2 Tzyuma aju tmakbila in ajben tuj kꞌoj ex ttzaja onil weye;

3 tzyuma tlansa ex weꞌcuya cywitz keju lepchoꞌc wiꞌje tuꞌn ncube cyuꞌn; kꞌmantza ka aya clol weye.

4 E cyel ok tuꞌn cychꞌixwi keju cyaj tuꞌn ncub byoꞌne cyuꞌn, ex cyucꞌix keju cyaj tuꞌn cybinchante jun mya baꞌn wiꞌje.

5 Icwit che oc ic tzaꞌn ttxa triw in xi tikan cykꞌikꞌ, oc cyex lajoꞌn tuꞌn t-anjel Kman.

6 Tzꞌocwit cybe te klolj ex sjilin tuj, oc cyex lajoꞌn tuꞌn t-anjel Kman.

7 Mintiꞌ jun mya baꞌn o nbinchaye cyiꞌj, pero cub cykꞌoꞌn jun cꞌobil wiꞌje ex cuꞌx cylacuꞌn jun jul tuꞌntzun nxi tzꞌake tuj.

8 Nokwit minaben tzaj jun mya baꞌn cyiꞌj. Axwit ke cheꞌx tzꞌak tuj cꞌobil in cub cykꞌoꞌn. Ex baꞌnwt cycub tzꞌak tuj jun mya baꞌn.

9 Oc chin tzalajele tiꞌj Kman porque tuꞌn oc chin cletele.

10 Tuꞌn tcyakil wanmiye cxel nmaꞌne: ¿Alcye juntl ic tzaꞌn teya Nman? In che tcloꞌna ke meba ex keju mintiꞌ cyipun cywitz ke xjal mas nim cyipun cywitz, ex cywitz keju nneꞌl cyelkꞌaꞌn aju at cye.

11 In che jaw weꞌ ke xjal mya baꞌn te testiw wiꞌje, ex in chin oque tuj xjel cyuꞌn tiꞌj ju mintiꞌ baꞌn wuꞌne.

12 Tzaj cykꞌoꞌn mya baꞌn weye te t-xel ju baꞌn o nbinchaye cye, ex tuꞌn tlaj jlu in tzaj nim nbise.

13 Tej cyyabt ke tzaj nbise cyiꞌj, oc nkꞌoꞌne nxbalune chꞌiꞌx twitz ex cub nyoꞌne weꞌyaj, ex mintiꞌ xi ncoline tuꞌn nnaꞌne Dios cyiꞌj tuj wanmiye.

14 O chin bisune nim cyiꞌj, mer ic tzaꞌn tiꞌj ntxuꞌye, mer ic tzaꞌn tiꞌj jun wamiwoye ex mer ic tzaꞌn tiꞌj jun wermaniye.

15 Tejtzun ttzaj mya baꞌn wiꞌje cycyakil e jaw tzeꞌn; mer ic tzaꞌn junxitl xjal ke ex mintiꞌ ojtzkiꞌn ke wuꞌne, mintiꞌ xi cycolin tuꞌn cyyasun wiꞌje.

16 In baj yajlaꞌne cyuꞌn ex e oc ten xmayil wiꞌje, tuꞌn cykꞌoj jaw kitxꞌitxꞌin t-xe cyeꞌ wiꞌje.

17 Nman, ¿cucxpetzun cxeꞌl tuꞌna, nok in tzaj tqueꞌyina jlu wiꞌje? Chin tcloma cywitz keju in che tzanun wiꞌje mer ic tzaꞌn balun.

18 Jacu txi nkꞌoꞌne chjonte teya cywitz nimcu xjal cychmon cyib; jacu jaw nnimsaꞌne cywitz tnam xjal nimxix cyajlal.

19 Miwt che jaw tzalaj ke aj kꞌoj wiꞌje; miꞌn takꞌa ambil tuꞌn cyxmayin wiꞌje akeju in chin el icꞌune cyuꞌn ex mintiꞌ jun mya baꞌn o nbinchaye.

20 Akeju xjal lu mintiꞌ in che yolin tiꞌj tuꞌn cyten xjal tuj txubtxaj, nok oꞌcx in che siꞌmin yol cyiꞌj ke xjal baꞌn cymod, akeju najl cyxol;

21 in che jaw tzeꞌn wiꞌje ex in cymaꞌn: Ma kil tuꞌn kwitz aju ma tzaj tiꞌj.

22 Nman, ma tila aju in cybinchaꞌn ke xjal lu. Miꞌn cyaj tena tuꞌn mi tkꞌajta. Miꞌn tzꞌel lakꞌeꞌya wiꞌje.

23 Weꞌctza Nman Dios, kꞌiꞌmel twatla. Binchantza wiꞌje ex colina wiꞌje.

24 Nman Dios, binchantza wiꞌje porque aya tzꞌaklxix. Miꞌn takꞌa ambil tuꞌn cytzeꞌn ke aj kꞌoj wiꞌje.

25 Miꞌn takꞌa ambil tuꞌn cymante ex tuꞌn tcub cyximan cyjaꞌ: Atzun jlu kaj, biꞌx ma naj kuꞌn.

26 E ttzaj cychꞌixwi ex e ttzpet cynabl keju in che tzalaj tiꞌj ju mya baꞌn ma tzaj wiꞌje; e ttzaj nimxix cychꞌixwi ex e tnaj cynabl keju nnoꞌc cykꞌon cyib mas maꞌ cyxilen nwitze.

27 E cyjaw tzalaj ex e cyjaw schꞌin tuꞌn tzalajbil keju cyaj tuꞌn cyqueꞌyinte weye otok chin cambane; ex cocꞌx tuꞌn cymante cyjaꞌ: Maꞌxix toclen Kman ex in tzalaj tuꞌnju baꞌn taꞌ tmajen.

28 Oc chin yolile tiꞌj ju in bant tuꞌna tuj tumelxix, ex tcyakil kꞌij cjawil nnimsaꞌne.