Ate Dios jwes tzꞌaklxix
Bitz tuꞌn Asaf
50
In yolin Kman Dios aju maꞌ toclen cywitz keju nnoꞌc cydiosin xjal, in txocon cyiꞌj ke xjal najl ke twitz txꞌotxꞌ tzajnix tuj tjawitz kꞌij ex tuꞌn tpon baj tuj telex kꞌij.2 In koptzꞌaj Kman Dios max tuj tnam Sión, aju tnam tbanilxix.
3 Tzul Kman Dios, ex mya tuj ewaj tzul; tcubsaꞌn jun kꞌakꞌ twitz in tzꞌeꞌy nimcu tuꞌn; ex tiꞌjele in jumin jun nintz cykꞌikꞌ cyuwxix wen.
4 In txocon Dios tiꞌj cyaꞌj ex tiꞌj txꞌotxꞌ tuꞌntzun tcub cycastiw ke xjal etzan tuꞌn, ex chi in tmaꞌn cyjaꞌ:
5 Cychmon oque ke xjal scꞌoꞌmaj ke wuꞌne, akeju o bant tiꞌj jun cyyol wucꞌile tej ttzaj cykꞌoꞌn jun chojbil weye, chi Dios.
6 Ate cyaꞌj ckꞌmalte tzꞌaklxixte Dios, porque axte cxel binchante cyiꞌj xjal.
7 Cybintze akeye aj Israel, akeye jun tnam etzan wuꞌne; cxel nchicꞌbaꞌne cyeye aju mya baꞌn in cybinchaꞌne. Akine Dios, akine Cydiose.
8 Mlay che oc nmayoꞌne cyiꞌj ke chojbil ex ke oyaj patun in che cub, akeju cucx ttzaj cykꞌoꞌne weye.
9 Mintiꞌ in xi nkanine cyeye jun tal tor cyiꞌj ke cywacẍe, ex mi jun tman chip cyxol keju ateꞌ tuj cypeꞌne,
10 porque weye cycyakil ke txcup ateꞌ tjakꞌ cꞌul, ax icx ke alumaj nim cyajlal ateꞌ tuj tiwitz txꞌotxꞌ;
11 ax icx weye ke chyuꞌj ateꞌ tjakꞌ chcꞌul, cyucꞌix cycyakil keju in che yucch tuj cojbil.
12 Nokwit in tzaj el ncꞌuꞌje, mlaywitlo txi nmaꞌne teya, porque weye tcyakil twitz txꞌotxꞌ tucꞌix tcyakilju at twitz.
13 ¿Baka in chin waꞌne tiꞌj cychibjal ke tor, ex baka in xi ncꞌane cychcꞌel tman chip?
14 Aju akꞌbil chjonte tuꞌna awt tzꞌajben te jun toyaja te Dios; japunx tuꞌna aju yol in xi ttziyana te Dios aju maꞌxix toclen.
15 Bix chin ttxoca oc ttena tuj yajbil, jacu cleta wuꞌne ex atzun teya oc chin cjawil tnimsaꞌna.
16 Atzun teju xjal mya baꞌn in tmaꞌn Dios cyjaꞌ: ¿Ti toclena tiꞌj tuꞌn tyolina cyiꞌj ke nleye ex tuꞌn tyolina tiꞌj ju yol cyaj bant tiꞌj wuꞌne,
17 ex mintiꞌ in tzalaja tiꞌj tuꞌn t-xi ncawina ex mintiꞌ in xi tbiꞌna nyole?
18 In tcꞌmoꞌna aju elekꞌ tucꞌil tzalajbil; nnoꞌc tjunin tiba cyucꞌil ke xjal aj pajil.
19 Mintiꞌ in tjacꞌun tiba tuꞌn tyolina yol mya baꞌn ex in ximana tiꞌj tuꞌn t-sbuna.
20 In yolina mya baꞌn tiꞌj termaniya; tiꞌj ju tecuya terman in jaw tnicꞌana yol.
21 Tcyakil jlu o tbinchaya ex mintiꞌ o chin kꞌajte tiꞌj; cub t-ximana ka icx kine ic tzaꞌn teya. Pero twitzcuya cbel nchicꞌbaꞌne ke tbinchbena mya baꞌn, chi Dios.
22 Tzꞌelx cynicꞌe tiꞌj jlu akeye nnicꞌ tnaꞌnjtz Dios cyuꞌn, mya yajcu che baj npaẍuꞌne ex mi aꞌl jun jacu colin cyiꞌje:
23 Aju in tzaj kꞌonte jun akꞌbil chjonte weye, in chin jaw tnimsaꞌn. In clet wuꞌne aju xjal in bet tuj tumelxix, chi Dios.