2 ponwit nyole twitza, kꞌontz twiꞌya tiꞌj ncubsbile.

3 Nimxix mya baꞌn ma tzaj wiꞌje, cyjaꞌtzun chꞌix ncyime;

4 jacu chin oc cykꞌoꞌn te tajlal cyxol ke cyimni, porque ma chin cyaj tene mintiꞌ wipune.

5 Ma chin cyaj kꞌoꞌne cyxol ke cyimni, ic ntene ic tzaꞌn ke xjal otok che cyim tuj kꞌoj ex otok che cuꞌx makuꞌn; ex ic tzaꞌn keju mintiꞌtl colbil cye tucꞌila ex otok tzicꞌ cynaꞌnjtz tuꞌna.

6 Ma chin cuꞌx tkꞌoꞌna max t-xeꞌpun jul, cyuj ke lugar klolj cyuj ex maꞌ cyxeꞌ.

7 Ma tzaj nim tkꞌoja wiꞌje, ma chin oque ic tzaꞌn jun xjal in cyaj mulkꞌaj tjakꞌ aꞌ tuꞌnju bis in tzaj tkꞌoꞌna.

8 Tuꞌna ma chin cyaj coline cyuꞌn ke wamiwoye; tuꞌna ma chin el icꞌune cyuꞌn. Presin kine ex mintiꞌ tumel tuꞌn ntzokpaje.

9 Tuꞌn tlaj nim in chin okꞌe niban woque moẍ. Tcyakil kꞌij in chin cubsane twitza Nman, ex in che jaw nyecꞌune ke nkꞌabe twitz cyaꞌj tuꞌn nyoline tucꞌila.

10 ¿Jacupe che bant ke binchben nim cyipumal tuꞌna cye ke cyimni? ¿Jacupe txi cykꞌoꞌn ke cyimni chjonte teya?

11 ¿Jacupe che yolin tiꞌj tyola axix toc ex tiꞌj tcꞌujlalila tuj cynajbil cyimni jatum in baj naj tcyakil?

12 Tuj cynajbil cyimni puro kloljxix jatum nnicꞌ tnaꞌnjtz tcyakil, ¿atpe jun jacu tzꞌel tnicꞌ tiꞌj ttena tzꞌaklxix ex cyiꞌj ke tbinchbena nim cyipumal?

13 Atzun weye Nman, in chin kanine onbil teya; prim in chin cubsane twitza.

14 ¿Tikuꞌn in chin el ticꞌuna Nman? ¿Tikuꞌn nneꞌl tewan tiba nwitze?

15 Atxix tuj ncuꞌxumale in tene tuj bis ex chꞌixmi in cyime; o tzicꞌx wuꞌne ke tiꞌxti xobajilxix tzaj tkꞌoꞌna wiꞌje, ex mlay tzicꞌx mastl wuꞌne.

16 Ma tzaj ttxꞌuꞌjila xobajilxix wiꞌje ex ma chin naje tuꞌn,

17 tcyakil or txolin wiꞌje tuꞌn, mer ic tzaꞌn tjakꞌ aꞌ ma chin aj mulkꞌaje.

18 O che el tlakꞌbaꞌna wiꞌje ke wamiwoye ex ke wucꞌile, atzun jaꞌlo oꞌcx klolj at wucꞌile.