2 Nim in chin tzalaje tiꞌj Kman; cybintze ex che tzalaje akeye xjal mans.

3 Cynimsaꞌn jawe Kman junx wucꞌile ex knimsaꞌn jaw tbi.

4 In cubsane twitz Kman ex in tzaj tzakꞌweꞌne tuꞌn; in clete tuꞌn te tcyakilju in chin xobtoke te.

5 Keju toc cywitz tiꞌj Kman in tzalajxix cywitz ex mlay cub cychꞌixwi.

6 In jaw schꞌine tej atine tuj bis, ex in tzaj biꞌne tuꞌn Kman, in clete tuꞌn tuj tcyakilju yajbil weye.

7 Aju t-anjel Kman in xkꞌukin cye keju in che niman te Kman, ex in che clet tuꞌn.

8 Che nicꞌbenchake tiꞌj, tzꞌelx cynicꞌe tiꞌj, ate Kman puro baꞌn. At tzalajbil teju xjal nnoꞌc keꞌ tcꞌuꞌj tiꞌj Kman.

9 Che nimane te Kman akeye paꞌmaj keye tuꞌn cyajbene te, porque tzul tkꞌoꞌn tcyakilju at tajben cye keju in che niman te.

10 Ke tal balun mintiꞌ cychiꞌ ex nnicꞌx weꞌyaj cyuꞌn, atzun keju in che cubsan twitz Kman, ctzajel kꞌoꞌn tcyakilju baꞌn cye.

11 Cytzaje ncꞌwaꞌl ex chin cybintze: Che xel nxnakꞌtzaꞌne tuꞌn cynimane te Kman.

12 ¿Cyajpeye tuꞌn cyankꞌine nim kꞌij? ¿Cyajpeye tuꞌn cytzalaje tiꞌj cychwinklale?

13 Cyjacꞌum cytziꞌye tuꞌn miꞌn cyyoline yol mya baꞌn, ex miꞌn che nicꞌane yol.

14 Cypaꞌmil cyibe tiꞌj mya baꞌn ex cybinchame baꞌn; tzꞌoc tililx cyuꞌne tuꞌn cucx tuꞌn cytene baꞌn cyucꞌil xjal.

15 Cwentin ke xjal tzꞌaklxix tuꞌn Kman ex in tzaj tbiꞌn cynaꞌj Dios.

16 Atzun ke binchal mya baꞌn at tkꞌoj Kman cyiꞌj, banin tiꞌj tuꞌn cynaj twitz txꞌotxꞌ ex tuꞌn miꞌn ttzaj naꞌntl cybi.

17 In che cubsan ke xjal tzꞌaklxix twitz Kman, ex in che tzaj tbiꞌn, in che clet tuꞌn tuj tcyakil yajbil cye.

18 Nikayin taꞌ Kman tuꞌn cyclet ke xjal ma tzꞌoc taꞌw bis tiꞌj cycꞌuꞌj ex mintiꞌtl jatum tuꞌn toc keꞌ cycꞌuꞌj.

19 Aju xjal tzꞌaklxix nim yajbil nnicꞌx tuꞌn, pero in colpet tuꞌn Kman tuj tcyakilju in tzaj tiꞌj.

20 Cwentin ke tbakil tuꞌn Kman; ex mi jun cbel tokj.

21 Ke binchal mya baꞌn, tuꞌnxju mya baꞌn che najel; cbel cycastiw keju in che icꞌun cyiꞌj ke xjal tzꞌaklxix.

22 A Kman ccolpil cye keju in che ajben te, mlay cub cycastiw keju kꞌukl cycꞌuꞌj tiꞌj.