Bitz tiꞌj mejebleꞌn te rey
Bitz cyuꞌn ke tiyjil Coré
45
Tuj wanmiye in che jatz ke yol tbanilxix. Aju ntziꞌye ic tten ic tzaꞌn jun lapis in ajben tuꞌn jun xjal baꞌnxix tzꞌiban. Cxel nbitzane jun nbitze twitz ju rey.2 Oꞌcxcu aya tbanilxix cyxol cycyakil xinak. Tbanilxix cycyakil ke yol in tmaꞌna. Cyjaꞌtzun te jumajx ma cub cyꞌiwlaꞌna tuꞌn Dios.
3 Kꞌonca t-spadiya tcꞌuꞌja, aya cyuw tcꞌuꞌj tuj kꞌoj. Kꞌonc tajwalila in koptzꞌaj wen.
4 Tjaxa tuj carwaj te kꞌojbil ex txiꞌya tuꞌn tcambana, tzꞌoc tilil tuꞌna tuꞌn tcyuwsanjtz ju yol axix toc ex tuꞌn t-xi binchet cyiꞌj ke xjal mans ke. Tuꞌn tbankꞌaba che bantel ke binchben maꞌxix cyxilen.
5 Oc che bel tzꞌak ke tnam twitza oc tcub cyiꞌj tuꞌna, aya rey; ke tplecha puro tzꞌuꞌp cywiꞌ ex in cheꞌx xuyl tuj cyanmi ke aj kꞌoj tiꞌja.
6 Aya Dios, aju tcawbila cucx cyjel ten te jumajx tuj tcyakil tabkꞌiyil ex tuj tumelxix in cawina.
7 In tzalaja tiꞌj ju tzꞌaklxix ex nneꞌl ticꞌuna aju mya baꞌn. Cyjaꞌtzun ma jaw scꞌoꞌna tuꞌn Dios aju Tdiosa, ex mas ma tzalaja tuꞌn cywitz ke mastl tucꞌila.
8 Tcyakil t-xbaluna cꞌocꞌj tiꞌj tuꞌn perjum nneꞌl tiꞌj tzeꞌ mirra, ex tiꞌj tzeꞌ áloe ex tiꞌj tzeꞌ canela; ex in tzalaja tuꞌn tkꞌajkꞌajel cywi quitar cyuj tja rey loꞌtzin marfil twitz cycajonil te tujxi.
9 Cyxol ke xuꞌj at cyoclen ateꞌ ttxlaja, ateꞌ ke cymeꞌjel rey; ex tuj tbankꞌaba, atzun tcubsaꞌn aju t-xuꞌjila tocsaꞌn kꞌan pwak mas tbanil tiꞌj.
10 Bintza nmeꞌjel, kꞌonca cwent tiꞌj aju cxel nmaꞌne teya: Kꞌiꞌmela tiꞌj tcꞌuꞌja keju ateꞌ tuj tja tmana ex ke t-xjalila.
11 Ma pon tcꞌuꞌj rey tiꞌja tuꞌnju tbanilxix queꞌyina; nimana te, tuꞌnju atzun tajwila.
12 Ke xjal aj Tiro cyucꞌix ke xjal kꞌinun ateꞌ tuj tnam, ctzajel cykꞌoꞌn oyaj teya tuꞌn cycambante t-xtalbila.
13 Tbanilxix queꞌyin tmeꞌjel rey tocx tuj tja. Aju t-xbalun toc puro kꞌan pwak twitz.
14 Tucꞌil t-xbalun in koptzꞌaj wen cxel kꞌiꞌn twitz rey, ex cyucꞌix ke kꞌapoj akeju tucꞌil, che oquex tucꞌil.
15 In che ocx kꞌiꞌn tucꞌil nim tzalajbil; ex tucꞌil tzalajbil in che ocx tuj tja rey.
16 Ke tcyꞌajala, Tat Rey, che oquel te cawil ic tzaꞌn ke t-xeꞌchela, ex che oquel tkꞌoꞌna te cawil tuj tcyakil twitz txꞌotxꞌ.
17 Waje tuꞌn ttzaj naꞌna cyuꞌn cycyakil cꞌloj xjal che ul itzꞌj te tibajxi, cyjaꞌtzun cjawil nimsaꞌna cyuꞌn ke tnam tuj tcyakil tabkꞌiyil te jumajx.