2 Tuj tumelxix ccawil cyibaj ke xjal etzan tuꞌna ex tuj tumelxix cxel tbinchaꞌn cyiꞌj ke xjal in che yajlanjtz.

3 Tuj tumelxix ccawil ju rey cyibaj xjal tuꞌntzun cyten tuj txubtxaj ke xjal etzan tuꞌna.

4 Tuj tumelxix cxel tbinchaꞌn rey cyiꞌj ke meba, ex che cletel tuꞌn ke xjal mintiꞌ at cye, ex biꞌx che najel tuꞌn ke xjal in che yajlan.

5 Oc che nimal xjal teya te jumajx, acux atxcu kꞌij ex xjaw.

6 Ic cꞌoquel ju rey ic tzaꞌn jbal ex ic tzaꞌn ttxa cheꞌw in baj taꞌlin ju txꞌotxꞌ ex ju lugar jatum in che waꞌn alumaj.

7 Che tel xjal tuj txubtxaj ex che betel tuj tumelxix tuj tkꞌijlalil tcawbil, ocxi tnaj xjaw.

8 Cbel tiꞌj tcyakil tuꞌn, ex ctzajel keꞌ tcawbil ttziꞌ jun mar tuꞌn tpon baj ttziꞌ juntl mar, ex ctzajel keꞌ ttzi nima Éufrates tuꞌn tpon baj max ttxaꞌnpun txꞌotxꞌ.

9 Ke xjal najl tuj tzkij txꞌotxꞌ che bel ẍmejeꞌ twitz, ex ke aj kꞌoj tiꞌj cꞌoquex cykꞌon cyib tjakꞌ tcawbil.

10 Tzul kꞌiꞌn oyaj te ex chojbil cyuꞌn ke rey te tnam Tarsis, ex cyuꞌn ke rey najl ttzi mar, ax icx cyuꞌn ke rey tuj txꞌotxꞌ Sabá ex tuj txꞌotxꞌ Seba.

11 Cycyakil rey che bel ẍmejeꞌ twitz ex cycyakil xjal cyuj ke nasyon che ajbel te.

12 Porque a ccolol cyiꞌj ke meba in che cubsan twitz ex cyiꞌj keju in che yajlanjtz ex mintiꞌ jun onil cye.

13 Ctzajel tzꞌeꞌy tcꞌuꞌj cyiꞌj ke xjal mans, ex che cletel ke xjal meba tuꞌn.

14 Che cletel tuꞌn tuj cykꞌab keju in che yajlan cye ex tuj cykꞌab ke byol xjal, porque maꞌ t-xilen cychwinklal tuj twitz.

15 Cꞌelel tkꞌij rey ex ctzajel kꞌoꞌn te aju kꞌan pwak in tzaj tuj txꞌotxꞌ Sabá. Cucx che cubsal xjal twitz Dios tiꞌj rey ex cucx cxel cykꞌoꞌn xjal chjonte te.

16 Cchmetel nim twitz triw tuj txꞌotxꞌ lu ex ctzajel chꞌiy nimxix tuj tiwitz txꞌotxꞌ. Ic cꞌoquel twitz ic tzaꞌn ke tzeꞌ twi witz Líbano, ex che chmetel nim xjal tuj tnam ic tzaꞌn cꞌul in pokꞌchaj tuj cojbil.

17 Cucx cyjel ten tbi rey te jumajx ex cucx che yolil xjal baꞌn tiꞌj acux atx kꞌij twitz cyaꞌj. Cycyakil xjal cyuj ke nasyon twitz txꞌotxꞌ oc cycꞌmaꞌ cyꞌiwbil nok tuꞌn. Cycyakil xjal cyuj ke nasyon twitz txꞌotxꞌ oc cymaꞌ: At tzalajbil te.

18 Kkꞌonx chjonte te Kman Dios aju Cydios aj Israel, porque oꞌcx a binchalte ke binchben maꞌ cyxilen.

19 Nimanxwit te jumajx aju tbi maꞌ t-xilen, ex nojxwit tcyakil twitz txꞌotxꞌ tuꞌn tajwalil. Icxwitju.

20 Atzun in pon baj ke tnaꞌj Dios David, aju tcꞌwaꞌl Isaí.