Kꞌukl ncꞌuꞌje tiꞌj Dios ex in jaw nnimsaꞌne tyol
Bitz tuꞌn David tej ttzyet cyuꞌn aj Filistey tuj tnam Gat
56
Kꞌakꞌantz tcꞌuꞌja wiꞌje Nman Dios porque lepchoꞌc ke xjal wiꞌje tuꞌn ncub cybyoꞌn. Ex tcyakil kꞌij in che oc tzokpaj wiꞌje ex in chin baj yajlaꞌne cyuꞌn.2 Tcyakil kꞌij lepchoꞌc ke aj kꞌoj wiꞌje tuꞌn ncub cybyoꞌn; nimcu cybaj keju in che oc tzokpaj wiꞌje tucꞌil cynimbil cyib.
3 Ka ma tzaj nxobile, nnoꞌc keꞌ ncꞌuꞌje tiꞌja.
4 Kꞌukl ncꞌuꞌje tiꞌj Dios ex in jaw nnimsaꞌne tyol; kꞌukl ncꞌuꞌje tiꞌj Dios ex mintiꞌ in chin xobe. ¿Ti jacu tbincha xjal wiꞌje?
5 Tcyakil kꞌij in chin yajlanjtze cyuꞌn tuꞌn yol; oꞌcx in che ximan tiꞌj tuꞌn cybinchante mya baꞌn wiꞌje.
6 Nok jachak in xi cyewan cyib tuꞌn ntzyete cyuꞌn, in che queꞌyin wiꞌje jatum in chin bete, in che ayon wiꞌje tuꞌn ncub cybyoꞌn.
7 Kꞌon cuba cycastiw tiꞌj cybinchben mya baꞌn. Nman Dios, xitun cuba ke tnam tuꞌn tkꞌoja.
8 Kꞌiꞌn tajlal tuꞌna jteꞌ majxi chin el oke; in jaw tiꞌna teyle junjun txut taꞌl nwitze. ¿Myapetzun tzꞌiban ke jlu tuꞌna tuj uꞌj at tucꞌila?
9 Che elel ok ke aj kꞌoj wiꞌje oc t-xi nkanine onbil te Dios. Baꞌn wuꞌne at Dios wucꞌile te onil weye.
10 Kꞌukl ncꞌuꞌje tiꞌj Dios ex in jaw nnimsaꞌne tyol; kꞌukl ncꞌuꞌje tiꞌj Kman ex in jaw nnimsaꞌne tyol.
11 Kꞌukl ncꞌuꞌje tiꞌj Dios ex mintiꞌ in chin xobe. ¿Ti jacu tbincha xjal wiꞌje?
12 Aju yol xi ntziyane teya Nman Dios, cjapunel wuꞌne tucꞌil akꞌbil chjonte teya,
13 tuꞌnju ma chin clete tuꞌna te camic, ma chin clete tuꞌna tuꞌn miꞌn ncub tzꞌake, tuꞌntzun nbete twitza tuj spicꞌun cyxol ke xjal itzꞌ.