2 Ex oc nkꞌon wibe te men, misicyer jun yol xi nmaꞌne. Ex mintiꞌlpe in yoline tiꞌj ju baꞌn. Atzunju cꞌixcꞌoj wiꞌje nok cyjaꞌ t-xiꞌ tuj tilil;

3 o julin wanmiye ttzi nxuꞌque. Tuꞌnju nximbetze mer ic tzaꞌn kꞌakꞌ jaw cꞌant wujxiye, jawtzun tkꞌajkꞌajel nwiꞌye cyuwxix ex xi nmaꞌne cyjaꞌ:

4 Nman, yecꞌuntza weye jtoj baj nchwinklale ex jteꞌ kꞌij chin ankꞌile, tuꞌntzun tel nnicꞌe tiꞌj, mya nim tuj nkꞌije.

5 Ma tzaj tkꞌoꞌna nchwinklale nok te nicꞌxi kꞌij; mya nim wankꞌible tuj twitza. Aju cyankꞌibl cycyakil xjal ic tten ic tzaꞌn jun xjikꞌbaj cꞌujbaj.

6 Ic tten xjal ic tzaꞌn xlecun in bet. Nok gan in baj t-sicsan tib tuꞌn tchmet tkꞌinumabl, ex mintiꞌ baꞌn tuꞌn alcye cꞌoquel tajwil.

7 Cyjaꞌtzun Nman, ¿alcye tuꞌn nyone tiꞌj? Porque atzun kꞌukl ncꞌuꞌje tiꞌja.

8 Chin tcloma cyuj ke wile; miꞌn takꞌa ambil cye ke xjal mintiꞌ cynabl tuꞌn cyxmayin wiꞌje.

9 Oc nkꞌon wibe te men ex mintiꞌ in kꞌajte, porque tuꞌna ma chin cꞌixbisete.

10 Kꞌiꞌmela aju castiw tcub wibaje tuꞌna; chꞌix nnaje tuꞌnju yajbil tuꞌna.

11 In xi tcawina aju xjal in tbinchaꞌn mya baꞌn oc tcub tkꞌoꞌna tcastiw, ex in naj tuꞌna aju mas in tzalaj tiꞌj, mer ic tzaꞌn tuꞌn pocꞌ otok baj waꞌn.

12 Nman, bintza aju nnaꞌj Diose, kꞌontz twiꞌya tiꞌj ncubsbile, ttzaja onil weye oc njaw okꞌe. Tuj twitza nok jun betin xjal kine, ex nok in chin betjeꞌye ic tzaꞌnx ke nxeꞌchele.

13 Kꞌiꞌmela twitza wiꞌje, chin tkꞌoncja tuꞌn ntzalaj chꞌine naꞌnxtok ncyime.