2 porque in tbiꞌna aju knaꞌj Diose.

Cycyakil xjal in che ul tucꞌila.

3 In cub kiꞌje tuꞌnju kbinchbene mya baꞌn, pero in cub tnajsaꞌna kile.

4 At nim tzalajbil teju xjal in jaw t-scꞌoꞌna ex in pon tiꞌna tucꞌila tuꞌn tten nikayin ttxlaja, ex tuꞌn tten tuj tjaya. Ko tzalajele tuꞌn tcyakilju baꞌn at tuj tjaya, aju tjaya xjan.

5 Kman Dios aju clol keye, in ko tzaj ttzakꞌweꞌna tuꞌnju tbinchbena maꞌxix t-xilen ex tzꞌaklxix; cycyakil xjal twitz txꞌotxꞌ in keꞌ cycꞌuꞌj tiꞌja, ax icx keju najl jlajxi mar.

6 Tuꞌn tipumala tzyuꞌn ke nmak witz tuꞌn mi cyyucch.

7 Tuꞌna in kꞌajen tkꞌajkꞌajel mar oc ttzaj pulin, ex tuꞌna in che mayet ke xjal oc cyjaw tilj tiꞌj jun yol;

8 ax icx ke xjal najl tuj txꞌotxꞌ najchak in tzaj tchi cyiꞌj tuꞌnju tbinchbena maꞌxix t-xilen; in che schꞌin xjal tuꞌn tzalajbil tiꞌja tuj jun pacꞌ ttxaꞌn txꞌotxꞌ ax icx tuj juntl pacꞌ.

9 Cwentin ju txꞌotxꞌ tuꞌna, ex in tzaj tkꞌoꞌna jbal tibaj tuꞌntzun mejor ttzaj chꞌiy awal tuj; tuꞌna in che chꞌiy ke tkꞌab xak tuꞌntzun tchꞌiy twitz awal. Cyjaꞌtzun tten in baj tbinchaꞌna ju txꞌotxꞌ.

10 Tuꞌna in baj taꞌlina aju txꞌotxꞌ chꞌoquimaj, ex tuꞌna in noj cyxol ke surc tuꞌn aꞌ; tuꞌn jbal in tzaj tkꞌoꞌna in kꞌuynix txꞌotxꞌ ex in cub tcyꞌiwlaꞌna tuꞌntzun ttzaj tkꞌoꞌn twitz awal.

11 In tzaj tkꞌoꞌna t-xtalbila tuj enter abkꞌi, ex nok jatum in beta, atzun in chmet nim twitz awal.

12 Ma chꞌiy nim chaꞌx cꞌul tuj tzkij txꞌotxꞌ ex puro mejor in che cyaj ke witz, mer ic tzaꞌn otok tzꞌoc jun cyxbalun acꞌaj.

13 In noj tuj chkꞌajlaj cyuꞌn alumaj, ke txꞌotxꞌ ttzi aꞌ nojni twitz tuꞌn triw; cycyakil in che bitzan ex in che schꞌin tuꞌn tzalajbil.