2 Txꞌjoꞌmela tcyakil nbinchbene mya baꞌn. Chin t-saksama tuj wile.

3 Baꞌn wuꞌne ma chin binchane il ex cucx in tzaj nnaꞌne wile.

4 Ma nbinchaye il tiꞌja, ex oꞌcx tiꞌja ma nbinchaye; twitza ma nbinchaye mya baꞌn. Aju nsentense cub tkꞌoꞌna tuj tumelxix, ex mintiꞌ tila tiꞌj.

5 Ax toc atxix tej wul itzꞌje mya baꞌn kine: aj il kine tej atinxtoke tuj talbil ntxuꞌye.

6 Ax toc in tzalaja tiꞌj jun xjal mintiꞌ sbubl tuj tanmi, ma noj tuj nnable tuꞌna tuꞌn ojtzkibl.

7 Chtoꞌnca chicꞌ wiꞌje tuꞌn t-xak tzeꞌ hisopo tbi, tuꞌntzun ntxꞌjete tuj wile; chin ttxꞌjoma ex cyjel sakix tuj wanmiye ic tzaꞌn ttxa cheꞌw puro sak.

8 Nojsama wanmiye tuꞌn tzalajbil; masque ma chin baj tcꞌixbisaꞌna, pero kꞌontza juntl maj tzalajbil weye.

9 Miꞌn tzꞌoc tkꞌoꞌna twitza tiꞌj wile, najsama tcyakil mya baꞌn ma nbinchaye.

10 Nman Dios, binchama wanmiye tuꞌn toc sakxix, binchama wanmiye tuꞌn toc acꞌaj ex tuꞌn toc tzꞌaklxix.

11 Miꞌn chin el tlakꞌbaꞌna twitza, ex miꞌn tzꞌel tiꞌna T-xewa Xjan wiꞌje.

12 Kꞌontza juntl maj tzalajbil weye tiꞌj ju colbil tuꞌna; ex binchama wanmiye tuꞌntzun nbinchanteya aju tajbila,

13 tuꞌntzun t-xi nxnakꞌtzaꞌne cye keju miban che niman alcye taja tuꞌn cybinchante, ex tuꞌn cyajtz meltzꞌaj ke aj il tucꞌila.

14 Nman Dios, chin tcloma tiꞌj tcublen jun xjal wuꞌne, porque aya Dios clol weye, ex cxel nmaꞌne tuj nbitze ka aya tzꞌaklxix.

15 Nman, onintza kine tuꞌntzun nbitzane ke bitz te akꞌbil chjonte teya.

16 Mintiꞌ taja tiꞌj oyaj ex tiꞌj chojbil in cub patit; jacu txi nkꞌoꞌne teya, pero ake jlu mintiꞌ in tzalaja cyiꞌj.

17 Aju chojbil in tkanin Dios, atzun tuꞌn ttzaj tbis xjal tuꞌn tlaj il otok tbincha. Nman Dios, ka ma tzꞌajtz tiꞌj tanmi jun xjal ex ka ma tzaj tbis tiꞌj, mlay tzꞌel ticꞌuna.

18 Binchama baꞌn te tnam Sión nok tuꞌnju t-xtalbila, ex tuꞌn tjaw tbinchaꞌna juntl maj ke muro tiꞌj tnam Jerusalén.

19 Ictzun ctzalajela cyiꞌj ke chojbil in tmaꞌn ley, akeju alumaj ex ke oyaj in che cub patit tibaj altar; ke tor che bel patun tibaj altar te jun chojbil teya.