2 Chin tonintza ex chin tcloma porque aya tzꞌaklxix. Chin tbintza ex chin tcloma.

3 Tzꞌocwita te weye ic tzaꞌn jun pic tuꞌn toc nclon wibe tiꞌj; tzꞌocxwita te jun lugar cyuw tten te colbil wibe ex colol weye. Aya ic ttena te weye ic tzaꞌn jun pic ex jun lugar cyuw tten.

4 Nman Dios, chin tcloma tuj tkꞌab ju xjal mya baꞌn, tuj tkꞌab ju byol xjal ex tuj tkꞌab aju jawni twitz tuꞌn tkꞌojin,

5 porque tiꞌja Nman Dios in chin ayone, ex tiꞌja kꞌukl ncꞌuꞌje atxix tuj ncuꞌxumale.

6 Tej atinxtoke tuj talbil ntxuꞌye otok tzꞌoc keꞌ ncꞌuꞌje tiꞌja. Tuꞌna in ul itzꞌje. Cucx cjawil nnimsaꞌne.

7 Ma che jaw labin nimcu xjal wiꞌje, pero aya colbil weye.

8 Tcyakil kꞌij in chin yoline tiꞌj tajwalila ex in jaw nnimsaꞌne tbiya;

9 miꞌn chin el ticꞌuna oc ntijine; miꞌn chin cyaj tcolina oc mintiꞌtl wipune.

10 Ke aj kꞌoj wiꞌje cyaj tuꞌn ncub cybyoꞌn, ma tzꞌoc cyjunin cyib ex in baj cyximan tuꞌn cybinchante mya baꞌn wiꞌje.

11 In cymaꞌn cyjaꞌ: Che lpexe tiꞌj ex cytzyuntze, ma cyaj colin tuꞌn Dios ex mi aꞌl jun jacu clonte te.

12 Miꞌn tzꞌel lakꞌeꞌya wiꞌje Nman Dios; tzaj naja onil weye.

13 Tzajxwit cychꞌixwi ex che najxwit ke aj kꞌoj wiꞌje. Tzpet-xwit cynabl ex tzꞌelxwit cychꞌixwi keju cyajbil tuꞌn ttzaj mya baꞌn wiꞌje.

14 Atzun weye cucx chin ayole tiꞌja, ex cucx cjawil nnimsaꞌna;

15 tcyakil kꞌij cxel nchicꞌbaꞌne aju ttena tzꞌaklxix ex aju colbil tuꞌna. Maꞌxixte jlu, mlay tzꞌel nnicꞌe tiꞌj.

16 Chin oquel tene kꞌmalte ke binchben nim cyipumal o che bant tuꞌna Nman; cxel nmaꞌne ka oꞌcxcu aya tzꞌaklxix.

17 Nman Dios, aya o tzaj xnakꞌtzante weye atxix tuj ncuꞌxumale, ex cucx in chin yoline cyiꞌj ke tbinchbena maꞌxix.

18 Nman Dios, miꞌn chin cyaj tcolina oc ntijine ex oc t-sakix nwiꞌye, tuꞌntzun nyoline tiꞌj ju tipumala maꞌxix cye ke xjal ateꞌ jaꞌlo ex cye keju che ul itzꞌj te tibajxi.

19 Nman Dios, aju ttena tzꞌaklxix japun pon max twitz cyaꞌj; tuꞌna o che bant ke tiꞌxti maꞌxix cyxilen; mi aꞌl juntl ic tzaꞌn teya.

20 Masque ma takꞌa ambil tuꞌn twile nimcu mya baꞌn ex bis, pero chin ankꞌile tuꞌna juntl maj; chin cjawitz tiꞌna max t-xeꞌpun txꞌotxꞌ,

21 ctzajel tkꞌoꞌna mastl woclene ex ctzajel tkꞌukbaꞌna ncꞌuꞌje juntl maj.

22 Nman Dios, che xel nbitzane ke bitz ex cjawil nnimsaꞌne tbiya tucꞌil tkꞌajkꞌajel twi chnab arpa ex quitar, tuꞌnju in japun tuꞌna tcyakilju in tzaj ttziyana, aya Xjan cye aj Israel.

23 Chin tzalajele oc cyxi nbitzane ke bitz teya, ax icx ctzalajel wanmiye aju ma clet tuꞌna.

24 Ax icx cxel nmaꞌne tcyakil kꞌij ka aya puro tzꞌaklxix, porque ma cub cychꞌixwi keju cyaj tuꞌn ttzaj mya baꞌn wiꞌje.