2 Cykꞌonxe chjonte te Kman tuꞌn tkꞌajkꞌajel twi chnab arpa, che bitzane tucꞌil tkꞌajkꞌajel quitar.

3 Cybitzanxe jun bitz acꞌaj te Kman, cykꞌajtzaꞌnque ke chnab mejorxix wen ex che schꞌine tuꞌn tzalajbil.

4 Aju tyol Kman axix toc te, ex tuꞌnju tbinchben nneꞌl knicꞌ tiꞌj ka in japunxix tyol.

5 In tzalaj Kman kiꞌj ka in kbinchaꞌn aju tzꞌaklxix ex ka in ko bet tuj tumelxix; tcyakil twitz txꞌotxꞌ nojni tuꞌn tcꞌujlalil.

6 Tuꞌn tyol Kman ex tuꞌn T-xew bant cyaꞌj tucꞌix tcyakilju at twitz.

7 Tuꞌn Kman tchmon tib aꞌ tuj mar, ex junx in cub tcꞌuꞌn aju nintz mar tuj jun tcubil.

8 Akeye xjal tuj tcyakil twitz txꞌotxꞌ, che xobe twitz Kman ex che nimane te.

9 Porque tej tyolin Kman biꞌx bant tcyakil, ex tej t-xi tmaꞌn tyol ax cyaj ten tcyakil.

10 In baj ttzacun Kman aju in cub cyximan ke mastl nasyon tuꞌn tbinchet cyuꞌn,

11 atzunju ximamaj tuꞌn Kman in cyaj ten te jumajx.

12 At tzalajbil teju nasyon a Kman ma tzꞌoc te Cydios, aju ma jaw t-scꞌoꞌn Dios tuꞌn toc te tecuxix.

13 Max tuj cyaꞌj in che tzaj tqueꞌyin Kman cycyakil xjal;

14 max tuj tnajbil in che tzaj tqueꞌyin ke xjal najl twitz txꞌotxꞌ;

15 a Kman o binchante cyanmi ex toc tcwent tiꞌj tcyakilju in cybinchaꞌn.

16 Mi jun rey jacu clet nok tuꞌnju at nim t-soldad, ex masque at nim cyipun xjal, pero mya tuꞌnju at cyipun jacu che clet.

17 Tuj kꞌoj nokx gan nnoꞌc keꞌ cycꞌuꞌj xjal cyiꞌj chej; masque at nim cyipun pero mlay che clet xjal cyuꞌn.

18 Atzun keju in che niman te Kman ex in keꞌ cycꞌuꞌj tiꞌj tcꞌujlalil, cucx cwentin ke tuꞌn.

19 In che clet tuꞌn te camic, ex mintiꞌ in che cyim tuj tkꞌijlalil weꞌyaj.

20 Akoꞌ kꞌukl kcꞌuꞌj tiꞌj Kman, a onil ke ex tiꞌj nnoꞌc kclon kib.

21 In tzalaj kanmi tiꞌj Kman ex kꞌuklxix kcꞌuꞌj tiꞌj tuꞌnju xjan tbi.

22 Awt tcꞌujlalila ten kucꞌile Kman, porque atzun kꞌukl kcꞌuꞌje tiꞌja.