2 tzaꞌnx ke kꞌinun icx ke meba, ex tzaꞌnx keju maꞌ cyoclen icx keju chꞌin cyoclen.

3 Chin yolile tiꞌj jun yol at tnabl, cxel nchicꞌbaꞌne aju ximbetz maꞌ t-xilen:

4 cꞌoquel nkꞌoꞌne nwiꞌye cyiꞌj ke yol in cykꞌoꞌn xnakꞌtzbil, ex cxel nchicꞌbaꞌne aju yol cwest tuꞌn tel cynicꞌ xjal tiꞌj, oc toc nkꞌajtzaꞌne chnab arpa.

5 ¿Tikuꞌn chin xobile oc tul canun tkꞌijlalil mya baꞌn, oc tbaj txolin wiꞌje cyuꞌn aj kꞌoj wiꞌje?,

6 akeju nnoꞌc keꞌ cycꞌuꞌj tiꞌj cykꞌinumabl ex in jaw cyniman cyib tuꞌnju nim at cye.

7 Pero mi jun xjal jacu bant tclonte jun tucꞌil ex mlay bant t-xi tchjoꞌn te Dios tuꞌn tclet.

8 Masque at nim tpwak, pero mlay lakꞌet tchwinklal tucꞌil tuꞌn,

9 tuꞌn tankꞌin te jumajx ex tuꞌn miꞌn tcyim.

10 Porque baꞌn kuꞌn cycyakil in che cyim, tzaꞌnx keju at cynabl icx keju mintiꞌ cynabl, ex aju cykꞌinumabl in cyaj ten te juntl.

11 Masque tzꞌoc cykꞌoꞌn tbi cytxꞌotxꞌ ic tzaꞌn cye cybi, pero atzun che tel cyxol ke cyimni te jumajx.

12 Masque at nim tkꞌinumabl jun xjal, pero mya tuꞌn jlu miꞌn cyim; icx cymel ic tzaꞌn in che cyim ke txcup.

13 Cyjaꞌtzun, che najel keju nnoꞌc keꞌ cycꞌuꞌj cyiꞌjx, cyucꞌix keju lepch ke cyiꞌj ex in che tzalaj tiꞌj cyyol.

14 A camic pastor cyiꞌj ke xjal lu, ex in cheꞌx ẍakluꞌn tuꞌn tuj cynajbil cyimni mer ic tzaꞌn ẍneꞌl. Oc ttzaj t-xe cyaꞌj cbel cyiꞌj cyuꞌn keju tzꞌaklxix, porque cyjaꞌ tbaj cyipun ex atzun che pol najal tuj cynajbil cyimni.

15 Pero ate Dios colol wiꞌje tuj tipumal camic, ex chin xel kꞌiꞌne tuꞌn, tuꞌn ntene tucꞌil.

16 Miꞌn tzaj tbisa ka at jun xjal ma tzꞌoc te kꞌinun ex mas baꞌn nnoꞌc queꞌyin tja tuꞌn tkꞌinumabl,

17 porque oc tcyim mi jun tiꞌxti cxel tiꞌn, ex mlay txi lpeꞌ tkꞌinumabl tiꞌj tuj cynajbil cyimni.

18 Masque nim in tzalaj acux itzꞌx tzalu twitz txꞌotxꞌ, ex masque in che yolin xjal baꞌn tiꞌj tuꞌnju at tkꞌinumabl,

19 pero cpol tkꞌijlalil tuꞌn tcyim, ex mlay tzꞌoc tqueꞌyin juntl maj t-spicꞌumal kꞌij.

20 Masque at nim tkꞌinumabl jun xjal, pero mya tuꞌn jlu miꞌn cyim; icx cymel ic tzaꞌn in che cyim ke txcup.