2 chꞌix nxiꞌye tuj soban maꞌ t-xeꞌ, ex mintiꞌ jatum tuꞌn tcub nkꞌoꞌne nkane. Ma chin cuꞌpun tzꞌake max t-xeꞌ aꞌ, ex ma chinx ikane tuꞌn tipumal.

3 Ma tzkij tuj nkule tuꞌnju nim in chin schꞌine; ma tzaj chyoꞌn tuj nkule, ex ya ma che sict ke nwitze tuꞌnju nim in chin ayone tiꞌj Ndiose.

4 Keju nokx gan in che kꞌojl wiꞌje mas nim cyajlal twitz tajlal ttzmal nwiꞌye, ma chmet cybaj keju in che icꞌun weye ex keju nokx gan cyaj tuꞌn nnaje, in cymaꞌn weye tuꞌn tchjet aju mintiꞌ ma tzꞌel welkꞌaꞌne cye.

5 Nman Dios, tzkiꞌn tuꞌna ka mintiꞌ nnable ex mlay bant tewanjtz wile twitza.

6 Nman Dios Tajaw Tcyakil, cuchiwt miꞌn tzaj cychꞌixwi keju kꞌukl cycꞌuꞌj tiꞌja tuꞌn tlaj ju wile; aya Dios cye aj Israel, cuchiwt miꞌn tzaj cybis tuꞌn nlaje keju toc tilil cyuꞌn tuꞌn cyjyon tiꞌja.

7 Nok tuꞌn tlaja in chin oc yasoꞌne cyuꞌn xjal ex ma cyakix nwitze tuꞌn nchꞌixwiye;

8 mer ic tzaꞌn stranjer xjal ma chin ele tuj cywitz wermaniye, ex mer mintiꞌ ojtzkiꞌn nwitze cyuꞌn.

9 Ma tzaj taꞌw tuj wanmiye tuꞌn tlaj at ncꞌuꞌje tiꞌj tjaya, aju yasbil cyuꞌn keju in che yasun tiꞌja ma cub tzꞌak wibaje.

10 Oc in chin jaw okꞌe ex oc tcub nyoꞌne weꞌyaj, in che oc ten xmayil wiꞌje;

11 ka ma tzꞌoc nkꞌoꞌne xbalun chꞌiꞌx twitz wiꞌje tuꞌnju in chin bisune, cycyakil in che oc ten tzeꞌl wiꞌje.

12 Oꞌcx wiꞌje in che yolin xjal tuj plas, ex ke cꞌal kꞌeꞌn in xi cybitzan bitz tuꞌn cyxmayin wiꞌje.

13 Atzun weye Nman, in chin cubsane twitza; Nman Dios chin tonintza jaꞌlo, chin ttzakꞌwentza nok tuꞌnju at tcꞌujlalila, chin tcloma tuꞌnju cucx in onina wiꞌje.

14 Miꞌn takꞌa ambil tuꞌn ncyaje tuj soban. Chin tcloma tuj cykꞌab keju in che icꞌun weye; chin tcloma tuꞌn miꞌn nxiꞌye tuj aꞌ maꞌ t-xeꞌ.

15 Miꞌn takꞌa ambil tuꞌn nxi ikane tuꞌn aꞌ kꞌiꞌn tipun wen, ex miꞌn takꞌa ambil tuꞌn toc tjunin tib aꞌ wibaje, aju in cuꞌx sutin.

16 Chin ttzakꞌwentza Nman, porque aya baꞌn ex nim tcꞌujlalila, queꞌyintza kine tuꞌnju nim tkꞌakꞌbil tcꞌuꞌja.

17 Miꞌn chin el ticꞌuna, akine tmajena, ex chin ttzakꞌwentz naja, porque atine tuj xobajil.

18 Lakꞌetza wucꞌile ex chin tcloma; chin tcloma tuj cykꞌab aj kꞌoj wiꞌje.

19 Baꞌn tuꞌna ma chin oc xmayine, ma chin chꞌixwiye ex ma chin oc yasoꞌne; ojtzkiꞌn tuꞌna alcye ke aj kꞌoj wiꞌje.

20 Ma naj wanmiye woclen yasoꞌne; ex biꞌx ma baj wipune. Ma chin jyone tiꞌj jun kꞌukbal ncꞌuꞌje tuꞌn ttzaj kꞌakꞌan tcꞌuꞌj wiꞌje, ex mintiꞌ ma cnet wuꞌne.

21 Ocx cykꞌoꞌn jun cꞌul nim tcꞌayil tuj nwaye, ex tej ttzaj txket tiꞌj ncꞌuꞌje tzaj cykꞌoꞌn vinagr te ncꞌaye.

22 Aju nintz waꞌn nnoꞌc cyuꞌn cyucꞌil cyamiw, tzꞌocwit te jun cꞌobil cye.

23 tzꞌocxwit sjumj tiꞌj cywitz tuꞌn miꞌn tbant cyqueꞌyin, ex cucxwit tzaj luꞌlun cykan.

24 Tzajxwit nim tkꞌoja cyiꞌj, ex tzajxwit ttxꞌuꞌjila cyiꞌj.

25 Tzꞌocwit cynajbil mintiꞌ xjal cyuj ex mi jun xjal ten cyuj cyja xbalun;

26 porque in che yajlan tiꞌj ju ma yajlanjtz tuꞌna, ex in che xmayin tiꞌj ju ma cꞌixbisanjtz tuꞌna, tuꞌnju at nim taꞌw in tzaj tiꞌj.

27 Kꞌonxa mya baꞌn cyibaj te t-xel ju mya baꞌn ma cybincha, ex miꞌn cub tnajsaꞌna cyil.

28 Kꞌiꞌn jatza cybi tuj tuꞌjil chwinklal, ex miꞌn cuꞌx tkꞌoꞌna cybi jatum tzꞌiban cybi ke tzꞌaklxix.

29 Atzun weye yab kine ex atine tuj yajbil, chin twaban jawe Nman Dios, ex chin tcloma.

30 Cxel nbitzane tbi Dios, cxel nkꞌoꞌne chjonte te ex cjawil nnimsaꞌne tuꞌn akꞌbil chjonte,

31 porque mas jacu tzalaj Kman tiꞌj jlu twitzju tuꞌn t-xi kꞌot jun tor te chojbil, ex ka jun tal wacẍ at tcach ex at t-xpacꞌil tkan.

32 Che jawil tzalaj ke xjal ateꞌ tuj bis oc cyqueꞌyinte oc tbant jlu. Keꞌ cycꞌuꞌje tiꞌj Dios, akeye in che jyone onbil tucꞌil,

33 porque in che tzaj tbiꞌn Kman ke xjal meba, ex mintiꞌ in che el ticꞌun ke xjal etzan tuꞌn ateꞌcx tuj pres.

34 Aju cyaꞌj ex txꞌotxꞌ tucꞌix mar, baꞌn tuꞌn t-xi cykꞌoꞌn chjonte te Kman, cyucꞌix cycyakil keju najl cyuj,

35 porque ccletel ju tnam Sión tuꞌn Dios ex cjawil tbinchaꞌn juntl maj ke tnam tuj txꞌotxꞌ Judá.

36 Atzun che najal xjal ex che oquel te tajwil. Ake cycꞌwaꞌl ke tmajen Dios che oquel te tajwil ju tnam ex keju in che tzalaj tiꞌj tbi Dios ax che najal tuj.