2 Mintiꞌ, oꞌcx in che ximane tiꞌj tuꞌn tbant mya baꞌn cyuꞌne; ex in cub cykꞌoꞌne cysentens xjal cyuwxix wen.

3 Ke xjal mya baꞌn, atxix tuj talbil cytxuꞌ biꞌx in che el txalpuj; ax icx ke nicꞌal yol in che el tzpet biꞌx oc cyul itzꞌj.

4 At cyvenen ic tzaꞌn cyvenen lobaj; ic cyten ic tzaꞌn kꞌantiꞌ nnoꞌc tkꞌon tib te chcyin, nnoꞌc tmaksiꞌn tuj t-ẍcyin

5 tuꞌntzun miꞌn tbinte aju tkꞌajkꞌajel chnab tuꞌn aj nabl, aju at nim tnabl tuꞌn t-xmoxin cyiꞌj lobaj.

6 Nman Dios, buchin etza ke twitz cyeꞌ. Nman, paꞌn etza twitz cyeꞌ ke xjal lu; ic cyten ic tzaꞌn ke balun.

7 E cycub naj ic tzaꞌn in cub tzkij aꞌ nneꞌl kojl; e cytzkij ic tzaꞌn cꞌul at ttzi be.

8 E cycub ulj ic tzaꞌn ju sjokꞌtxaꞌn nneꞌl ulj tujx taꞌl ttziꞌ, ex e cyoc ic tzaꞌn jun cꞌwaꞌl nnuꞌl itzꞌj naꞌnx tpon tkꞌij tuꞌn tul itzꞌj.

9 Naꞌnxtok cynaꞌnte, jurat naj che jawil txꞌemin ic tzaꞌn cꞌul, ex che xel kꞌiꞌn tuꞌn ttxꞌuꞌjil Dios ic tzaꞌn in xi kꞌiꞌn jun tiꞌxti tuꞌn xcyakinpaẍ.

10 Aju xjal tzꞌaklxix ctzalajel oc toc tqueꞌyin otok xelin cyiꞌj; cnojel tiꞌj tkan tuꞌn cychcꞌel ke xjal mya baꞌn otok che cyim tuj kꞌoj.

11 Octzun cymaꞌ xjal: Ax toc at jun tbanil chojbil cye ke xjal tzꞌaklxix. Ax toc at jun Dios in cub kꞌonte cycastiw xjal.