2 Tuj kꞌij oc in tzaj bis wiꞌje in chin cubsane twitz Kman, ex konicꞌan mintiꞌ in xi ncoline tuꞌn cyjaw nyecꞌune ke nkꞌabe twitz cyaꞌj tuꞌn nnaꞌne Dios. Ex mintiꞌ jatum in tzaj kꞌukbaꞌn ncꞌuꞌje.

3 Oc in tzaj nnaꞌne Dios, biꞌx in chin jaw okꞌe; oc in chin cub tene ximal tiꞌj, biꞌx in tzaj baj ncꞌuꞌje.

4 Nman, tuꞌna mintiꞌ nnoꞌcx watl tuj nwitze, nim in baj ncꞌuꞌje ex mlay bant nyoline.

5 In tzaj nnaꞌne ke tkꞌijlalil ex ke abkꞌi te ojtxi;

6 in tzaj nnaꞌne tej in chin bitzane konicꞌan, in chin ximane tuj wanmiye ex in chin xjeline wujxi cyjaꞌ:

7 ¿Cucxpelo ctel tkꞌoj Kman kiꞌj te jumajx? ¿Mlaypelo ko cub t-xtalin juntl maj?

8 ¿Mapetzun baj aju tcꞌujlalil? ¿Mapetzun baj te jumajx aju yol tzaj ttziyan?

9 ¿Mapetzun tzicꞌ tnaꞌl tuꞌn Dios aju t-xtalbil? ¿Masque at tkꞌoj, mlaypelo tzaj kꞌakꞌan tcꞌuꞌj kiꞌj?

10 Aju mas in chin bisune tiꞌj atzun jlu: Aju Dios maꞌ toclen mya ax tmod wucꞌile ic tzaꞌn nej.

11 Che tzajel nnaꞌne ke binchben maꞌxix cyxilen o tbincha Kman ojtxi;

12 chin ximale tiꞌj tcyakilju o tbinchaya, chin yolile cyiꞌj ke tbinchbena.

13 Nman Dios, xjan teya tuj tcyakilju in tbinchaꞌna; ¿alcye juntl nnoꞌc cydiosin xjal maꞌxix toclen ic tzaꞌn teya?

14 Dios, aya in binchante ke binchben maꞌxix cyxilen. Xi tyecꞌuna tipumala cye ke nasyon.

15 Tuꞌn tipumala o clet aju tnam etzan tuꞌna, akeju tcꞌwaꞌl Jacob ex ke tcꞌwaꞌl José.

16 Nman Dios, tej tqueꞌyinjtza tuꞌn mar, tzaj t-xobil twitza, ex e jaw luꞌlun ke aꞌ mas maꞌ cyxeꞌ tuj mar;

17 tzaj ttzokpiꞌn muj nim jbal, o tininin kꞌancyok twitz cyaꞌj ex tuj tcyakil pacꞌ o koptzꞌajeꞌ xleꞌlaj cyaꞌj.

18 O binjtz tkꞌajkꞌajel kꞌancyok in tininin wen tuj xcyakinpaẍ; tuj tcyakil twitz txꞌotxꞌ o spicꞌbanjtz tuꞌn xleꞌlaj cyaꞌj ex baj yucch txꞌotxꞌ tuꞌn cyaknajnab.

19 Jaket jun tbeya tuj mar; icꞌxa tuj nimcu aꞌ, pero mi jun oc noj tiꞌj ticꞌlen tkana.

20 Xi t-ẍakluꞌna ke xjal etzan tuꞌna ic tzaꞌn txkan ẍneꞌl, ex toc Moisés tucꞌix Aarón te nejenel cye.