2 Tej naꞌnxtok tbinchet enter twitz txꞌotxꞌ, atxix ojtxi ex tuj tcyakil tabkꞌiyil te jumajx, oꞌcx aya Dios.

3 Cycyakil xjal in che oc juntl maj te tkukil txꞌotxꞌ tuꞌna oc in tmaꞌna cyjaꞌ: Akeye xjal, che oque te tkukil txꞌotxꞌ.

4 Ax toc jun mil abkꞌi tuj twitza mer ic tzaꞌn jun kꞌij te ew aju o tzꞌex, ex mer ic tzaꞌn nok cab ox or te konicꞌan.

5 In che naj xjal tuꞌna ic tzaꞌn in cheꞌx ikan tuꞌn aꞌ, ex ic cyten ic tzaꞌn jun witzicꞌ, ex ka ic tzaꞌn chaꞌx cꞌul in tzaj pokꞌl te prim,

6 te prim in tzaj t-xul ex in chꞌiy, pero te kale in tzkij ex in naj.

7 Ax toc in ko naje tuꞌn tkꞌoja, ex biꞌx in ko secꞌpaje tuꞌn.

8 Ke kile ex ke kbinchbene mya baꞌn in bant tuj ewaj, kꞌanchaꞌlxix ke twitza.

9 Ax toc aju kkꞌije cyjaꞌ tbaj tuꞌn tlaj tkꞌoja, ex aju kabkꞌiyile nneꞌx ic tzaꞌn in tzaj xjikꞌban kcꞌuꞌje.

10 Aju kabkꞌiyile tuꞌn ktene tzalu twitz txꞌotxꞌ nok 70 abkꞌi, ex katzun at jun nimxix in ten, in japun twiꞌ 80. Masque ma ko tene nim kꞌij twitz txꞌotxꞌ, pero nok bis ex sictleꞌn nnicꞌx kuꞌne. Jurat naj in che ex ke abkꞌi, ax icx keye jurat in ko icꞌe twitz txꞌotxꞌ.

11 Mi aꞌl jun jacu tzꞌel tnicꞌ tiꞌj taꞌw tkꞌoja, ex mi jun jacu tzꞌel tnicꞌ tiꞌj nicꞌpun ttxꞌuꞌjila at.

12 Ko t-xnakꞌtzantza tuꞌn tel knicꞌe tiꞌj ax toc nok chꞌin tuj kkꞌije, tuꞌntzun tten knable.

13 Nman Dios, tajtza juntl maj kucꞌile, ex cuchiwt tzul naja. Kꞌakꞌantz tcꞌuꞌja kiꞌje akoꞌye tmajena.

14 Ko tnojsama tuꞌn tcꞌujlalila oc tcub kꞌij, ex ko bitzale tuꞌn tzalajbil tuj tcyakil kꞌij te kankꞌible.

15 Kꞌontza nim abkꞌi te tzalajbil te t-xel ju cꞌixbisabl keye tuꞌna ex te t-xel ju bis.

16 Yecꞌuntz tbinchbena maꞌ t-xilen keye akoꞌye tmajena, ex yecꞌuntz tipumala tbanilxix cye ke kcꞌwaꞌle.

17 Kman Dios, binchama xtalbil keye, cuchiwt baꞌn tzꞌela kakꞌunbene tuꞌna, ax toc baꞌnwt tzꞌela kakꞌunbene tuꞌna.