2 Chin tbintza ex chin ttzakꞌwentza; ma baj ncꞌuꞌje tuꞌnju bis in tzaj wiꞌje.

3 In chin jaw luꞌlune tuꞌn tkꞌajkꞌajel cywiꞌ aj kꞌoj wiꞌje ex tuꞌnju yajbil weye cyuꞌn ke xjal mya baꞌn. Cyuꞌn ma tzaj yajbil wiꞌje; in che oc tzokpaj wiꞌje tucꞌil cytxꞌuꞌjil.

4 In putin wanmiye ttzi nxuꞌque; ma tzaj t-xobil camic wiꞌje.

5 Ma tzaj nimxix t-xobil wiꞌje; in chin luꞌlune tuꞌn nxobile.

6 Ex in nmaꞌne cyjaꞌ: Nokwit at nxicꞌe ic tzaꞌn jun paloma, jaculo chin el putine ex jaculo chin ojlane.

7 Jaculo chinx oke najchak wen; jaculo chin cyaj tene najal tuj lugar mintiꞌ cynajbil xjal tuj.

8 Juratlo jacu chinxe clol wibe oc ttzaj xobajil tuꞌn cykꞌikꞌ jbal.

9 Xitun cuba ke Nman, tzpet-san baja cyyol, porque oꞌcx in wile cꞌixbisabl ex icꞌbil tuj tnam,

10 kꞌijtl ex konicꞌan txolin cyten tiꞌjele tnam. Oꞌcx mya baꞌn ex yajbil at tuj;

11 nojni ke cay cyuꞌn ke xjal cꞌixbisal ex sbul.

12 Nokwit jun aj kꞌoj ma binchante mya baꞌn wiꞌje, mawtlo tzicꞌx wuꞌne; ex nokwit jaw tiꞌn tib wiꞌje aju nneꞌl icꞌunte weye, mawtlo tzꞌel wewan wibe twitz.

13 Pero aju ma jaw tiꞌn tib wiꞌje, acuya aju wucꞌile ex mejorxix wamiwoye,

14 tucꞌila oc njunin wibe tuj tja Dios tuꞌntzun kyolin kamiwxix kib, ex tucꞌila o chin bete cyxol nimcu xjal.

15 Cuchiwt minaben che cyim ke aj kꞌoj wiꞌje. Itzꞌxwit ke oc cycuꞌpun tuj cynajbil cyimni, porque oꞌcx mya baꞌn at tuj cyanmi.

16 Atzun weye oc chin cubsale twitz Kman Dios; ate cclolte weye.

17 Te prim, te kale ex te konicꞌan, chin jawil ayayane ex chin jawil okꞌe, ex ctzajel tbiꞌn tkꞌajkꞌajel nwiꞌye,

18 chin cletele tuꞌn oc toc kꞌoj wiꞌje; masque at nim aj kꞌoj wiꞌje chin cletele tuꞌn.

19 Ate Dios aju in cawin te jumajx, chin tzajel biꞌne tuꞌn ex cbel cyiꞌj ke aj kꞌoj wiꞌje tuꞌn, porque mintiꞌ in baj cychꞌexpuꞌn cymod, ex mintiꞌ in che xob twitz Dios.

20 In jaw cyiꞌn cyib cyiꞌj ke cyamiw; mintiꞌ in japun cyuꞌn aju yol in xi cytziyan te cymojbabl cyib.

21 Tbanilxix cybinx ke yol in che ajben cyuꞌn, atzunju cyximbetz oꞌcx cyaj tuꞌn cykꞌojin. Tbanilxix cybinx ke yol in che ajben cyuꞌn, pero ic cyten ic tzaꞌn spad banin ttziꞌ.

22 Kꞌoncja ke tbisa tuj tkꞌab Kman, ate ctzajel kꞌonte tipuna tuꞌn ticꞌx tuꞌna, mlayx takꞌ ambil tuꞌn tcub tzꞌak aju xjal baꞌn niman te.

23 Nman Dios, tuꞌna che pol tzꞌak ke byol xjal ex ke nicꞌal yol max t-xeꞌpun cynajbil cyimni, mlay takꞌa ambil cye tuꞌn cyankꞌin nim kꞌij. Atzun weye kꞌukl ncꞌuꞌje tiꞌja.