2 Baꞌn tuꞌn cymante ke aj Israel cyjaꞌ: Mintiꞌ bajsbil te tcꞌujlalil Kman.

3 Baꞌn tuꞌn cymante ke pal cyjaꞌ: Mintiꞌ bajsbil te tcꞌujlalil Kman.

4 Keju in che niman te Kman, baꞌn tuꞌn cymante cyjaꞌ: Mintiꞌ bajsbil te tcꞌujlalil.

5 Tej atine tuj cꞌixcꞌoj ex bis in cubsane twitz Kman, in tzaj biꞌne tuꞌn ex in clete tuꞌn.

6 Ate Kman at wucꞌile, mlay chin xobe. Mintiꞌ jun mya baꞌn jacu cybincha xjal wiꞌje.

7 Ate Kman at wucꞌile ex a onil weye. Cyjaꞌtzun cwilaꞌye oc tcub cyiꞌj keju in che icꞌun weye.

8 Mas baꞌn tuꞌn toc keꞌ kcꞌuꞌj tiꞌj Kman ex mya tuꞌn toc keꞌ kcꞌuꞌj cyiꞌj xjal.

9 Mas baꞌn tuꞌn toc keꞌ kcꞌuꞌj tiꞌj Kman ex mya tuꞌn toc keꞌ kcꞌuꞌj cyiꞌj ke nejenel cyxol xjal.

10 Otok baj txolin wiꞌje cyuꞌn cycyakil nasyon tuꞌn cykꞌojin wiꞌje, pero nok tuꞌn tipumal Kman cub cyiꞌj wuꞌne.

11 Otok baj cytxolban cyib wiꞌjele, pero nok tuꞌn tipumal Kman cub cyiꞌj wuꞌne.

12 Otok baj cytxolban cyib wiꞌje ic tzaꞌn ttxu cab, pero jurat o baj cytxꞌuꞌjil, mer ic tzaꞌn txkan chꞌiꞌx jurat in baj tzꞌeꞌy tuꞌn kꞌakꞌ; nok tuꞌn tipumal Kman cub cyiꞌj wuꞌne.

13 Inx lamoꞌne cyuꞌn tuꞌn tcyakil cyipun tuꞌn ncub tzꞌake, pero ate Kman ul onil weye.

14 Oc chin bitzale te Kman aju kꞌol wipumale, porque a clol weye.

15 Tuj cyja xjal tzꞌaklxix nnoꞌc bitz te tzalajbil tuꞌnju otok cub cyiꞌj aj kꞌoj cyuꞌn. Tuꞌn tipumal Kman ma cub cyiꞌj aj kꞌoj.

16 Aju tipumal Kman nimxix toclen. Tuꞌn tipumal Kman ma cub cyiꞌj aj kꞌoj, che chi xjal tuj cybitz.

17 Mlay chin cyime, nok oꞌcx cucx chin ankꞌile tuꞌn t-xi ntxꞌolbaꞌne tcyakilju o tbincha Kman.

18 Cyuwxix ncastiwoye cub tkꞌoꞌn Kman, pero mintiꞌ takꞌ ambil tuꞌn ncyime.

19 Cyjakome tlamel tja Dios nwitze, porque waje tuꞌn wocxe kꞌolte chjonte te Kman.

20 Atzun ttzi tja Kman jlu, ex atzun che oquex ke xjal tzꞌaklxix.

21 In xi nkꞌoꞌne chjonte teya Nman tuꞌnju ma chin tzaj ttzakꞌweꞌna ex tuꞌnju aya clol weye.

22 Aju abj el cyicꞌun ke binchal ja ma tzꞌoc te scyini te simyent.

23 A jlu ma tbincha Kman ex in ko labin tiꞌj.

24 Atzun kꞌij lu cyaj tmaꞌn Kman tuꞌn tcub kicꞌsaꞌn. Ko tzalajxix tiꞌj.

25 Binchama xtalbil Nman, ko tcloma. Ex binchama xtalbil tuꞌn ktene baꞌn.

26 Cyꞌiwlaꞌnxwit aju tzul, tuꞌn Kman ma tzaj samaꞌn. Max tuj tja Dios in che cub kcyꞌiwlaꞌne.

27 Ate Kman ax Dioste, ex a kꞌol spicꞌun kibaj. E t-xeꞌt ninkꞌij ex cyiꞌnxe tkꞌab tzeꞌ tuꞌn cypon max ttxlaj tcach altar.

28 In xi nkꞌoꞌne chjonte teya tuꞌnju aya Ndiose, ex cxel nkꞌoꞌne chjonte teya tuꞌnju maꞌ toclena.

29 Cykꞌonxe chjonte te Kman porque baꞌnte ex mintiꞌ bajsbil te tcꞌujlalil.