2 porque jurat naj che najel ic tzaꞌn chꞌim in tzkij, ex che bel motxꞌj ic tzaꞌn cꞌul.

3 Keꞌc tcꞌuꞌja tiꞌj Kman ex binchama ju baꞌn, tzꞌankꞌina twitz txꞌotxꞌ ex cucx nimanxa tyol.

4 Tzalajxa tiꞌj Kman, ex tzul tkꞌoꞌn teya aju in pon tcꞌuꞌja tiꞌj.

5 Okxenanx tiba tuj tkꞌab Kman, keꞌc tcꞌuꞌja tiꞌj ex tzul onil teya.

6 Cbel tyecꞌun Dios cywitz xjal aju tbinchbena baꞌn ex ju ttena tzꞌaklxix, ic tzaꞌn tkan kꞌij oc nnoꞌc chilcukꞌij.

7 Txulecuya twitz Kman ex nok ayona tiꞌj oc tul onil teya. Miꞌn tzaj txꞌaꞌl tcꞌuꞌja tiꞌj ju xjal jurat in jaw tiꞌn naj tipun, ex mi tiꞌj ju xjal in cub t-ximan tuꞌn tbinchante mya baꞌn.

8 Colinxa kꞌoj ex colinxa tuꞌn ttzaj tloꞌch tcꞌuꞌja; miꞌn jaw kꞌojla, porque tuꞌntzun jlu in xiꞌ jun yol tuj tilil.

9 Ax toc che elex lajoꞌn ke xjal mya baꞌn, atzun keju kꞌukl cycꞌuꞌj tiꞌj Kman che oquel etzal teju txꞌotxꞌ.

10 Nok chꞌintl taj tuꞌn cycub naj keju mya baꞌn, masque ma tzꞌoc tena jyolte cye pero mlay che cnet tuꞌna.

11 Atzun ke xjal mans che oquel etzal teju txꞌotxꞌ, ex puro tuj txubtxaj che tel.

12 Aju xjal mya baꞌn in cub ten ximal tiꞌj tzaꞌn tten tuꞌn tnaj ju xjal baꞌn, ex in xi tqueꞌyin tiꞌj in kꞌojl wen.

13 Atzunte Kman nok in jaw tzeꞌn tiꞌj ju xjal mya baꞌn, porque baꞌn tuꞌn ka chꞌix tpon or tuꞌn tnaj.

14 Ke binchal mya baꞌn in jatz cyiꞌn cyspad tuj tjayil, ex nneꞌl cyxkinin takꞌal xobl cyplech, tuꞌn cycub ke xjal meba cyuꞌn ex ke mans ex keju in che bet tuj tumel.

15 Pero tuꞌnx cyspad cbajel xyuꞌn cyanmi, ex che bajel tokj ke xobl cyplech.

16 Aju chꞌin at teju xjal baꞌn, mas nim t-xilen twitz cykꞌinumabl ke xjal mya baꞌn.

17 Porque cꞌelel tiꞌn Kman cyipumal ke xjal mya baꞌn, atzun ke xjal baꞌn che bel ttzyuꞌn tuꞌn mi cycub tzꞌak.

18 Keju mintiꞌ cypaltil, cwentin ke tuꞌn Kman, ex aju cyetzbil cucx ctel te jumajx.

19 Tuj tkꞌijlalil mya baꞌn oc ttzaj weꞌyaj, mlay cub cychꞌixwi tuꞌnju at nim cywa.

20 Atzun ke xjal mya baꞌn, che bajel tzꞌeꞌy ic tzaꞌn tzkij chꞌim, ex ke aj kꞌoj tiꞌj Kman che bel naj ic tzaꞌn sib.

21 Aju xjal mya baꞌn in tkanin tchꞌex ex mintiꞌtl nnaꞌj tchjoꞌn, atzunte xjal baꞌn in tzꞌeꞌy tcꞌuꞌj tiꞌj juntl ex in xi tkꞌoꞌn cotzbaj.

22 Keju cyꞌiwlaꞌn tuꞌn Kman oc cycꞌmaꞌ txꞌotxꞌ te cyetzbil, atzun keju tcub cysentens tuꞌn, che najel.

23 In xi tyecꞌun Kman alcye be tuꞌn t-xi tiꞌn xjal, ex in cub tkꞌoꞌn tuj be baꞌn nneꞌl tuj twitz;

24 masque ma tzicꞌ tzꞌak, pero in jaw twaban tib, porque tzyuꞌn tkꞌab tuꞌn Kman.

25 Cuꞌxun kine nej, atzun jaꞌlo ma chin tijine; pero bajx wile jun xinak baꞌn otok cyaj colin, ex bajx wile in che moꞌn ke tcꞌwaꞌl.

26 Tcyakil kꞌij in kꞌakꞌan tcꞌuꞌj cyiꞌj xjal ex in xi tkꞌoꞌn pwak te cychꞌex; ke tcꞌwaꞌl in che cub cyꞌiwlaꞌn tuꞌn Kman.

27 Paꞌmil tiba tiꞌj ju mya baꞌn ex binchama ju baꞌn, ex cucxtzun ctel tnajbila.

28 In tzalaj Kman kiꞌj ka in kbinchaꞌn ju tzꞌaklxix, ex mintiꞌ in che cyaj tcolin keju waꞌlxix tuj cyocslabl, atzun keju mya baꞌn, in che naj tuꞌn ex mintiꞌ in cyaj tkꞌoꞌn cyiyjil.

29 Ke xjal baꞌn oc che etzal tiꞌj ju txꞌotxꞌ, ex ax che tel tuj te jumajx.

30 Aju xjal baꞌn at tnabl tyol ex in yolin tuj tumel,

31 tcuꞌx tley Dios tuj tanmi, ex mlayx jaw jilj tkan.

32 Aju xjal mya baꞌn in xkꞌukin tiꞌj ju xjal baꞌn, ex in ximan tiꞌj tuꞌn tcub tbyoꞌn;

33 pero mlay txi tkꞌoꞌn Kman ambil te tuꞌn tcub tzꞌak xjal baꞌn tuj tkꞌab, ex oc toc xjal baꞌn tuj xjel, mlay takꞌ Dios ambil tuꞌn tcub t-sentens.

34 Keꞌc tcꞌuꞌja tiꞌj Kman ex nimanxa, tuꞌntzun jlu cjawil nimsaꞌna tuꞌn ex ctzajel tkꞌoꞌn aju txꞌotxꞌ te tetzbila, ex oc tilaꞌya oc cynaj ke xjal mya baꞌn.

35 O wile ju xjal mya baꞌn ex puro jawni, ic tten ic tzaꞌn jun tzeꞌ cyjaꞌ tchꞌiy wen ex puro pim t-xak;

36 pero tej wicꞌe juntl maj ya mi aꞌl, in jyone tiꞌj pero mintiꞌ cnet wuꞌne.

37 Kꞌoꞌnca cwent tiꞌj ju xjal tzꞌaklxix ex mintiꞌ tpaltil; tuj tkꞌijlalil tzul ctel xjal lu tuj txubtxaj.

38 Atzun keju miban che niman, che najel te jumajx; tuj tkꞌijlalil tzul che najel ke mya baꞌn.

39 In che clet ke xjal tzꞌaklxix tuꞌn Kman, a in colin cyiꞌj tuj tkꞌijlalil yajbil.

40 A Kman onil cye ex in che colpet tuꞌn. In che clet tuꞌn tuj cykꞌab keju mya baꞌn, tuꞌnju atzun kꞌukl cycꞌuꞌj tiꞌj tuꞌn cyclet.