2 che bitzane tuꞌn tjaw cynimsaꞌne tbi tbanilxix; cykꞌonxe chjonte te ex cynimsaꞌn jawe tbi.

3 Cymanxe te Dios cyjaꞌ: Maꞌxix cyxilen ke tbinchbena. Nok tuꞌn tipumala maꞌxix che bel tzꞌak twitza ke aj kꞌoj tiꞌja.

4 Cycyakil xjal che bel ẍmejeꞌ cꞌulul twitza, ex che bitzal tuꞌn tjaw nimsaꞌn tbiya.

5 Cytzaje queꞌyilte aju takꞌunben Dios, akeju binchben maꞌxix cyxilen o tbincha cyiꞌj ke xjal:

6 Aj tzkij mar tuꞌn, ax icx e jicꞌx ke kxeꞌchel tuj nima Jordán tuꞌn cykan; ko tzalajxix tiꞌj Dios.

7 In cawin te jumajx tucꞌil tipumal; toc tcwent cyiꞌj ke nasyon tuꞌntzun miꞌn tjaw cyiꞌn cyib cyiꞌj keju miban che bin.

8 Cycyakile akeye txkantl nasyon cykꞌonxe chjonte te Kdiose, che bitzane tuꞌn tjaw nimset tbi.

9 Porque nok tuꞌn cucx itzꞌx koꞌ; ex tuꞌn mintiꞌ ma ko jaw tzꞌak.

10 Kman Dios, ma ko oc tkꞌoꞌna tuj malbil, ma ko baj t-saksaꞌna ic tzaꞌn sak pwak.

11 Ma ko tzyete tuꞌna tuj cꞌobil; ex ma cub tkꞌoꞌna jun iktz alxix kibaje.

12 Xi tkꞌoꞌna ambil tuꞌn tcub kiꞌje cyuꞌn aj kꞌoj; mer ic tzaꞌn ma ko icꞌe tuj aꞌ ex tuj kꞌakꞌ, pero te bajsbil ul tiꞌna koꞌye tuj jun lugar tbanilxix.

13 Oc chin oquexe tuj tjaya ex che bel npatune ke oyaj twitza; cyjaꞌtzun cjapunel wuꞌne aju yol o txi ntziyane,

14 aju yol xi ntziyane teya tej atintoke tuj xobajil.

15 Che bel npatune tibaj t-altara ke alumaj ulni cynabl; ex che xel nkꞌoꞌne teya ke tor ex ke tman chip tucꞌix t-sibel ẍneꞌl.

16 Cytzaje cycyakile akeye in che xob twitz Dios. Cybintze, cxel nmaꞌne cyeye aju ma tbincha weye.

17 Jaw tkꞌajkꞌajel nwiꞌye tuꞌn ncubsane twitz, ex jaw nnimsaꞌne tbi.

18 Nokwit at nximbetze mya baꞌn, mintiꞌwtlo ma chin tzaj biꞌne tuꞌn Kman;

19 pero ma chinx biꞌne tuꞌn ex ma tzaj tbiꞌn nnaꞌj Diose.

20 Nimanxwit te Dios, mintiꞌ ma tzꞌel ticꞌun nnaꞌj Diose ex mintiꞌ ma cub t-xcꞌaꞌyin tcꞌujlalil weye.