2 In txket wanmiye tiꞌj Dios, aju Dios itzꞌ. ¿Jtoj baꞌn npone tuꞌn toc nqueꞌyine twitz?

3 In chin okꞌe kꞌijl ex konicꞌan ex mintiꞌ in chin waꞌne; atzun ke xjal in cymaꞌn weye tcyakil kꞌij: ¿Jatum taꞌ Tdiosa?

4 Tcyakil jlu in tzaj nnaꞌne ex in chin bisune tuj wanmiye. In tzaj nnaꞌne tej nbete cyxol nim xjal cyjaꞌ cyxiꞌ tuꞌn cypon tuj tja Dios ex nejni kine cywitz, in jaw tkꞌajkꞌajel cywiꞌ tuꞌn tzalajbil ex in che bitzan in che icꞌsan ninkꞌij cycyakil.

5 ¿Tikuꞌn in chin bisune? ¿Ex tikuꞌn in tzaj baj ncꞌuꞌje? Oꞌcx tiꞌj Dios ma keꞌ ncꞌuꞌje, ex cucx cjawil nnimsaꞌne tbi, porque a Ndiose ex a clol weye.

6 Mer ic tzaꞌn mintiꞌtl wipune. Cyjaꞌtzun nim in chin ximane tiꞌja max ttzi nima Jordán ex max twi witz Hermón ex twi witz Mizar.

7 Cyuj ke tkan xak maꞌ cyxeꞌ in binjtz tkꞌajkꞌajel aꞌ nneꞌx tilj twi xak in julun wen; aju nintz aꞌ in tzaj tkꞌoꞌna, ma chin cyaje tjakꞌ ex ma tzꞌex wibaje.

8 In tzaj tkꞌoꞌn Kman t-xtalbil weye kꞌijl, ex konicꞌan in tzaj tkꞌoꞌn jun bitz tuꞌn nbitzane, ex in chin cubsane twitz Dios aju kꞌol nchwinklale.

9 In xi nmaꞌne te Dios aju clol weye: ¿Tikuꞌn ma chin ele tiꞌj tcꞌuꞌja? ¿Tikuꞌn in chin bisune ex in chin yajlanjtze cyuꞌn ke aj kꞌoj wiꞌje?

10 Cyucꞌix ke nbakile in che chyoꞌn tuꞌn cyxmaybil ke aj kꞌoj wiꞌje, ex cucx in cymaꞌn weye: ¿Jatum taꞌ Tdiosa?

11 ¿Tikuꞌn in chin bisune? ¿Tikuꞌn in tzaj baj ncꞌuꞌje? Oꞌcx tiꞌj Dios ma keꞌ ncꞌuꞌje, ex cucx cjawil nnimsaꞌne tbi, porque a Ndiose ex a clol weye.