2 In jatz kꞌiꞌne tuꞌn tuj jun jul xobajilxix ex in clete tuꞌn, in colpete tuꞌn tuꞌn miꞌn nxiꞌye tuj soban. Cub tkꞌoꞌn nkane twi pic ex e tcyuwsa tuꞌn nbete.

3 Tzaj t-xnakꞌtzaꞌn jun acꞌaj bitz weye, jun bitz te akꞌbil chjonte te Kman Dios. Tej cyqueꞌyinte nimcu xjal, tzaj tchi cyiꞌj ex oc keꞌ cycꞌuꞌj tiꞌj Kman.

4 At nim tzalajbil teju xjal in keꞌ tcꞌuꞌj tiꞌj Kman ex mintiꞌ in jaw tucꞌin tib cyucꞌil keju jawni cywitz, ex mi cyucꞌil keju in che cꞌulun te jun dios mya ax toc.

5 Nman Dios, nimcu tbinchbena tbanilxix ma bant, aju t-ximbetza kiꞌje puro baꞌn, mi aꞌl juntl jacu pon ic tzaꞌn teya. Jacu wajbeye tuꞌn t-xi nchicꞌbaꞌne tcyakil jlu ex tuꞌn nyoline cyiꞌj, pero nok chꞌin jacu chicꞌbet wuꞌne, porque nim jlu.

6 Mintiꞌ in tzalaja cyiꞌj ke alumaj in cheꞌx kꞌoꞌn te chojbil, ex mi cyiꞌj ke oyaj tiꞌj twitz awal; mintiꞌ ma tkaniya tuꞌn cycub patit ke alumaj tibaj altar ex mi jun oyaj tuꞌn tchjet il. Atzun weye ma jaket nẍcyine tuꞌna tuꞌn nbinteye tyola.

7 Cyjaꞌtzun ma txi nmaꞌne teya: Lu kine lu ic tzaꞌn in tmaꞌn wiꞌje tuj tuꞌjil.

8 Nman Dios, in chin tzalaje tuꞌn tbant tajbila; aju t-xnakꞌtzbila cꞌuꞌn wuꞌne tuj wanmiye.

9 Ma txi nchicꞌbaꞌne cye xjal cybuyin cyib nim cyajlal ka aya tzꞌaklxix. Tzkiꞌn tuꞌna Nman, mintiꞌ ma chin kꞌajene tuꞌn nyoline.

10 Mintiꞌ ma chin kꞌajene tuꞌn t-xi nmaꞌne ka aya tzꞌaklxix, cucx in chin yoline tiꞌj ka in japun tyola tuꞌna ex tiꞌj ju colbil tuꞌna; mintiꞌ ma cub wewane tcꞌujlalila ex ju tyola axix toc cywitz nimcu xjal etzan tuꞌna.

11 Atzun teya Nman, miꞌn cub t-xcꞌayina tkꞌakꞌbil tcꞌuꞌja. Cucxwit chin clete tuꞌna tuꞌnju tcꞌujlalila ex tuꞌnju tyola axix toc.

12 Nim ma tzicꞌx wuꞌne ex mlayx canun tuꞌn tbaj nmaꞌne tcyakil. Axju nbinchbene mya baꞌn ma cub tzꞌak wibaje; ex biꞌx ma che naj tbakꞌ nwitze. Mas nim tajlal nbinchbene mya baꞌn ic tzaꞌn ttzmal nwiꞌye, ex biꞌx ma tzaj baj ncꞌuꞌje.

13 Nman, binchama xtalbil, chin tcloma. Nman, tzaj naja onil weye.

14 Biꞌxwit naj cynabl tuꞌn tel cychꞌixwi keju in che ximan tiꞌj tuꞌn nnaje cyuꞌn. Biꞌxwit che el ok, tuꞌn tel cychꞌixwi keju cyaj tuꞌn ttzaj mya baꞌn wiꞌje.

15 Biꞌxwit che el ok tuꞌn tel cychꞌixwi keju in che xmayin wiꞌje.

16 Atzun keju in che jyon tiꞌja che tzalajxwit nim wen; keju in che tzalaj tiꞌj colbil tuꞌna cucxwit txi cymaꞌn: Nimanxwit tbi Kman.

17 Ic tzaꞌn weye puro meba kine ex in chin bisune, miꞌn tzicꞌ nnaꞌle tuꞌna Nman. Aya onil weye ex clol weye, miꞌn cub tyoꞌna nim, Nman Dios.