2 Oc chin yolile tuj techal; cxel nchicꞌbaꞌne aju ewan atxix tuj tkꞌijlalil ojtxi,

3 aju o kbi ex baꞌn kuꞌn ex o tzaj kꞌmaꞌn ke cyuꞌn ke ktzan kman.

4 Mlay cub kewan jlu cywitz ke kcꞌwaꞌl. Cxel ktxꞌolbaꞌn cye ke kiyjil che ul itzꞌj te tibajxi ke tbinchben Kman tbanilxix, ex aju tipumal nimxix ex ke tbinchben maꞌxix cyxilen.

5 Tzaj tkꞌoꞌn Dios jun ley tuꞌn tajben cye tiyjil, ex xi tkꞌoꞌn xnakꞌtzbil tuꞌn cyoc lpeꞌ aj Israel tiꞌj, ex xi tmaꞌn cye ke kxeꞌchel tuꞌn t-xi cyxnakꞌtzaꞌn cye ke cyiyjil,

6 tuꞌntzun cyojtzkinte ke cyiyjil che ul itzꞌj te tibajxi, ex ke cꞌwaꞌl lu tuꞌn t-xi cyxnakꞌtzan cye ke cycꞌwaꞌl che ul itzꞌj te tibajxi,

7 tuꞌntzun toc keꞌ cycꞌuꞌj tiꞌj Dios, ex tuꞌn miꞌn ticꞌ tnaꞌl cyuꞌn aju tbincha Dios; nok oꞌcx tuꞌn t-xi cyniman ke tmandamyent,

8 ex tuꞌn miꞌn cyoc ic tzaꞌn ke cyxeꞌchel miban che niman, ex cyuw cywiꞌ, mya kꞌukl cycꞌuꞌj tiꞌj Dios, nok in jawjeꞌ cycꞌuꞌj.

9 Ke tiyjil Efraín banin cyten tucꞌil xobl plech e jeꞌl ok tuj kꞌij tej toc kꞌoj;

10 mintiꞌ xi cyniman aju yol otok bant tiꞌj cyuꞌn tucꞌil Dios, ex mintiꞌx xi cyniman ke t-xnakꞌtzbil.

11 Icꞌ tnaꞌl cyuꞌn aju otok tbincha Dios, akeju tbinchben maꞌxix cyxilen otok tzaj tyecꞌun cye.

12 Tbincha Dios ke binchben maꞌxix cyxilen cywitz ke cyman tuj lugar Zoán, aju at tuj Ejipt:

13 Cabe ela mar tuꞌn, ex e icꞌtz tiꞌn ke tuj, cub ttzyuꞌn aꞌ ex ic oc ic tzaꞌn jun muro.

14 Kꞌijtl e jeꞌx t-ẍakluꞌn ke tuꞌn jun muj, atzun te konicꞌan tuꞌn t-spicꞌumal tkan kꞌakꞌ.

15 Cub tpaꞌn ke pic tuj tzkij txꞌotxꞌ, ex xi tkꞌoꞌn nimxix cycꞌa aꞌ.

16 Etz tilj nintz aꞌ tuj pic tuꞌn Dios, ex oc ic tzaꞌn jun nima matijxix.

17 Atzun cye cucx e binchan il twitz Dios aju Maꞌxix Toclen, ex jaw cyiꞌn cyib tiꞌj tuj tzkij txꞌotxꞌ.

18 Oc cykꞌoꞌn Dios tuj malbil, xi cykanin cywa ic tzaꞌnx cyajbil.

19 E yolin mya baꞌn tiꞌj ex in cymaꞌntok: ¿Jacupe tzaj tkꞌoꞌn Dios kwa tzalu tuj tzkij txꞌotxꞌ?

20 Ax toc o pax pic tuꞌn Dios ex o tzꞌetz tilj aꞌ tuj ic tzaꞌn jun nima, pero, ¿jacupetzun tzaj tkꞌoꞌn kwa? ¿Jacupetzun tzaj tkꞌoꞌn kchiꞌ, akoꞌ tnam etzan tuꞌn? Che chi, cyma.

21 Tejtzun tbinte Kman jlu, tzaj tkꞌoj cyiꞌj ke tiyjil Jacob, akeju aj Israel cybi; jaw cꞌant ttxꞌuꞌjil ic tzaꞌn kꞌakꞌ,

22 tuꞌnju mintiꞌ xi cyniman tyol Dios ex mintiꞌ oc keꞌ cycꞌuꞌj tiꞌj ju colbil tuꞌn.

23 Masque icju, pero xi tkꞌoꞌn Dios jun orden te muj ex e jaket ke tpwertil cyaꞌj tuꞌn;

24 max tuj cyaꞌj tzaj tchitun wabj maná tbi, xi tkꞌoꞌn te cywa, mer ic tzaꞌn triw.

25 Ke xjal lu xi cywaꞌn cywa anjel. Tuꞌn Dios xi kꞌoꞌn nimxix cywa.

26 Tuꞌn tipumal Dios tzaj xupin cykꞌikꞌ tuj tjawitz kꞌij, ax icx ju cykꞌikꞌ tuj tnayaj kꞌij,

27 tzaj t-samaꞌn Dios ke chyuꞌj te cychiꞌ ke xjal etzan tuꞌn; akeju chyuꞌj tzaj t-samaꞌn ic cyajlal ic tzaꞌn ttxa tzꞌaꞌn ttzi mar.

28 E tzaj t-samaꞌn Dios jatum cycubsaꞌn ke xjal ex cyiꞌjele ke ja xbalun.

29 Ex e waꞌn tejxi tnoj cycꞌuꞌj, cyjaꞌtzun xi tkꞌoꞌn Dios aju cyajbil.

30 Pero naꞌnxtok tnoj cycꞌuꞌj ex atxtok cychiꞌ tuj cytziꞌ,

31 tej ttzaj ttxꞌuꞌjil Dios cyiꞌj, e cub tbyoꞌn ke xinak mas nim cyipun. E cub tbyoꞌn ke xinak mas tbanil cyxol aj Israel.

32 Masque bant tcyakil jlu, pero e oc ten binchal il juntl maj; mintiꞌ xi cyniman ke tbinchben Dios maꞌxix cyxilen.

33 Cyjaꞌtzun cub tkꞌoꞌn Dios cycastiw tuꞌn cycyim te jurat naj, ex tzaj tkꞌoꞌn nim xobajil cyibaj.

34 Oc in che cyim txkan tuꞌn Dios, atzun keju in che cyaj ankꞌin in che oc ten cubsal twitz Dios; in che aj meltzꞌaj tucꞌil tuꞌn tcyakil cycꞌuꞌj,

35 in pontzun Dios tiꞌj cycꞌuꞌj, aju Dios Maꞌxix Toclen, aju in colin cyiꞌj ex in che clet tuꞌn.

36 Pero nok tuꞌn cytziꞌ in xi cymaꞌn nimcu yol puro baꞌn tbinx, pero puro nicꞌaj yol jlu,

37 mintiꞌx e yolin axix toc, ex mintiꞌ japun cyuꞌn aju yol cyaj bant tiꞌj tuꞌn Dios cyucꞌil.

38 Pero nimcu maj tzaj kꞌakꞌan tcꞌuꞌj Dios cyiꞌj, cub tnajsaꞌn cybinchben mya baꞌn ex mintiꞌ e naj tuꞌn, nimcu maj mintiꞌ tzaj tkꞌoj cyiꞌj, ex mintiꞌ xi tkꞌoꞌn ambil tuꞌn ttzaj ttxꞌuꞌjil.

39 Tzaj tnaꞌn Dios ka nok elaj xjal ke, ex ic cyten ic tzaꞌn cykꞌikꞌ in xiꞌ ex ya mintiꞌtl in ajtz meltzꞌaj.

40 Nimcu maj mintiꞌ xi cyniman tyol Dios tuj tzkij txꞌotxꞌ; tuꞌn jlu tzaj tbis Dios cyiꞌj.

41 Pero cucx oc cykꞌoꞌn Dios tuj malbil; tzaj tbis Dios cyuꞌn, aju Dios xjan cye aj Israel.

42 Mintiꞌ tzaj cynaꞌn aju tipumal Dios ex aju kꞌij tej cyclet cywitz ke aj kꞌoj cyiꞌj.

43 Tej tbinchante ke binchben maꞌxix ex xobajilxix tuj lugar Zoán at tuj Ejipt,

44 e oc ke nima te chicꞌ tuꞌn, tuꞌntzun miꞌn cycꞌan aj Ejipt tiꞌj.

45 Tzaj t-samaꞌn ke xcatx ex ẍal cyiꞌj, tcyakil baj naj cyuꞌn;

46 xi tkꞌoꞌn twitz cyawal cye ke ẍplon, aju twitz cyawal otok che akꞌnan tiꞌj.

47 Tuꞌn sakbakun ex tkꞌab cheꞌw e baj naj ke tkan higo ex tkan uva cye aj Ejipt.

48 E cyim ke cywacẍ ex ke cyẍneꞌl tuꞌn sakbakun ex tuꞌn tkan kꞌancyok.

49 Tzaj nimxix ttxꞌuꞌjil Dios cyiꞌj; tzajxix tkꞌoj ex tzaj t-samaꞌn yajbil cyiꞌj. Tzaj t-samaꞌn jun cꞌloj anjel cyiꞌj tuꞌn cynaj.

50 Tzaj nimxix ttxꞌuꞌjil cyiꞌj, mintiꞌ xi tkꞌoꞌn ambil tuꞌn cyankꞌin, nok oꞌcx tzaj tkꞌoꞌn txꞌuꞌj yabil cyiꞌj tuꞌn cycyim;

51 E cub tbyoꞌn cycyakil ke nej cycꞌwaꞌl xjal aj Ejipt.

52 E jeꞌtz tiꞌn ke aj Israel ic tzaꞌn jun peꞌn ẍneꞌl; e jeꞌx tucꞌin tuj tzkij txꞌotxꞌ.

53 Cheba e jeꞌx tucꞌin ke tuꞌntzun miꞌn cyxob, atzun ke aj kꞌoj cyiꞌj e cyaj mulkꞌaj tjakꞌ mar.

54 E tzaj tiꞌn Dios ke xjal etzan tuꞌn e pon tiꞌn tuj jun txꞌotxꞌ xjan, tuj tiwitz txꞌotxꞌ aju tuꞌnx el tiꞌn.

55 Cywitzx aj Israel e ex tlajoꞌn Dios ke nasyon najl tuj txꞌotxꞌ lu; tuj piẍin xi t-sipan txꞌotxꞌ cyxol cycyakil cꞌloj aj Israel, ex atzun xi tkꞌoꞌn cye tuꞌn cynajan tuj.

56 Atzun cye oc cykꞌoꞌn Dios tuj malbil, aju Dios Maꞌxix Toclen, jaw cyiꞌn cyib tiꞌj ex mintiꞌ xi cyniman ke tmandamyent.

57 Ax o cybincha ic tzaꞌnx o cybincha ke ktzan cyman, el cypaꞌn cyib tiꞌj Dios ex mintiꞌ japun tyol cyuꞌn, e oc ic tzaꞌn jun xobl plech ẍoꞌc tiꞌj.

58 Tzaj tkꞌoj Dios cyuꞌn, tuꞌn tlaj jaw cybinchaꞌn ke altar cywi witz; ocx cyicꞌlen tuꞌn tlaj e cꞌulun cywitz ke tilbilal.

59 Tzaj tkꞌoj Dios cyiꞌj tej ttil jlu, ex biꞌx e jel ticꞌun ke aj Israel,

60 ex cyaj tcolin aju ja xbalun te nabl te at tuj Silo, aju tja at cyxol xjal.

61 Xi tkꞌoꞌn ambil cye aj kꞌoj tuꞌn t-xi cyiꞌn aju cax cꞌubl tley Dios, aju techal tiꞌj tajwalil ex tiꞌj tipumal.

62 Nimxix ttxꞌuꞌjil tzaj cyiꞌj ke xjal etzan tuꞌn, cyjaꞌtzun e jeꞌx tkꞌoꞌn tuj cykꞌab aj kꞌoj cyiꞌj tuꞌn cycub cyuꞌn.

63 Tuꞌn kꞌakꞌ e cyim ke cuꞌxun at cyxol. Tuꞌn jlu mintiꞌ e mojeꞌ ke kꞌapoj.

64 Tuꞌn spad e cyim ke pal, ex mintiꞌ xi kꞌoꞌn ambil tuꞌn cyjaw okꞌ ke cyxuꞌjil cyiꞌj.

65 Atzunte Kman tzaj tnaꞌn tib ic tzaꞌn jun xjal nneꞌl twatl, ex ic tzaꞌn jun soldad otok tzꞌel kꞌeꞌn tuj twiꞌ,

66 ex cub cyiꞌj aj kꞌoj tiꞌj tuꞌn ex e jeꞌl ok ke; tzaj cychꞌixwi tuꞌn te jumajx.

67 El ticꞌun ke tcꞌwaꞌl José, ex mintiꞌ jaw t-scꞌoꞌn aju tiyjil Efraín;

68 nok oꞌcx jaw t-scꞌoꞌn aju tiyjil Judá ex tucꞌix aju witz Sión aju cꞌujlaꞌn tuꞌn.

69 Jaw tbinchaꞌn jun lugar xjan maꞌxix twaꞌl ic tzaꞌn ke witz, ex cub tcyuwsaꞌn te jumajx ic tzaꞌnx tten txꞌotxꞌ.

70 Jaw t-scꞌoꞌn David tuꞌn toc te tmajen, aju toc te pastor ẍneꞌl nej;

71 el tiꞌn tuꞌn miꞌn tpastorintl cyiꞌj ke ẍneꞌl, tuꞌntzun toc ten cwentil cye ke xjal etzan tuꞌn, tuꞌntzun toc te pastor cye aj Israel.

72 Ex atzunte David e oc tcwentin ke xjal etzan tuꞌn Dios; e oc tcwentin ex e jeꞌx tucꞌin ke tucꞌil nabl ex tucꞌil tanmi axix toc.