2 Porque wiꞌje ma che oc tzꞌupj ke tplecha; ex ma cub tkꞌoꞌna ncastiwoye.

3 Tuꞌn cylaj ke wile ma tzaj tkꞌoja wiꞌje, cyjaꞌtzun tcyakil nximlale ma yabt; misicyer jun nbakile baꞌn taꞌ.

4 Cyuꞌn keju mya baꞌn o nbinchaye, in nnaꞌne mer ic tzaꞌn ma chin cyaj mulkꞌaje tjakꞌ jun aꞌ; ex mer ic tzaꞌn jun iktz ke jlu mlay cꞌisj wuꞌne.

5 Tuꞌn tlaj miban txi nbiꞌne, ke ẍil ateꞌc wiꞌje niban cykꞌay ex tzuꞌwtl ke.

6 Enter kꞌij in chin bete tuj bis, nok mocꞌl kine ex mintiꞌtl wipune.

7 In julin ttzal wiꞌje tuꞌn cyak; tcyakil nximlale yab taꞌ.

8 Nim ma chin baj cꞌixbisaꞌne ex jumajx mintiꞌ wipune; in chin ayayane tuꞌnju nimxix bis at tuj wanmiye.

9 Nman, ojtzkiꞌn tuꞌna tcyakilju in pon ncꞌuꞌje tiꞌj, mya tuj ewaj in xjikꞌban ncꞌuꞌje twitza.

10 In putin wanmiye, niban tbaj wipune, ex niban woque moẍ.

11 Ke mejor wamiwoye ex cyucꞌixpe ke xjal at nxilene cyucꞌil, najchak ma che tzaj weꞌ wiꞌje tuꞌn tlaj nyabile.

12 Keju cyaj tuꞌn ncub cybyoꞌn, in cub cykꞌoꞌn cꞌobil wiꞌje; keju cyaj tuꞌn cybinchante mya baꞌn wiꞌje, in che yolin tuꞌn nnaje cyuꞌn ex cucx in baj cyximan tuꞌn cysbun.

13 Atzun weye nnoꞌc nkꞌon wibe te chcyin, mer ic tzaꞌn mintiꞌ otok nbiye; ex nnoꞌc nkꞌon wibe ic tzaꞌn men kine, ex mintiꞌ in chin kꞌajte.

14 Ic in tene ic tzaꞌnju xjal mintiꞌ in tbiꞌn ex mlay bant tuꞌn t-xi tmaꞌn jun yol te tcolbil tib.

15 Chin ayole tiꞌja Nman Dios, ex chin tzajel ttzakꞌweꞌna.

16 Oꞌcx in xi nkanine tuꞌn miꞌn cytzeꞌn xjal wiꞌje, ex tuꞌn miꞌn cytzalaj oc ttzaj mya baꞌn wiꞌje.

17 Ax toc, chꞌix nnaje; cucx tten cꞌixcꞌoj wiꞌje.

18 Che jawitz nmaꞌne ke wile, ma tzaj nbise tuꞌn tlaj ju mya baꞌn o nbinchaye.

19 Ke aj kꞌoj wiꞌje ma chmet-xix cybaj; nim cybaj keju nok elajx in chin el icꞌune cyuꞌn.

20 Tzaj cykꞌoꞌn mya baꞌn weye te t-xel ju baꞌn o nbinchaye cye; in che kꞌojin wiꞌje tuꞌn tlaj in nbinchaꞌne aju baꞌn.

21 Nman, miꞌn chin cyaj tkꞌoꞌna njunale. Nman Dios, miꞌn tzꞌel lakꞌeꞌya wiꞌje.

22 Nman Dios ex clol weye, tzaj naja onil weye.