
-4-
25 Chꞌix ncyime; kꞌontza nchwinklale ic tzaꞌnxju yol o tzaj ttziyana.
26 O txi nmaꞌne teya aju in baj wiꞌje, ex o chin tzaj ttzakꞌweꞌna. Chin t-xnakꞌtzantza cyiꞌj ke tleya.
27 Kꞌontza nnable tuꞌntzun nxi lpeꞌye cyiꞌj ke t-xnakꞌtzbila porque waje tuꞌn nximane cyiꞌj ke tbinchbena maꞌ cyxilen.
28 In chin okꞌe tuꞌnju at nimxix bis tuj wanmiye; kꞌukbantza ncꞌuꞌje ic tzaꞌnx ju yol o tzaj ttziyana.
29 Miꞌn takꞌa ambil tuꞌn nnicꞌane yol ex chin t-xtalintza cyuꞌn ke t-xnakꞌtzbila.
30 O jaw nscꞌoꞌne ju be axix toc ex at nganiye cyiꞌj ke tleya.
31 Nman, ma txi nkꞌon wibe tuꞌn nnimane ke tmandamyenta; miꞌn cub tkꞌoꞌna nchꞌixwiye.
32 Nnoꞌc tilil wuꞌne tuꞌn cyjapun ke tmandamyenta porque nojni wanmiye tuꞌn tzalajbil tuꞌna.
-5-
33 Nman, chin t-xnakꞌtzantza cyiꞌj ke tleya ex cucx che xel nnimane te jumajx.
34 Kꞌontza nnable tuꞌntzun tjapun t-xnakꞌtzbila wuꞌne; waje tuꞌn t-xi nnimane tuꞌn tcyakil wanmiye.
35 Onintza kine tuꞌn nnimane tmandamyenta, porque atzun in cnet tzalajbil wuꞌne.
36 Kꞌontza nganiye cyiꞌj ke tmandamyenta ex mya tiꞌj cambabl in cnet mya tuj tumel.
37 Miꞌn takꞌa ambil tuꞌn toc ten nwitze cyiꞌj keju mya ax toc dios ke; kꞌontza nchwinklale tuꞌn nbete tuj tbeya.
38 Akine tmajena, japunx tuꞌna wucꞌile aju yol o tzaj ttziyana cye keju in che niman teya.
39 Lakꞌbaꞌn ela wiꞌje aju xmaybil in chin xobe tiꞌj, porque baꞌn ke tleya.
40 At-xix nganiye cyiꞌj ke t-xnakꞌtzbila; kꞌontza nchwinklale porque tzꞌaklxix teya.
-6-
41 Nman, yecꞌuntza weye aju tcꞌujlalila ex ju colbil tuꞌna, ic tzaꞌnx o tzaj ttziyana.
42 Cyjaꞌtzun jacu tzakꞌwet wuꞌne aju in xmayin wiꞌje porque kꞌukl ncꞌuꞌje tiꞌj tyola.
43 Chin tonintza tuꞌn cucx nyoline tiꞌj ju yol ax toc porque ma keꞌ ncꞌuꞌje tiꞌj tleya.
44 Cucx che japunel ke tleya wuꞌne tuj tcyakil wankꞌible.
45 Cyjaꞌtzun jacu chin ankꞌine tzokpiꞌntl kine, porque otok chinx lpeꞌye cyiꞌj t-xnakꞌtzbila.
46 Oc chin yolile cyiꞌj ke tmandamyenta cywitz ke rey ex mlay tzaj nchꞌixwiye,
47 porque cꞌujlaꞌn ke tmandamyenta wuꞌne ex in chin tzalaje cyiꞌj.
48 Cꞌujlaꞌn ke tmandamyenta wuꞌne ex at nganiye cyiꞌj, ex nimxix in chin ximane cyiꞌj ke tleya.
-7-
49 Naꞌntza aju yol tzaj tmaꞌna weye, akine tmajena; aju tzaj tmaꞌna tuꞌn tkeꞌ ncꞌuꞌje tiꞌj.
50 Atzun jlu ma tzꞌoc te kꞌukbabl ncꞌuꞌje tuj bis: Tuꞌnju yol tzaj ttziyana ma tzaj tkꞌoꞌna nchwinklale.
51 Keju in jaw cyniman cyib mintiꞌ in xi cycolin tuꞌn cyxmayin wiꞌje, atzun weye mlay tzꞌel npaꞌn wibe tiꞌj tleya.
52 Naꞌn wuꞌne aju tzaj tmaꞌna ojtxi tuꞌn tbant kuꞌne, ex cyiꞌjtzun jlu in cnet kꞌukbabl ncꞌuꞌje, Nman.
53 Ma tzaj ntxꞌuꞌjile cyiꞌj ke xjal mya baꞌn tuꞌnju in cyaj cycolin tleya.
54 In chin bitzane cyiꞌj ke tleya tuj txꞌotxꞌ jatum atine ic tzaꞌn betin xjal.
55 Nman, konicꞌan in tzaj nnaꞌne tbiya; ex cjapunel tleya wuꞌne.
56 Atzun jlu cbantel wuꞌne: Cxel nnimane ke t-xnakꞌtzbila.
-8-
57 Nman, oꞌcx aya wetzbile, o txi ntziyane tuꞌn t-xi nnimane tyola.
58 Tuꞌn tcyakil wanmiye ma chin cubsane twitza, chin t-xtalin cuba ic tzaꞌnxju yol o tzaj ttziyana.
59 In cub tene ximal tiꞌj ju in bant wuꞌne, ex in ajtz meltzꞌaje juntl maj tuꞌn t-xi nnimane ke tmandamyenta.
60 Oc tilil wuꞌne, jurat naj xi nnimane tmandamyenta.
61 Ma baj cytxolin cyib ke binchal mya baꞌn wiꞌje tuꞌn ntzyete cyuꞌn, pero mintiꞌ ma tzicꞌ cynaꞌnjtz ke tleya wuꞌne.
62 Tmij akꞌbil in chin jaw weꞌye kꞌol chjonte teya cyiꞌj ke tleya tzꞌaklxix.
63 Wamiw wibe cyucꞌil keju in che niman teya ex cyucꞌil keju in che japun ke tleya cyuꞌn.
64 Nman, nojni twitz txꞌotxꞌ tuꞌn tcꞌujlalila; chin t-xnakꞌtzantza cyiꞌj ke tleya.
-9-
65 Nman, ma tbinchaya baꞌn weye, akine tmajena, ic tzaꞌnx ju yol o tzaj ttziyana.
66 Chin t-xnakꞌtzantza tuꞌn tten nnable ex wojtzkible, porque kꞌukl ncꞌuꞌje cyiꞌj ke tmandamyenta.
67 Tej naꞌnxtok nyajlanjtze, in el txalpuje tiꞌj tbeya, atzun jaꞌlo in xi nnimane tyola.
68 Baꞌn teya ex in tbinchaꞌna aju baꞌn; chin t-xnakꞌtzantza cyiꞌj ke tleya.
69 Keju in jaw cyniman cyib in xi cynicꞌan yol wiꞌje, pero in che japun ke t-xnakꞌtzbila wuꞌne tuꞌn tcyakil wanmiye.
70 Tzpetni taꞌ cynabl, atzun weye in chin tzalaje tiꞌj tleya.
71 Baꞌn oc te weye tej nyajlanjtze, cyjaꞌtzun tten el nnicꞌe cyiꞌj ke tleya.
72 Te weye mas maꞌ toclen aju xnakꞌtzbil tzaj tkꞌoꞌna twitz nimcu kꞌan pwak ex sak pwak.
-10-
73 Tuꞌna cub tbinchaꞌna kine; kꞌontza nnable tuꞌn tel nnicꞌe cyiꞌj ke tmandamyenta.
74 Keju in che niman teya che tzalajel oc woc cyqueꞌyin, porque ma tzꞌoc keꞌ ncꞌuꞌje tiꞌj tyola.
75 Nman, baꞌn wuꞌne tzꞌaklxix ke tleya ex tuj tumel in yajlanjtze tuꞌna.
76 Tzꞌajbenwt tcꞌujlalila te kꞌukbabl ncꞌuꞌje, ic tzaꞌnx ju yol tzaj ttziyana weye.
77 Tzaj tzꞌeꞌy tcꞌuꞌja wiꞌje tuꞌntzun wankꞌine, porque in chin tzalaje tiꞌj tleya.
78 Tzajxwit cychꞌixwi keju in jaw cyniman cyib ex keju nok elajx in chin oc cyyasoꞌn; waje tuꞌn nximane cyiꞌj ke t-xnakꞌtzbila.
79 Tzꞌocwit cychmon cyib wucꞌile keju in che niman teya, akeju ojtzkiꞌn ke tmandamyenta cyuꞌn.
80 Cuchiwt tuꞌn woc lpeꞌye cyiꞌj ke t-xnakꞌtzbila tuꞌn tcyakil wanmiye, tuꞌntzun miꞌn njaw chꞌixwiye.
-11-
81 Niban tbaj wipune tuꞌn tlaj in chin ayone tiꞌj tuꞌn nclete tuꞌna; pero ma tzꞌoc keꞌ ncꞌuꞌje tiꞌj tyola.
82 Niban tbaj cyipun ke tbakꞌ nwitze tuꞌnju in chin ayone tiꞌj tuꞌn tjapun ju yol o tzaj ttziyana, ex in nmaꞌne: ¿Jtoj ban ttzaja kꞌukbalte ncꞌuꞌje?
83 Masque ma chin tijine ex mintiꞌtl wajbene, pero mintiꞌ nnicꞌ cynaꞌnjtz ke tleya wuꞌne.
84 ¿Jteꞌ kꞌijtl tuꞌn nyone tiꞌj? ¿Jtoj ban tcub tkꞌoꞌna cysentens keju in che yajlante weye?
85 Ke xjal in jaw cyniman cyib ex mintiꞌ in xi cyniman tleya ma cuꞌx cylacuꞌn jun jul tuꞌn nxi tzꞌake tuj.
86 Chin tonintza, porque nokx gan in chin baj yajlaꞌne. Cycyakil tmandamyenta axix toc ke.
87 Chꞌixmi in cub byoꞌne cyuꞌn xjal, pero mintiꞌ cyaj ncoline ke t-xnakꞌtzbila.
88 Kꞌontza nchwinklale ic tzaꞌnx tcꞌujlalila tuꞌntzun cyjapun ke tmandamyenta wuꞌne.
-12-
89 Nman, te jumajx ctel tyola cyuwsaꞌmaj max tuj cyaꞌj.
90 Aju yol in tzaj ttziyana cucx in japun tuꞌna; tuꞌna cub tbinchaꞌna aju txꞌotxꞌ ex cucx tten.
91 Cycyakil tiꞌxti cucx waꞌlx ke ic tzaꞌn cyaj tmaꞌna, porque cycyakil in che ajben teya.
92 Nokwit mintiꞌ in tzaj tiꞌn t-xnakꞌtzbila tzalajbil weye, mawtlo chin naje tuꞌn bis.
93 Mlayx tzicꞌ cynaꞌnjtz ke t-xnakꞌtzbila wuꞌne, porque cyuꞌn ke jlu ma tzaj tkꞌoꞌna nchwinklale.
94 Chin tcloma porque teya kine ex ma chin oc lpeꞌye cyiꞌj ke t-xnakꞌtzbila.
95 Ke xjal mya baꞌn oꞌcx in che ayon tiꞌj tuꞌn nnaje cyuꞌn, atzun weye oꞌcx in chin ximane cyiꞌj ke tmandamyenta.
96 Ma wile, cycyakil tiꞌxti at jatum tuꞌn cypon baj, atzun ke tmandamyenta mintiꞌ bajsbil cye.
-13-
97 Cꞌujlaꞌnxix tleya wuꞌne. Tcyakil kꞌij in chin ximane tiꞌj.
98 Cyuꞌn ke tmandamyenta at mas nnable cywitz aj kꞌoj wiꞌje porque cucx ateꞌ ke tmandamyenta wucꞌile.
99 Mas ma tzicꞌ nnable cywitz ke xnakꞌtzal weye tuꞌnju cucx in chin ximane tiꞌj ju in tmaꞌna weye tuꞌn nbinchanteye.
100 Mas ma tzicꞌ nnable cywitz ke tij xjal tuꞌnju niman ke tmandamyenta wuꞌne.
101 Ma tzꞌel npaꞌn wibe tiꞌj tcyakil be mya baꞌn tuꞌntzun tjapun tyola wuꞌne.
102 Bajx tzꞌel npaꞌn wibe cyiꞌj ke tmandamyenta tuꞌnju aya xnakꞌtzal weye.
103 Aju yol tzaj ttziyana weye mas chiꞌ nneꞌl tuj ntziꞌye twitz taꞌl cab.
104 Cyuꞌn ke tmandamyenta ma tzꞌoc nnable, cyjaꞌtzun nneꞌl wicꞌune tcyakil xnakꞌtzbil nicꞌaj yol.
-14-
105 Ic tten tyola ic tzaꞌn jun candil te ẍaklul weye, in tkꞌoꞌn spicꞌun tuj nbeye.
106 Xi ntziyane jun nyole axix toc ex cjapunel wuꞌne; ke tmandamyenta tzꞌaklxix che japunel wuꞌne.
107 Nman, nimxix yajbil ma tzaj wiꞌje, kꞌontza wankꞌible ic tzaꞌn o tzaj ttziyana.
108 Cꞌmonxa nyole te akꞌbil chjonte teya Nman, ex chin t-xnakꞌtzantza cyiꞌj ke tmandamyenta.
109 Cucx nneꞌljeꞌ wiꞌje tuꞌn ncyime, pero mlay tzicꞌ tnaꞌl tleya wuꞌne.
110 Ke xjal mya baꞌn in cub cykꞌoꞌn cꞌobil tuj nbeye, pero bajx tzꞌel npaꞌn wibe cyiꞌj ke t-xnakꞌtzbila.
111 Ma che oc ke tmandamyenta te jun wetzbile te jumajx porque in cykꞌoꞌn tzalajbil te wanmiye.
112 Tuꞌn tcyakil wanmiye ma cub nximane tuꞌn cyjapun ke tleya wuꞌne te jumajx.
-15-
113 In che el wicꞌune ke xjal xmletzꞌ, atzunju tleya cꞌujlaꞌn wuꞌne.
114 Aya clol weye ic tzaꞌn jun makbil tuꞌn nclete; ma tzꞌoc keꞌ ncꞌuꞌje tiꞌj tyola.
115 Cylakꞌbamil cyibe wiꞌje akeye xjal mya baꞌn, porque waje tuꞌn cyjapun wuꞌne ke tmandamyent Ndiose.
116 Kꞌontza wipune ic tzaꞌnxju yol o tzaj ttziyana, tuꞌntzun wankꞌine; japunx tuꞌna aju tzaj ttziyana, tuꞌntzun miꞌn wele tuj nchꞌixwiye.
117 Chin tonintza ex jacu chin clete; cyjaꞌtzun cucx che japunel ke tleya wuꞌne.
118 In che el ticꞌuna keju nneꞌl cypaꞌn cyib cyiꞌj ke tleya porque mintiꞌ tnabl cyximbetz.
119 Ke xjal mya baꞌn ateꞌ twitz txꞌotxꞌ in che el ticꞌuna ic tzaꞌn tzꞌis; cyjaꞌtzun cꞌujlaꞌn ke tmandamyenta wuꞌne.
120 In luꞌlun nximlale tuꞌnju in chin xobe twitza; ma tzaj t-xobil wiꞌje cyuꞌn keju castiw tuꞌna.
-16-
121 Bajx txi ncoline tuꞌn nbinchanteye aju tzꞌaklxix; miꞌn chinx tkꞌoꞌna tuj cykꞌab keju yajlal weye.
122 Tcyaj weꞌya wiꞌje tuꞌn tbinchanteya baꞌn weye; tuꞌn miꞌn nbaj cyyasoꞌn keju in jaw cyniman cyib.
123 Niban tbaj cyipun ke tbakꞌ nwitze tuꞌn tlaj in chin ayone tuꞌn nclete tuꞌna, in chin ayone tuꞌn ntzokpete tuꞌna ic tzaꞌnx o tzaj ttziyana.
124 Xtalin cuba kine tuꞌnju tcꞌujlalila, akine tmajena; chin t-xnakꞌtzantza cyiꞌj ke tleya.
125 Akine tmajena. Kꞌontza nnable porque waje tuꞌn tel nnicꞌe cyiꞌj ke tmandamyenta.
126 Nman, ma pon tkꞌijlalil tuꞌn tcub cycastiw tuꞌna porque mintiꞌ o txi cyniman tleya.
127 Cyjaꞌtzun in ncꞌujlaꞌne ke tmandamyenta mas twitz kꞌan pwak tbanilxix.
128 Cyjaꞌtzun in chinx lpeꞌye cyiꞌj ke t-xnakꞌtzbila ex nneꞌl wicꞌune cycyakil xnakꞌtzbil nicꞌaj yol.
-17-
129 Maꞌ t-xilen tcyakilju t-xnakꞌtzbila, cyjaꞌtzun niman wuꞌne.
130 Aju chicꞌbabl tiꞌj tyola in t-spicꞌbaꞌn tuj knable ex in tkꞌoꞌn cynabl ke xjal chꞌin cynabl.
131 Nimxix waje cyiꞌj ke tmandamyenta.
132 Chin tqueꞌyintza ex tzajx tzꞌeꞌy tcꞌuꞌja wiꞌje ic tzaꞌn in tbinchaꞌna cyiꞌj keju in che cꞌujlan teya.
133 Chin t-ẍakluma ic tzaꞌnx in tmaꞌn tyola, ex miꞌn takꞌa ambil tuꞌn tcub wiꞌje tuꞌnju mya baꞌn.
134 Chin tcloma teju yajbil weye cyuꞌn xjal porque waje tuꞌn cyjapun ke tmandamyenta wuꞌne.
135 Chin tqueꞌyintza tuꞌn tzalajbil, akine tmajena, ex chin t-xnakꞌtzantza tuꞌn tel nnicꞌe cyiꞌj ke tleya.
136 Nimxix taꞌl nwitze nneꞌl mer ic tzaꞌn jun nima, porque mintiꞌ in xi niman t-xnakꞌtzbila cyuꞌn xjal.
-18-
137 Tzꞌaklxix teya Nman, ex tzꞌaklxix ke tmandamyenta.
138 Aju tmaya keye tuꞌn kbinchanteye, tzꞌaklxix ex ax toc.
139 Ma tzaj tloꞌch ncꞌuꞌje, porque ke aj kꞌoj wiꞌje mintiꞌ cyaj tiꞌj tyola.
140 Aju tyola mintiꞌ tpaltil, cyjaꞌtzun cꞌujlaꞌn wuꞌne, akine tmajena.
141 Nok chꞌin woclene ex icꞌun kine cyuꞌn xjal, pero mintiꞌ ma tzicꞌ cynaꞌl ke tmandamyenta wuꞌne.
142 Tzꞌaklxix teya te jumajx, ex aju xnakꞌtzbil tuꞌna axix toc.
143 O chin tene tuj cꞌixcꞌoj ex tuj bis, pero ake tmandamyenta e tzalajsante weye.
144 Ke tmandamyenta tzꞌaklxix ke te jumajx; kꞌontza nnable tuꞌn wankꞌine.
-19-
145 Nman, in chin cubsane twitza tuꞌn tcyakil wanmiye; chin ttzakꞌwentza, waje tuꞌn cyjapun ke tleya wuꞌne.
146 Twitza in chin cubsane, chin tonintza tuꞌntzun cyjapun ke tmandamyenta wuꞌne.
147 Naꞌnxtok tcub kꞌij, in chin jaw weꞌye kanil onbil teya; ma tzꞌoc keꞌ ncꞌuꞌje tiꞌj tyola.
148 In chin itzꞌlene enter akꞌbil tuꞌntzun nximane tiꞌj ju yol o tzaj ttziyana.
149 Bintza tkꞌajkꞌajel nwiꞌye Nman nok tuꞌnju tcꞌujlalila; kꞌontza nchwinklale ic tzaꞌnx tajbila.
150 Nikayin ateꞌ wiꞌje ke yajlal weye mya baꞌn ke, ex najchak cyelsaꞌn tiꞌj tleya.
151 Nikayin taꞌya Nman, ex cycyakil ke tmandamyenta axix toc ke.
152 Atxix ojtxi wojtzkiye ke tmandamyenta, akeju e cyaj bant tuꞌna te jumajx.
-20-
153 Queꞌyintza aju yajbil weye ex chin tcloma porque mintiꞌ nnicꞌ tnaꞌnjtz tleya wuꞌne.
154 Yolina wiꞌje tuꞌn nclete ex colpima kine, kꞌontza nchwinklale ic tzaꞌnx ju yol o tzaj ttziyana.
155 Mlayx che clet ke xjal mya baꞌn porque mintiꞌ in che oc lpeꞌ cyiꞌj ke tleya.
156 Nman, nim tkꞌakꞌbil tcꞌuꞌja; kꞌontza nchwinklale ic tzaꞌnx tajbila.
157 Nim cyajlal ke aj kꞌoj wiꞌje ex yajlal weye, pero mintiꞌ nneꞌl npaꞌn wibe cyiꞌj ke tmandamyenta.
158 Mintiꞌ in cub tuj nwitze ke xjal in che oc meltzꞌaj tiꞌja tuꞌnju mintiꞌ in xi cyniman ke tmandamyenta.
159 Nman, queꞌyintza nim in ncꞌujlaꞌne ke t-xnakꞌtzbila; kꞌontza nchwinklale tuꞌnju tcꞌujlalila.
160 Cycyakil ke tyola axix toc ke; cycyakil ke tleya tzꞌaklxix ke ex te jumajx ke.
-21-
161 Ke nejenel cyxol xjal nokx gan in chin baj yajlaꞌne cyuꞌn, atzun weye in chin xobe tuꞌn tyola.
162 In chin tzalaje tuꞌnju yol o tzaj ttziyana, ic tzaꞌn jun xjal otok tzꞌoc noj tiꞌj jun nintz kꞌinumabl.
163 Nneꞌl wicꞌune aju nicꞌaj yol ex mintiꞌ in cub tuj nwitze, pero in ncꞌujlaꞌne aju tleya.
164 Tcyakil or in jaw nnimsaꞌne tbiya nok tuꞌnju tzꞌaklxix ke tleya.
165 Keju in cycꞌujlaꞌn ke tleya txubtxaj ateꞌ, ex nok alcyex ma tzaj cyiꞌj, mlay che cub tzꞌak.
166 Nman, chin ayole tiꞌj tuꞌn nclete tuꞌna, porque ma che japun ke tmandamyenta wuꞌne.
167 In cheꞌx nnimane ke tmandamyenta ex in che ncꞌujlaꞌne tuꞌn tcyakil wanmiye.
168 In cheꞌx nnimane ke t-xnakꞌtzbila ex ke tmandamyenta; ojtzkiꞌn tuꞌna cycyakil ke nbinchbene.
-22-
169 Oc njaw schꞌine, ponxwit tkꞌajkꞌajel nwiꞌye twitza Nman; kꞌontza nnable ic tzaꞌnx tyola.
170 Ponxwit aju nnaꞌj Diose twitza; chin tcloma ic tzaꞌnx o tzaj ttziyana.
171 Cuchiwt cucx jaw nnimsaꞌne tbiya, porque o chin tzaj t-xnakꞌtzaꞌna cyiꞌj ke tleya.
172 Cuchiwt cucx t-xi nbitzane jun bitz tiꞌj ju yol o tzaj ttziyana, porque cycyakil ke tmandamyenta tzꞌaklxix ke.
173 Nok tencuya tuꞌn ttzaj tkꞌoꞌna onbil weye, porque o jaw nscꞌoꞌne ke t-xnakꞌtzbila.
174 Nman, waje tuꞌn nclete tuꞌna. In chin tzalaje tiꞌj tleya.
175 Waje chin ankꞌine tuꞌn tjaw nnimsaꞌne tbiya; awt ju tbinchbena tzꞌaklxix onin wiꞌje.
176 Ma chin el tzpete ic tzaꞌn jun ẍneꞌl; tzaja jyolte weye porque mintiꞌ nnicꞌ cynaꞌl ke tmandamyenta wuꞌne.