Ko tqueꞌyintza tuꞌn tzalajbil
Bitz tuꞌn Asaf
80
Aya Pastor cye aj Israel ko tbintza, aya ẍaklul cye tiyjil José ic tzaꞌn txkan ẍneꞌl, ex tcubsaꞌn tkꞌukbila cyibaj ke querubín, queꞌyintza ke tiyjil Efraín tuꞌn tzalajbil,2 ax icx ke tiyjil Benjamín ex ke tiyjil Manasés. Weꞌctza ex ko tcloma tuꞌn tipumala.
3 Nman Dios, kꞌiꞌn ajtza tiꞌj kanmiye tuꞌn kajbene juntl maj teya. Ko tqueꞌyintza tuꞌn tzalajbil tuꞌntzun kclete.
4 Nman Dios aya Tajaw Tcyakil, ¿jtoj txi tcolina tuꞌn tkꞌojina kiꞌje? ¿Jtoj tzaj tbiꞌna knaꞌj Diose, akoꞌye etzan tuꞌna?
5 Nok okꞌel ma tzaj tkꞌoꞌna mer ic tzaꞌn kwaye; ex mer ic tzaꞌn kcꞌaye ma tzaj tkꞌoꞌna nim okꞌel.
6 Ma txi tkꞌoꞌna ambil tuꞌn koc xmayine cyuꞌn ke nasyon kvesin kibe cyucꞌil, ex in che tzeꞌn ke aj kꞌoj kiꞌje.
7 Nman Dios Tajaw Tcyakil, kꞌiꞌn ajtza tiꞌj kanmiye tuꞌn kajbene juntl maj teya, ko tqueꞌyintza tucꞌil tzalajbil tuꞌntzun kclete.
8 Tuj txꞌotxꞌ Ejipt e jeꞌtz tiꞌna ke xjal etzan tuꞌna, mer ic tzaꞌn jun wiꞌ tkan uva, ex ma che icꞌ tlajoꞌna ke mastl nasyon tuj cytxꞌotxꞌ ex ma cuꞌx tawaꞌna tkan uva lu.
9 Ma baj takꞌnana txꞌotxꞌ, ex aju tkan uva ma txiꞌ tlocꞌ ex ma noj tuj txꞌotxꞌ lu tuꞌn.
10 Ma che cyaj ten ke witz tjakꞌ t-xlecumal, ex ke nmak tzeꞌ biꞌx ma che cyaj baj tjakꞌ t-xlecumal tkꞌab.
11 Max ma pon chꞌiy tkꞌab ttzi nima Éufrates.
12 ¿Tikuꞌn ma baj t-xituna tpeꞌn ex ma takꞌa ambil cye xjal in che icꞌ tuj be tuꞌn tel cyxilin twitz?
13 Ma baj naj cyuꞌn boch te tjakꞌ cꞌul, ex ma baj cywaꞌn ke txcup tuj cꞌul.
14 Nman Dios Tajaw Tcyakil, tajtza kucꞌile; ko tqueꞌyintza max tuj cyaꞌj ex ximana tiꞌj tkan uva lu,
15 aju axa cuꞌx awante te, ex tuꞌnxa ma chꞌiy t-xul.
16 E cynaj tuꞌn tkꞌoja keju in che baj txꞌeminte ex nnoꞌcx cykꞌoꞌn tuj kꞌakꞌ;
17 pero onintza aju xjal ma jaw t-scꞌoꞌna ex aju tcꞌwaꞌl tuꞌnxa ma chꞌiy.
18 Mlay tzꞌel kpaꞌn kibe tiꞌja juntl maj; kꞌontza kchwinklale ex oꞌcx teya ko cubsale.
19 Nman Dios aya Tajaw Tcyakil, kꞌiꞌn ajtza tiꞌj kanmiye tuꞌn kajbene juntl maj teya, ko tqueꞌyintza tucꞌil tzalajbil tuꞌntzun kclete.