2 Cxel nkꞌoꞌne tkanil ka te jumajx ju tcꞌujlalila, in japunxix ju tyola ex mintiꞌ in chꞌexpet; ic tzaꞌn te cyaꞌj mintiꞌ in chꞌexpet, icxtzunju tyola mintiꞌ in chꞌexpet.

3 Cyaj bant tiꞌj jun tyola tucꞌil David ex xi ttziyana te tmajena scꞌoꞌmaj tuꞌna, chiya cyjaꞌ:

4 Ke tiyjila che ul te tibajxi che oquel nkꞌoꞌne te cawil te jumajx te t-xela.

5 Nman Dios, cycyakil keju ateꞌ tuj cyaꞌj in cykꞌoꞌn chjonte teya tuꞌnju in japunxix tyola, ex tuꞌnju tbinchbena maꞌxix t-xilen.

6 Mi jun anjel mi ke txkantl ateꞌ tuj cyaꞌj in pon ic tzaꞌn teya Nman.

7 Porque maꞌ t-xilena Dios, ex xobajilxixa, txolin tiꞌja cyuꞌn keju ateꞌ tuj cyaꞌj.

8 Nman Dios aya Tajaw Tcyakil, at nim tipumala ex tzyuꞌn aju yol axix toc tuꞌna; mintiꞌ juntl jacu pon ic tzaꞌn teya.

9 In cawina tibaj mar oc in tzaj pulin cyuw wen ex in kꞌajen tuꞌna.

10 Biꞌx cub tpachꞌuꞌna ju nintz jil tuj mar, ex biꞌx cub tbyoꞌna; ex e baj t-sputuna ke aj kꞌoj tiꞌja tuꞌn tipumal tkꞌaba.

11 Teya cyaꞌj ex txꞌotxꞌ; tuꞌna o bant twitz txꞌotxꞌ ex cycyakil keju ateꞌ twitz.

12 Tuꞌna o bant enter twitz txꞌotxꞌ, tzaꞌnx jun pacꞌ icx juntl pacꞌ; ke witz Tabor ex Hermón in che bitzan tuꞌn tzalajbil tiꞌj tbiya.

13 At nim tipumala ex in cub tiꞌj tcyakil tuꞌna tuꞌnju tipumala.

14 Cyuw tten tkꞌukbila porque atzun in binchet ju tzꞌaklxix tuꞌna, ex in tbinchaꞌna tcyakil tuj tumel; in tzaj tyecꞌuna tcꞌujlalila ex aju tyola axix toc tuꞌn tcyakilju in tbinchaꞌna.

15 Nman Dios, at tzalajbil cye ke xjal baꞌn che kꞌon chjonte teya ex in che bet tuj t-spicꞌumala,

16 in che tzalaj tiꞌja tcyakil kꞌij ex in che tzalaj tuꞌnju tzꞌaklxixa.

17 Ax toc aya kꞌol kipumale tbanilxix, ex tuꞌn t-xtalbila cyjaꞌ toc mastl kipune.

18 Ate Kman clol ke, aju Dios Xjan cye aj Israel, atzun kreyju.

19 Tuj tkꞌijlalil ojtxi mer ic tzaꞌn tuj witzicꞌ o yolina cye ke tmajena in che nimanxix teya, ex tzaj tmaꞌna cye cyjaꞌ: Cyxol ke xjal etzan wuꞌne ma jaw nscꞌoꞌne jun mintiꞌ in baj tcꞌuꞌj, ma tzꞌoc nkꞌoꞌne toclen maꞌxix ex ma txi nkꞌoꞌne onbil te.

20 Ma cnet David wuꞌne tuꞌn toc te nmajene. Ex ma jax nkꞌoꞌne aseyt xjan tuj twiꞌ tuꞌn tcꞌmonte toclen te rey.

21 Cucx chin onile tiꞌj ex cꞌoquel tipun wuꞌne tuꞌn wipumale;

22 mlay che oc tzokpaj ke aj kꞌoj tiꞌj ex mlay cub tiꞌj cyuꞌn ke binchal mya baꞌn.

23 Twitz che bel npachꞌuꞌne ke aj kꞌoj tiꞌj; ex che bel ncꞌixbisaꞌne keju in che icꞌun te.

24 Cꞌoquel ncꞌujlaꞌne ex cjapunel nyole tucꞌil; wuꞌne cꞌoquel mas tipun.

25 Cxel nkꞌoꞌne toclen ex ctzyetelx tcawbil max ttzi Nintz mar tuꞌn tpon baj ttzi nima Éufrates.

26 Ctzajel tmaꞌn weye: Aya Nmane ex Ndiose, aya colol wiꞌje ex clol weye.

27 Cxel nkꞌoꞌne toclen ic tzaꞌn tnejel ncyꞌajale, tuꞌntzun mas maꞌ toclen cywitz mastl rey twitz txꞌotxꞌ.

28 Cucx ctel ncꞌujlalile tiꞌj te jumajx, ex mlay chꞌexpet nyole cyjel bant tiꞌj tucꞌil.

29 Ke tiyjil che ul itzꞌj te tibajxi che cawil te jumajx te t-xel, acux atxcu cyaꞌj.

30 Katzun ma tzꞌel cypaꞌn cyib tiꞌj nxnakꞌtzbile ex ka mintiꞌ ma che bet ic tzaꞌnx in xi nmaꞌne,

31 ka ma che icꞌ tibaj nleye ex ka miꞌn ma che japun ke nmandamyente cyuꞌn,

32 cbel nkꞌoꞌne cycastiw tuꞌn tlaj miban che bin ex tuꞌn tlaj ju mya baꞌn in cybinchaꞌn; ex che bajel npekꞌane tuꞌn tzeꞌ;

33 pero mlay baj ncꞌujlalile tiꞌj David, ex mlay bant tuꞌn miꞌn tjapun aju xi ntziyane te.

34 Mlay cub nkꞌuchine aju yol cyaj bant tiꞌj wuꞌne tucꞌil, ex mlay baj nchꞌexpuꞌne aju yol o txi ntziyane te.

35 Te jumajx o txi ntziyane aju yol te David, tuꞌnju xjan kine, ex mlay chin nicꞌane yol te.

36 Ke tiyjil che ul itzꞌj te tibajxi che oquel te cawil te jumajx te t-xel, acux cucx at kꞌij.

37 Cucx ctel cycawbil te jumajx ic tzaꞌn ju xjaw, ex cucx ctel cycawbil te jumajx acux atx cyaꞌj, chitzuna tmaya.

38 Atzun jaꞌlo ma tzꞌel ticꞌuna aju rey jaw t-scꞌoꞌna ex ma tzaj tkꞌoja tiꞌj.

39 Ma cub tkꞌuchina aju yol cyaj bant tiꞌj tuꞌna tucꞌil tmajena; ma tzꞌel ticꞌuna ex ma tzꞌel tiꞌna toclen.

40 Ma cub t-xituna ju muro toc tiꞌj ttanmi, ex ma che cub t-xituna ke cwartel jatum in tclon tib.

41 Cycyakil xjal in che icꞌ tuj lugar lu in xi cyelkꞌaꞌn tcyakilju at te, ex ke tvesin rey in che xmayin tiꞌj.

42 Ma txi tkꞌoꞌna cyipumal aj kꞌoj tuꞌn tcub tiꞌj cyuꞌn, ex ma txi tkꞌoꞌna tzalajbil cye keju in che kꞌojin tiꞌj.

43 Ma baj naj ttzi t-spad tuꞌna ex mintiꞌ ma tzꞌonina tiꞌj tuj kꞌoj.

44 Ma tzꞌel tiꞌna tajwalil; ma tzꞌel ticꞌuna ex ma tzꞌel tiꞌna tipumal tcawbil;

45 ma tijin naj tuꞌna, ex ma cub tkꞌoꞌna nim tchꞌixwi.

46 Nman Dios, ¿jtoj txi tcolina tuꞌn t-xi tewan tiba? ¿Cucxpe ctzajel tkꞌoja mer ic tzaꞌn kꞌakꞌ in cꞌant?

47 Nman, naꞌntza ka nok chꞌin tuj wabkꞌiyile; ex ke xjal e bant tuꞌna nok chꞌin in che ten twitz txꞌotxꞌ.

48 Mi jun xjal cyjel ten te jumajx ex ka miꞌn cyim; ex mi jun xjal jacu bant tclonte tib tuꞌn miꞌn tcyim ex tuꞌn miꞌn tpon tuj cynajbil cyimni.

49 Nman Dios, ¿jatum taꞌ tcꞌujlalila aju attok nej, aju xi ttziyana te David axix toc tuꞌn tjapun tuꞌna?

50 Nman, naꞌntza ma che el icꞌun ke tmajena cyuꞌn nimcu xjal ex ma pon taꞌw tuj wanmiye tuꞌnju in che oc icꞌleꞌn.

51 Nman Dios, cyjaꞌtzun tten ma ko el icꞌune cyuꞌn ke aj kꞌoj tiꞌja; ex cyjaꞌtzun tten ma tzꞌel icꞌun ju xjal scꞌoꞌmaj tuꞌna ex in che xmayin tiꞌj tcyakil maj.

52 Nimanxwit tbi Kman te jumajx. Icxwitju.