Tnaꞌj Dios David te kanbil onbil te Dios
Aju bitz lu cub ttzꞌiban David tej tkꞌojin tucꞌil Aram-Naharaim ex tucꞌil Aram te tnam Soba, ex ajtz meltzꞌaj Joab ex e cub tbyoꞌn cablaj mil xjal te tnam Edom tuj chkꞌajlaj Atzꞌan tbi.
60
Nman Dios, tuꞌn tkꞌoja ma ko cyaj tcolina, ma cub kiꞌje tuꞌna; kꞌontza kipune juntl maj.2 O tzaj luꞌlun txꞌotxꞌ tuꞌna ex o tzꞌel cꞌabchaj; jpun oca juntl maj ke tpaꞌxil, porque niban tbaj xitj.
3 Aju tnam etzan tuꞌna ma tzꞌoc tkꞌoꞌna tuj malbil cyuwxix, mer ic tzaꞌn vin ma tzaj tkꞌoꞌna keye ex ma ko pichꞌjeye tuꞌn;
4 jaꞌlo kꞌonxa jun techal cye keju in che niman teya, tuꞌntzun cycolpaj cye ke plech in che tzaj xoꞌn.
5 Ko ttzakꞌwentza, ex ko tcloma tuꞌn tipumala. Colina cyiꞌj keju in che tcꞌujlaꞌna.
6 O tzaj tmaꞌn Dios tuj tja xjan cyjaꞌ: Tucꞌil tzalajbil cbajel npaꞌne tuj piẍun aju txꞌotxꞌ Siquem, ex cbajel npaꞌne ju chkꞌajlaj Sucot.
7 Aju txꞌotxꞌ Galaad ex ju txꞌotxꞌ Manasés weye ke; ate Efraín ic tten te weye ic tzaꞌn jun pasbil cꞌuxbil tjax tuj nwiꞌye; ate Judá ic tten te weye ic tzaꞌn nvare tuꞌn ncawine;
8 ate Moab ic tten te weye ic tzaꞌn jun palangán jatum tuꞌn tel ntxꞌjoꞌne nkꞌabe; ex tibaj ju txꞌotxꞌ Edom cxel nxoꞌne nxajbiye te jun techal ka otok tzꞌoc te weye; chin jawil schꞌine tuꞌnju otok chin cambane cyiꞌj aj Filistey.
9 ¿Alcye cxel kꞌinte weye tuj tnam toc muro tiꞌj? ¿Alcye cxel ẍaklunte weye tuꞌn npone max tuj Edom?
10 Nman Dios, ma ko el ticꞌuna; mintiꞌtl nneꞌtza cyucꞌil ke ksoldadiye.
11 Ko tonintza tuꞌn tcub cyiꞌj ke aj kꞌoj kiꞌje, porque mintiꞌx tajben aju onbil cyuꞌn xjal.
12 Nok tuꞌnju onbil tuꞌn Dios oc ko cambal; ex tuꞌn cbel cyiꞌj ke aj kꞌoj kuꞌn.