2 tuꞌnx tkꞌaba e ex tlajoꞌna ke xjal mya ocslal tiꞌja, cub tkꞌoꞌna cycastiw ke nasyon, ex atzun e cub tkꞌoꞌna ke kxeꞌchele tuj cytxꞌotxꞌ.

3 Mya tuꞌn cyex cykꞌab ex mya tuꞌn cyex cyspad e camban; mya cyuꞌnx o tzyet aju txꞌotxꞌ. O tzyet tuꞌn tipumala ex tuꞌn tkꞌaba ex tuꞌn t-xtalbila cyibaj, porque cꞌujlaꞌn ke tuꞌna.

4 Aya nreye. Aya Ndiose. Tuꞌna o camban aju tnam etzan tuꞌna.

5 Nok tuꞌna o cub cyiꞌj ke aj kꞌoj kuꞌne, tuꞌn tipumala e cub tzꞌak twitz txꞌotxꞌ keju e oc tzokpaj kiꞌje.

6 Porque mlay tzꞌoc keꞌ ncꞌuꞌje tiꞌj xobl plech kꞌiꞌn wuꞌne, ex mlay chin cambane tuꞌnju nspadiye;

7 tuꞌna cub cyiꞌj ke aj kꞌoj kuꞌne, ex tuꞌna cub cychꞌixwi keju in che icꞌun kiꞌje.

8 Nok tiꞌja in ko tzalaje Kman Dios, ex cucx cjawil knimsaꞌne tbiya.

9 Pero ma ko el ticꞌuna; ex ma cub tkꞌoꞌna kchꞌixwiye. Ex mintiꞌtl in beta cyucꞌil ksoldadiye oc cyex tuj kꞌoj.

10 Tuꞌnju mintiꞌ ma tzꞌonina kucꞌile ma ko el oke cywitz ke aj kꞌoj kiꞌje; ex keju in che icꞌun kiꞌje in xi cyelkꞌaꞌn aju at keye, ex in xi cyiꞌn nok alcye cyaj.

11 Ma koꞌx tkꞌoꞌna tuj cykꞌab ic tzaꞌn jun ẍneꞌl in xi kꞌiꞌn tuꞌn tpon jatum tuꞌn tcub byoꞌn; ex ma ko baj t-sputuna cyxol ke xjal mya ocslal ke tiꞌja;

12 puro barat ma txi tcꞌaꞌyina ju tnam etzan tuꞌna, ex mintiꞌ jun ma tcambaya tiꞌj tuꞌnju ma txi tcꞌaꞌyina.

13 Tuꞌna ma tzaj kchꞌixwiye cywitz ke kvesine, ma ko oque te tzebl ex te xmaybil cyuꞌn keju txolin cyten kiꞌjele.

14 Tuꞌna in che xmayin kiꞌje ke xjal mya ocslal tiꞌja; ex oc koc queꞌyine cyuꞌn, in xi cyyucun cywiꞌ te xmaybil keye.

15 Tcyakil kꞌij in tzaj nchꞌixwiye; ex tuꞌn nchꞌixwiye xi wewan nwitze,

16 tuꞌn cyyol keju in che yasun ex in che ilin wiꞌje, ex tuꞌn cylaj ke aj kꞌoj ex keju cyaj tuꞌn t-xelin wiꞌje cyuꞌn.

17 Ma tzaj jlu kiꞌje mya tuꞌnju mawt tzicꞌ tnaꞌnjtza kuꞌne. Bajx ko el jolpaje tiꞌj ju yol o cyaj bant tiꞌj tuꞌna.

18 Mintiꞌ in cub kximane tuꞌn tcyaj kcoline, ex mintiꞌ ma che cyaj kkꞌoꞌne ke tbeya.

19 Atzun teya ma ko naje tuꞌna cyuj ke lugar tzkij txꞌotxꞌ mintiꞌ cynajbil xjal tuj. Ma ko cub tkꞌoꞌna tjakꞌ jun klolj xobajilxix.

20 Nokwit ma tzicꞌ tnaꞌnjtza kuꞌne, Dios, ex nokwit ma ko cꞌulune twitz junxitl dios,

21 mawtlo tila, porque nneꞌl tnicꞌa tiꞌj aju at tuj ewaj tuj tanmi xjal.

22 Pero nok tuꞌn tlaja cucx nneꞌljeꞌ kiꞌje tuꞌn kcub byoꞌne; in ko oc kꞌoꞌne ic tzaꞌn ke ẍneꞌl in che cub byet.

23 ¿Tikuꞌn nnicꞌ tana, Nman? Kꞌiꞌmel twatla, kꞌiꞌmel twatla. Miꞌn ko el ticꞌuna te jumajx.

24 ¿Tikuꞌn in xi tewan tiba? ¿Tikuꞌn ma tzicꞌ knaꞌnjtze tuꞌna? Nimxix in ko yajlanjtze ex atoꞌye tuj bis.

25 Ma baj kipune ex ma tzaj kbise ex lu kximlale palch twitz txꞌotxꞌ.

26 Weꞌctza, tzaja onil keye ex ko tcloma tuꞌn tcꞌujlalila maꞌxix.