Aju mya baꞌn in tbinchaꞌn xjal, ex aju t-xtalbil Dios
Bitz tuꞌn David aju tmajen Kman
36
Aju mya baꞌn in yolin te xjal mya baꞌn max tuj tanmi. Mintiꞌx in ximan xjal tiꞌj ka at tuꞌn t-xob twitz Dios.2 Nnoꞌc tkꞌon tib te maꞌ toclen, ex in baj tyolin tib, tuj twitz ka mlay tzꞌel nicꞌbaj tiꞌj tbinchben mya baꞌn.
3 Jumajx mya baꞌn yolin ex nicꞌal yol, tzpetni tnabl ex ma cyaj tcolin tuꞌn tbinchante baꞌn.
4 Oc in cub coẍeꞌ twi twatbil, in baj t-ximan tuꞌn tbinchante mya baꞌn; ax in cyaj ten tuj mya baꞌn ex miꞌn taj tuꞌn tcyaj tkꞌoꞌn ju mya baꞌn.
5 Atzunju tcꞌujlalila Nman, max japun pon twitz cyaꞌj; ex aju tyola axix toc in japun canun twitz cyaꞌj.
6 Aju ttena tzꞌaklxix ic tten ic tzaꞌn ke nmak witz; ex ke tleya ic cyten ic tzaꞌn mar ma tij ex maꞌ t-xeꞌ. Nman, aya cwentil cye ke xjal ex ke jil.
7 Tbanilxix tcꞌujlalila Nman Dios. Cyjaꞌtzun nnoꞌcx cyclon cyib ke xjal tjakꞌ t-xicꞌa.
8 In nojxix cycꞌuꞌj wen tuꞌnju nim wabj at tuj tjaya; tuꞌna in xi tkꞌoꞌna cycꞌa tiꞌj jun nima tbanilxix wen,
9 porque tucꞌila taꞌ aju twi aꞌ in tkꞌoꞌn chwinklal, ex tuꞌnju t-spicꞌumala in kile aju spicꞌun.
10 Cucx kꞌontz tcꞌujlalila cye keju ojtzkiꞌna cyuꞌn, ex che tcloma xjal baꞌn cymod.
11 Miꞌn takꞌa ambil tuꞌn nbaj wabane cyuꞌn ke xjal in jaw cyniman cyib, ex tuꞌn miꞌn wex lajoꞌne cyuꞌn ke xjal mya baꞌn.
12 Cyqueꞌyinxe tzaꞌn tten ma che cub tzꞌak ke xjal binchal mya baꞌn. Ma che cub tzꞌak ex mlay che jaw weꞌ juntl maj.