2 Naꞌntza koꞌye, akoꞌye jun tnam etzan tuꞌna, aju cnet tuꞌna atxix ojtxi, aju o colpet tuꞌna tuꞌn toc te jun tnam etzan tuꞌna; naꞌntza aju witz Sión jatum o najana.

3 Tzaja queꞌyilte cye ke ja te jumajx ma che cub xitj; ma baj cyxitun aj kꞌoj tcyakil aju at tuj lugar xjan teya.

4 Ke aj kꞌoj tiꞌja in che schꞌin tuj tjaya. Ma cub cykꞌoꞌn ke cybander te jun techal tuꞌnju ma che camban.

5 Mer ic tzaꞌn txꞌemil siꞌ ke tuj tmijil jun chcꞌul pin tzeꞌ tuj,

6 tuꞌn siꞌwbil cꞌuxbil ex tuꞌn martiy el cypaꞌn ke tilbilal cꞌochimaj twitz ja.

7 Oc cykoptzꞌin kꞌakꞌ tiꞌj tjaya jatum najliya, ex baj cytzꞌilsaꞌn ex cub cyxitun.

8 Cub cyximan tuꞌn kcub baje cyuꞌn; baj cypatun cycyakil lugar jatum in cub kchmon kibe tuꞌn kcꞌulune teya.

9 Mintiꞌtl in kile ke techal xjan ke, mintiꞌtl jun t-sanjela atx ex mintiꞌlpe baꞌn kuꞌne jtoj baj jlu.

10 Nman Dios, ¿jtoj tuꞌn t-xi cycolin aj kꞌoj tuꞌn cyyolin mya baꞌn kiꞌje? ¿Cucxpe che oquel ten aj kꞌoj xmayil tiꞌja?

11 ¿Tikuꞌn mintiꞌtl in ko tzaj tonina? ¿Tikuꞌn in che cub ttzꞌulina ke tkꞌaba?

12 Atxix tuj tkꞌijlalil ojtxi aya nreye. Nman Dios, nimcu maj o ko clete tuꞌna;

13 tuꞌn tipumala cub tpaꞌn tib mar, cub tpaꞌna cywiꞌ ke nintz txcup ateꞌ tuj mar,

14 cub tpachꞌuꞌna ke twiꞌ ju nintz txcup Leviatán tbi, ex xi tkꞌoꞌna te cychiꞌ ke txcup ateꞌ tuj lugar mintiꞌ cynajbil xjal tuj.

15 Tuꞌna jaket cywi aꞌ ex ke nima, ex e aj tzkij ke nima akeju bajx che aj tzkij.

16 Teya ju kꞌij ex konicꞌan; tuꞌna o bant xjaw ex kꞌij;

17 tuꞌna cub tkꞌoꞌna techal jatum ponin baj txꞌotxꞌ; tuꞌna bant tkꞌijlalil coresma ex tkꞌijlalil jbalil.

18 Kꞌoꞌnc tcwenta tiꞌj Nman, in icꞌun aj kꞌoj tiꞌja ex aju xjal mintiꞌ tnabl in yolin mya baꞌn tiꞌja.

19 Miꞌn tzicꞌ knaꞌnjtze tuꞌna. Mintiꞌ kipune. Ic ktene ic tzaꞌn ke ẍpoꞌk; miꞌn koꞌx tkꞌoꞌna cye ke txcup te tjakꞌ cꞌul.

20 Naꞌntza aju yol o cyaj bant tiꞌj tuꞌna, porque nojni tuj tcyakil twitz txꞌotxꞌ tuꞌn cꞌixbisabl.

21 Miꞌn takꞌa ambil tuꞌn tcub cychꞌixwi ke xjal in che baj yajlaꞌn; cjawil nimsaꞌna cyuꞌn ke xjal meba ex ke mans.

22 Nman Dios, weꞌctza ex clom tiba. Naꞌntza, mintiꞌ in xi cycolin xjal mintiꞌ cynabl tuꞌn toc icꞌleꞌna cyuꞌn.

23 Miꞌn tzicꞌ tnaꞌl tuꞌna aju tkꞌajkꞌajel cywiꞌ aj kꞌoj tiꞌja in che schꞌin, tucꞌix tkꞌajkꞌajel nimxix cyuꞌn keju in jaw cyiꞌn cyib tiꞌja.