2 Cꞌoquel cwentin tuꞌn Kman, cxel tkꞌoꞌn tchwinklal ex ctzalajel twitz txꞌotxꞌ, ex mlay txi kꞌoꞌn tuꞌn Kman tuj cykꞌab ke aj kꞌoj tiꞌj.

3 Cxel tkꞌoꞌn Kman tipun oc ttzaj yabil tiꞌj ex cbanixel tyabil tuꞌn.

4 O txi nmaꞌne cyjaꞌ: Nman, kꞌakꞌantz tcꞌuꞌja wiꞌje; chin tkꞌanan oca, masque o chin binchane il twitza.

5 Ke aj kꞌoj wiꞌje in cymaꞌn mya baꞌn wiꞌje, ex in che kanin tiꞌj: ¿Jtoj ban tcyim ex tuꞌn miꞌn ttzaj naꞌntl tbi? Che chi.

6 Ka ma che ul queꞌyil weye, puro baꞌn cyyol in cymaꞌn weye, pero mya ax toc cyuꞌn; in xi cycꞌuꞌn tuj cyanmi tcyakilju mya baꞌn in cyil wiꞌje, ex octzun cyex tiꞌjxi in baj cymaꞌn cye cycyakil xjal.

7 Akeju in che el icꞌunte weye in baj cychmon cyib ex in che oc ten yolil wiꞌje; tuj cyximbetz ka tuꞌn wexwe nlaj in chin yajlanjtze,

8 ex in cymaꞌn: Aju tyabil toc puro plojxix ex mintiꞌ kꞌanbil tiꞌj; ma cub tzꞌak tuj tcoẍbil ex mlay jaw weꞌtl.

9 Ajunlpe aju mejor wamiwoye, aju otok tzꞌoc keꞌ ncꞌuꞌje tiꞌj ex o waꞌn junx wucꞌile, ma tzꞌoc aj kꞌoj wiꞌje.

10 Atzun teya Nman, kꞌakꞌantz tcꞌuꞌja wiꞌje; chin tonintza tuꞌn nbanixe, tuꞌntzun t-xi nkꞌoꞌne jun chojbil cye tiꞌj ju in cybinchaꞌn wiꞌje.

11 Atzun cꞌelel nnicꞌe tiꞌj ka in tzalaja wiꞌje; oc miꞌn cycamban ke aj kꞌoj wiꞌje.

12 Atzun weye, cwentin kine tuꞌna tuꞌnju mintiꞌ npaltile, ex tuꞌna chin tele twitza te jumajx.

13 Nimanxwit tbi Kman aju Cydios aj Israel jaꞌlo ex te jumajx. Icxwitju.