2 At tzalajbil te xjal aju mlay tzaj naꞌntl til tuꞌn Kman ex mintiꞌtl sbubl tuj tanmi.

3 Tej naꞌnxtok tjatz npaꞌne wile, o nnaꞌye ka cyjaꞌtok tnaj nximlale tuꞌnju in chin ayayane nneꞌx kꞌij.

4 Porque kꞌijl ex konicꞌan in cꞌixbisanjtze tuꞌna. Cyjaꞌtzun biꞌx baj wipune ex ic in oque ic tzaꞌn ke bech in che cub motxꞌj tuꞌn tcyakal kꞌij tuj coresma.

5 Pero jatz npaꞌne wile twitza ex aju nbinchbene mya baꞌn; mintiꞌ cub wewane ex o nmaye cyjaꞌ: Cjawitz npaꞌne wile twitz Kman; cyjaꞌtzun cub tnajsaꞌna wile.

6 Tuꞌntzun jlu, keju nimal teya oc che cubsal twitza tuj tkꞌijlalil yajbil cye, ex masque xobajilxix tqueꞌyinc aju nima oc tjaw chꞌiy, pero mlay canun cyiꞌj.

7 Aya colbil weye; in chin clete tuꞌna tuj xobajil, chin bitzale tuꞌnju at colbil weye tuꞌna ex txolin wiꞌje tuꞌna.

8 Chi Kman in tmaꞌn cyjaꞌ: Cꞌoquel ncwentina, cxel nkꞌoꞌne xnakꞌtzbil teya, cxel nkꞌoꞌne consej baꞌn teya, cxel nyecꞌune teya alcye be tuꞌn t-xi tiꞌna.

9 Miꞌn tzꞌoca ic tzaꞌn ke chej ex ka ic tzaꞌn ke mul mintiꞌ cynabl ex il tiꞌj tuꞌn toc jun pren tiꞌj cytziꞌ tucꞌix takꞌal tuꞌn cynimanjtz xjal cyuꞌn, porque ka mi xbant jlu, mlay che oc lakꞌeꞌ tiꞌja.

10 Nim cꞌixcꞌoj tzul cyiꞌj ke xjal mya baꞌn, atzun keju nnoꞌc keꞌ cycꞌuꞌj tiꞌj Kman, txolin cyiꞌj tuꞌn tcꞌujlalil.

11 Akeye tzꞌaklxix ex baꞌn taꞌ cyanmiye, che tzalajxe tiꞌj Kman; che tenxe alegr ex tjaw tkꞌajkꞌajel cywiꞌye cyuw tuꞌn tzalajbil.