2 Queꞌyintza ke aj kꞌoj tiꞌja ex keju in che icꞌun teya; in che jaw tilj ex in jaw cyiꞌn cyib tiꞌja.

3 Tuꞌnju jawni cywitz, ma bant tiꞌj cyuꞌn tuꞌn cybinchante mya baꞌn cyiꞌj ke xjal etzan tuꞌna ex cyiꞌj keju cloꞌmaj tuꞌna.

4 O cub cyximan tuꞌn cytzaj xitul keye, tuꞌn miꞌn ktentle ic tzaꞌn jun nasyon, ex tuꞌn miꞌn ttzaj naꞌntl kbiye, akoꞌye aj Israel.

5 O bant tiꞌj jun cyyol mya baꞌn tiꞌja, o jaw cyiꞌn cyib tiꞌja mojl cyyol cycyakil.

6 Atzun ke jlu: Ke aj Edom, ke aj Ismael cyucꞌix ke tiyjil Agar ex ke tiyjil Moab,

7 ke aj Geba, ke aj Amón ex ke aj Amalec, cyucꞌix ke aj Filistey, ex ke xjal najl tuj tnam Tiro,

8 ex cyucꞌixpe ke aj Asiria ma tzꞌoc cymojban cyib cyucꞌil, tuꞌn cyonin cyucꞌil ke cyiyjil tcyꞌajal Lot.

9 Binchama cyiꞌj ic tzaꞌnx o tbinchaya cyiꞌj aj Madián, ic tzaꞌn o tbinchaya tiꞌj Sísara ex ic tzaꞌn o tbinchaya tiꞌj Jabín tuj tkꞌab xak Sisón,

10 akeju e naj tuꞌna tuj Endor e oc ic tzaꞌn abono te txꞌotxꞌ.

11 Binchama cyiꞌj ke nejenel cye ic tzaꞌnx o tbinchaya tiꞌj Oreb ex tiꞌj Zeeb; binchama cyiꞌj cycyakil keju at cyoclen tuꞌn cycawin cyxol ic tzaꞌnx o tbinchaya tiꞌj Zeba ex tiꞌj Zalmuna,

12 akeju o cyajbe tuꞌn cyoc te tajwil tbanil txꞌotxꞌ etzan tuꞌn Dios.

13 Nman Dios, kꞌonca ke ic tzaꞌn tzkij chꞌiꞌx tol t-xiꞌ tuꞌn cykꞌikꞌ, ex ic tzaꞌn t-xak tzeꞌ tzkij in xi ikan tuꞌn cykꞌikꞌ;

14 ex ic tzaꞌn in tzꞌeꞌy chcꞌul tuꞌn kꞌakꞌ ex in che baj tzꞌeꞌy ke witz tuꞌn tkꞌakꞌal.

15 Icxtzun yajlan cuba ke tuꞌn nintz cykꞌikꞌ ex secꞌpun baja ke tuꞌn cykꞌikꞌ jbal.

16 Kꞌon cuba cychꞌixwi ke jlu, Nman, tuꞌntzun tel cynicꞌ tiꞌj tipumala.

17 Cubxwit cychꞌixwi te jumajx; e ttzaj cychꞌixwi ex e cycyim.

18 E tel cynicꞌ tiꞌj ka oꞌcx aya Mambaj, ex oꞌcx aya Dios Maꞌxix Toclen tibaj tcyakil twitz txꞌotxꞌ.