2 Chin tcloma tuj cykꞌab xjal binchal mya baꞌn, chin tcloma tuj cykꞌab ke byol xjal,

3 porque at ke xjal nimxix cyipumal nok in che ayon tiꞌj tuꞌn ncub cybyoꞌn.

4 Nman, bajx jaw wiꞌn wibe cyiꞌj ex bajx chin binchane il; mintiꞌ o bant jun mya baꞌn wuꞌne cyiꞌj, ex masque icju, pero nnoꞌc tilil cyuꞌn tuꞌn cyoc tzokpaj wiꞌje. Kꞌiꞌmel twatla. Tzaja onil weye ex queꞌyinxa aju in bant cyuꞌn.

5 Aya Nman Dios aju Dios Tajaw Tcyakil, aju Dios cye aj Israel, kꞌiꞌmel twatla, ex kꞌon cuba cycastiw ke xjal mya ocslal ke tiꞌja; miꞌn tzaj tzꞌeꞌy tcꞌuꞌja cyiꞌj ke binchal mya baꞌn, akeju in che oc meltzꞌaj wiꞌje.

6 Konicꞌan in che ajtz meltzꞌaj, in che kawin ic tzaꞌn ke txꞌyan, ex nok in che betjeꞌ tuj tnam.

7 Nim in che yasun ex in che xobtzan, aju cytziꞌ mer ic tzaꞌn spad in che naj xjal tuꞌn, ex in cymaꞌn: Mi aꞌl jun in bin kiꞌj, che chi.

8 Atzun teya Nman in tzeꞌna cyiꞌj; in xmayina cyiꞌj keju mya ocslal ke tiꞌja.

9 Tucꞌila in nclon wibe Nman Dios, porque aya kꞌolte wipumale ex aya colol wiꞌje.

10 Aju Dios in cꞌujlante weye tzul onil weye; cwilaꞌye oc tcub cyiꞌj ke aj kꞌoj wiꞌje tuꞌn.

11 Miꞌn che cub tbyoꞌn naja ke, tuꞌntzun miꞌn ticꞌ tnaꞌnjtz cyuꞌn ke ntanmile; sputun baja ke tuꞌn tipumala, ex che najxwit tuꞌna. Aya Nman colol kiꞌje.

12 In che binchan il tiꞌj tcyakilju in cymaꞌn; che tpresin ocxa ke tuꞌnju cynimbil cyib ex tuꞌnju yol in baj cyjuramentin mya ax toc.

13 Byoꞌn cuba ke tuꞌn tkꞌoja, byoꞌn cuba ke tuꞌn miꞌn cucx cyankꞌin; tuꞌntzun tel cynicꞌ xjal tiꞌj ka ate Dios in cawin cyibaj aj Israel ex tuj tcyakil twitz txꞌotxꞌ.

14 Oc cyajtz meltzꞌaj te konicꞌan in che kawin ic tzaꞌn ke txꞌyan, ex in che betjeꞌ tuj tnam,

15 in che betjeꞌ, in che jyon cywa, in che jaw xoꞌjin tuꞌnju mintiꞌxix in noj cycꞌuꞌj.

16 Atzun weye, chin bitzale teya te prim; chin bitzale tiꞌj tcꞌujlalila ex tipumala, tuꞌnju aya jun colbil weye ex tucꞌila in pon nclon wibe oc ntene tuj yajbil weye.

17 Teya che xel nbitzane ke bitz, Nman Dios, porque aya kꞌol wipumale ex aya colbil weye; aya Dios aju in cꞌujlante weye.