2 Chꞌixmi ẍin jaw tolje, ex chꞌixmi ẍex jilj ke nkane,

3 porque ma tzaj tloꞌch ncꞌuꞌje tej ẍe oc nqueꞌyine puro tuj txubtxaj ateꞌ keju in jaw cyniman cyib ex keju mya nimal Dios.

4 Mintiꞌ in che cꞌixbisanjtz, baꞌn taꞌ cyximlal;

5 mintiꞌ in tzaj yajbil cyiꞌj, ex mintiꞌ in tzaj jun cꞌixcꞌoj cyiꞌj, ic tzaꞌn cye txkantl xjal.

6 Aju cynimbil cyib toc cyuꞌn ic tzaꞌn jun cyuꞌ, ex aju cꞌixbisabl cyuꞌn cyiꞌj xjal toc cyuꞌn ic tzaꞌn cyxbalun;

7 nim mya baꞌn in tzaj jlet tuj cyanmi ex nim cyximbetz mya baꞌn.

8 In che xmayin ex in che yolin mya baꞌn, in jaw cyniman cyib ex in baj cyyolin tiꞌj tuꞌn cycꞌixbiset xjal cyuꞌn;

9 in che yolin mya baꞌn tiꞌj Dios at tuj cyaꞌj, ex cyaj tuꞌn cymandarin cyiꞌj cycyakil xjal twitz txꞌotxꞌ.

10 Cyjaꞌtzun in che oc lpeꞌ xjal cyiꞌj ex jurat in xi cyniman xjal aju yol in tzaj cymaꞌn.

11 In cymaꞌn: ¿Baka jacu tbi Dios? ¿Baka jacu tzꞌel tnicꞌ Dios tiꞌj, aju Dios at tuj cyaꞌj?

12 Cyjaꞌtzun cyten keju binchal mya baꞌn. Mintiꞌ in cycꞌulbaꞌn jun mya baꞌn ex cucx in chmet cykꞌinumbal.

13 Nokx gan nnoꞌc tilil wuꞌne tuꞌn tten wanmiye sak ex mintiꞌ in tzaj ntzyuꞌne jun tiꞌxti mya baꞌn.

14 Tuj enter kꞌij in chin cꞌixbisanjtze tuꞌna, ex tcyakil prim in cub tkꞌoꞌna ncastiwoye.

15 Nokwit ma cub nximane ic tzaꞌn cye xjal lu, mawtlo che cub nsbuꞌne ke tcꞌwaꞌla.

16 Oc tilil wuꞌne tuꞌn tel nnicꞌe tiꞌj jlu, pero cyuw ela te weye.

17 Max el nnicꞌe tiꞌj alcye cbajel cyiꞌj tejxi wocxe tuj tja Dios.

18 Ma che cub tkꞌoꞌna tuj jun be puro jilin ex in cheꞌx tlamoꞌna tuꞌn cynaj.

19 Jurat naj in che naj tuꞌna, ex tuꞌnx cyxobil in che cyim ex in che naj.

20 Ic cyten xjal lu ic tzaꞌn jun witzicꞌ oc tel kwatl, cyjaꞌtzun Nman, oc tjaw weꞌya, che elel ticꞌuna porque mer ic tzaꞌn nok jun tilbilal ke.

21 Tzaj nim tloꞌch ncꞌuꞌje ex tzaj jun taꞌw tuj wanmiye

22 tuꞌnju mintiꞌ nnable ex mintiꞌ el nnicꞌe tiꞌj; mer ic kine twitza ic tzaꞌn jun txcup.

23 Masque icju, pero cucx ma chin tene tucꞌila ex tzyuꞌn kine tuꞌn tbankꞌaba.

24 Ẍakluꞌn kine tuꞌna ex tzaj tkꞌoꞌna nnable, te bajsbil oc chin cꞌmetela tuꞌna tuj tajwalila.

25 ¿Alcye ẍaklul weye at tuj cyaꞌj? Oꞌcx aya. Ex oc ntene tucꞌila mintiꞌtl waje tiꞌj ju at twitz txꞌotxꞌ.

26 In baj tipun nximlale ex wanmiye, pero a Dios kꞌolte tipumal wanmiye ex ate wetzbile te jumajx.

27 Keju nneꞌl cypaꞌn cyib tiꞌja che cymel; ex keju in cyaj cycolin cyocslabl tiꞌja, che najel tuꞌna.

28 Atzun weye chin xel lakꞌeꞌye ttxlaj Dios, porque atzun mas baꞌn te weye. Nman Dios, aya colol weye ex cxel nchicꞌbaꞌne tcyakil tbinchbena.