2 Chin tewanxa cywitz ke xjal in baj cyximan mya baꞌn wiꞌje tuj ewaj; chin tcloma tuj cyximbetz ke xjal mya baꞌn,

3 akeju ic tten cyakꞌ ic tzaꞌn spad banin ttziꞌ wen, ex ke cyyol in che cꞌixbi xjal cyuꞌn mer ic tzaꞌn plech in tzaj xoꞌn cyiꞌj xjal.

4 Max tuj cyewbil in tzaj cytzokpiꞌn ke cyplech cyiꞌj keju mintiꞌ cyil; nok minaben in tzaj cytzokpiꞌn ex mintiꞌ in tzaj t-xobil cyiꞌj.

5 In cynimarin cyib cyxolx tuꞌn cybinchante mya baꞌn; in baj cyximan tuꞌn tcub cykꞌoꞌn ke cꞌobil tuj ewaj, ex in cub cyximan ka mi aꞌl jun in queꞌyinte cye,

6 ex ka mi aꞌl jun jacu baj tqueꞌyin ju cybinchben mya baꞌn.

Pero aju nneꞌl tnicꞌ cyiꞌj ke t-ximbetz xjal tujxi tanmi, cbajel tqueꞌyin tcyakil jlu.

7 Oc che cꞌixbisetel tuꞌn Dios cyuꞌn ke plech, ex nok minaben che oquel cꞌixbisaꞌn;

8 oc che bel tzꞌak tuj cyex cyyol, ex keju che queꞌyilte cye che oquel ten xmayil cyiꞌj.

9 Cycyakiltzun xjal che xel kꞌonte nimbil te Dios ex che oquel ten yolil tiꞌj takꞌunben; ex cꞌelel cynicꞌ tiꞌj aju o tbincha.

10 Ke xjal tzꞌaklxix che tzalajel tiꞌj Kman ex ckebel cycꞌuꞌj tiꞌj, ex cycyakil xjal tzꞌaklxix oc che tzalajel.