2 in che cub naj ke ic tzaꞌn sib tuj cykꞌikꞌ, in che el aꞌyix ke ic tzaꞌn xcab nnoꞌcx kꞌot tuj kꞌakꞌ; cyjaꞌtzun tten in che naj ke xjal mya baꞌn twitz Dios.

3 Atzun cye keju tzꞌaklxix in che tzalaj ke; in che noj tuꞌn tzalajbil twitz Dios ex in che tꞌicpaj tuꞌn tzalajbil.

4 Che bitzane te Dios, che bitzane tuꞌn tjaw nimset tbi; cynimsaꞌn jawe aju in bet tibaj muj. Che tzalajxe tiꞌj Kman. Che tzalajxe twitz.

5 Ate Dios najl tuj tja xjan, ate mambaj cye ke cꞌwaꞌl mintiꞌ cyman ex cytxuꞌ ex colol cyiꞌj ke meba xuꞌj;

6 In tzaj tkꞌoꞌn Dios jun lugar jatum tuꞌn cynajan keju cyjunalx ateꞌ; in che etz ttzokpiꞌn keju cyocx pres ex in xi tkꞌoꞌn tzalajbil cye; atzun cye keju miban che bin oc che najal tuj txꞌotxꞌ miban tzaj awal tuj.

7 Nman Dios, tej tcub neja cywitz ke xjal etzan tuꞌna ex tej tbeta tuj lugar mintiꞌ cynajbil xjal tuj,

8 jaw luꞌlun txꞌotxꞌ, tzaj jbal twitz cyaꞌj, aju witz Sinaí jaw luꞌlun twitz Dios, aju Dios cye aj Israel.

9 Nman Dios, tuꞌna tzaj nimxix jbal tuꞌntzun toc juntl maj tipun aju tzkij txꞌotxꞌ etzan tuꞌna.

10 Ke xjal etzan tuꞌna axtzun e cub ten tuj, atzun teya Nman Dios, nok tuꞌn t-xtalbila xi tkꞌoꞌna cye ke meba aju at tajben cye.

11 Tzaj tkꞌoꞌn Kman jun tnej yol ex nimcu xuꞌj e oc ten kꞌmalte tkanil:

12 E jeꞌl ok ke rey cyucꞌix ke cysoldad. Ke xuꞌj otok che cyaj ten ja baj cysipan aju otok tzꞌel kꞌiꞌn cye aj kꞌoj,

13 atzun cyeye acux coẍl keye tuj cypeꞌn ẍneꞌl, oc ttxꞌotxꞌil sak pwak cyiꞌj ke t-xicꞌ paloma. Ex oc ttxꞌotxꞌil kꞌan pwak mas tbanil cyiꞌj ke ttzmal.

14 Tejtzun cyel ok ke rey tuꞌn Dios aju Tajaw Tcyakil, sak oc twi witz Salmón tuꞌn.

15 Maꞌ cywaꞌl ke witz tuj txꞌotxꞌ, ex maꞌxix cyjawsaꞌn.

16 Akeye witz maꞌ cywaꞌle, ¿tikuꞌn in tzaj tloꞌch cycꞌuꞌje tiꞌj ju witz jaw t-scꞌoꞌn Dios tuꞌn tnajan twiꞌ? Atzun cnajal Kman te jumajx.

17 Tuj milin ateꞌ ke tcarwaj Dios te kꞌojbil; tzaj twiꞌ witz Sinaí cyucꞌix ke tcarwaj ex ul tuj tja.

18 Nman Dios, ma jaxa twiꞌ jun witz maꞌ twaꞌl, ma che jax tiꞌna ke pres; o tcꞌama chojbil tzaj cykꞌoꞌn xjal, ex cyucꞌixpe ke xjal miban che niman tzaj cykꞌoꞌn chojbil teya Nman, tuꞌntzun tnajana cyxol.

19 Nimanxwit Kman aju Kdios ex clol ke, tuꞌnju teyle junjun kꞌij in xi tiꞌn aju kikatz.

20 Ate Kman Dios baꞌn colin, ex jacu ko clet tuꞌn te camic,

21 cbel tpaꞌn Dios cywiꞌ aj kꞌoj tiꞌj, tucꞌix cywiꞌ keju cucx cybinchan il.

23 tuꞌntzun tnoj cyiꞌj tkana tuꞌn cychcꞌel ke aj kꞌoj tiꞌja ex tuꞌn t-xi cycꞌaꞌn ke ttxꞌyaꞌna.

24 Nman Dios, aya Ndiose ex Nreye, tuj tjaya xjan kꞌanchaꞌl ke xjal txolin cyten in cub cyicꞌsaꞌn ninkꞌij te nimbil teya.

25 Nejni ke bitzal ex lepchix ke kꞌajtzal chnab, ex tuj xolbaj cycuꞌx ke tal kꞌapoj nnoꞌc cykꞌajtzaꞌn ke tampor chꞌin.

26 Cykꞌonxe chjonte cycyakile te Kman Dios. Cykꞌonxe chjonte te cycyakile akeye aj Israel.

27 Nejni Benjamín cywitz, aju mas chꞌin, cyucꞌix nimcu nejenel cye tiyjil Judá, cye tiyjil Zabulón ex cye tiyjil Neftalí.

28 Nman Dios, yecꞌuntza tipumala ic tzaꞌn o tbinchaya kiꞌje ojtxi.

29 Max tuj tjaya maꞌ twaꞌl tuj Jerusalén, jatum in pon kꞌiꞌn oyaj teya cyuꞌn ke rey,

30 cawinxa tnam Ejipt, aju ic tten ic tzaꞌn ke txcup ateꞌ tjakꞌ tkan ajlaj, ex ic tzaꞌn ke tor ex ke tal tor txꞌuꞌj ke, e tcub cymansin cyib twitza ex e ttzaj cyiꞌn sak pwak; sputun ela ke xjal oꞌcx cyaj tiꞌj kꞌoj.

31 Tuj Ejipt che tzajel ke nejenel; cjawil cyyecꞌun cykꞌab aj Etiopía twitz cyaꞌj tuꞌn cynaꞌn Dios.

32 Che bitzane te Dios akeye tnam tuj tcyakil twitz txꞌotxꞌ, cybitzanxe bitz te Kman,

33 aju in bet twitz cyaꞌj, aju cyaꞌj at te jumajx. Cybinxe tkꞌajkꞌajel twiꞌ, aju tkꞌajkꞌajel twiꞌ nimxix tipumal.

34 Tzꞌelx cynicꞌe tiꞌj tipumal Dios; aju tajwalil tcub cyibaj aj Israel, aju tipumal in japun canun twitz cyaꞌj.

35 Maꞌxix t-xilen Dios tuj tja xjan; aju Cydios aj Israel in tzaj tkꞌoꞌn cyipumal ke xjal etzan tuꞌn.

Nimanxwit tbi Dios.