2 Nimxix nganiye tuꞌn ntene twitz tjaya. Tuꞌn tcyakil wanmiye ex ntzalajbile in chin bitzane teju Dios itzꞌ.

3 Ke tal chyuꞌj ex ke xtxꞌaꞌy in cnet cylugar tuꞌn toc cykꞌoꞌn cykꞌuꞌ tiꞌj t-altara tuꞌn cyjaw pokꞌl cyal, Nman, aya Tajaw Tcyakil, aya Nreye ex aya Ndiose.

4 At tzalajbil cye keju najl tuj tjaya ex cucx in jaw nimsaꞌn tbiya cyuꞌn.

5 At tzalajbil cye keju in cnet cyipumal tucꞌila, ex at nim cygan tuꞌn cyxiꞌ tuj tjaya.

6 Oc in che icꞌ tuj tzkij txꞌotxꞌ, in chꞌexpet cyuꞌn ex nnoꞌc ic tzaꞌn jatum in che jaw jlet ke twi aꞌ, ex oc in tzaj jbal, nim aꞌ in jaw chmet.

7 Keju xjal lu nnoꞌcxi cyipumal junjun kꞌij, ex cꞌoquel cyqueꞌyin ju Dios Maꞌxix T-xilen tuj tnam Sión.

8 Nman Dios, aya Tajaw Tcyakil, aya Tdios Jacob, bintza nnaꞌj Diose.

9 Nman Dios clol keye, queꞌyintza tucꞌil tzalajbil aju xjal scꞌoꞌmaj tuꞌna tuꞌn toc te rey.

10 Mas baꞌn tuꞌn ntene jun kꞌij tuj tjaya, twitzju tuꞌn ntene jun mil kꞌij mya tuj tjaya; mas baꞌn tuꞌn ntene ttzi tja Ndiose, ex mya tuꞌn ntene jatum najl keju binchal mya baꞌn.

11 Porque ate Kman Dios spicꞌun ex clol ke; tzul tkꞌoꞌn xtalbil ex nimbil ke, ex mlay cub t-xcꞌayin tuꞌn ttzaj tkꞌoꞌn aju baꞌn cye keju in che bet tuj tumelxix.

12 Aya Kman Dios Tajaw Tcyakil, at tzalajbil cye ke xjal in keꞌ cycꞌuꞌj tiꞌja.