2 Chin tbintza, juratx chin tclom naja. Tzꞌocxwita te weye ic tzaꞌn jun pic tuꞌntzun nclete tuꞌna, tzꞌocxwita te jun matij ja cyuw tten te colbil wibe ex colol weye.

3 Ic ttena te weye ic tzaꞌn jun pic ex ic tzaꞌn jun matij ja cyuwxix tten.

Chin t-ẍakluma ex chin tcwentin oca tuꞌntzun tjaw nimsaꞌn tbiya.

4 Chin tiꞌn etza tuj cꞌobil ma cub cykꞌoꞌn aj kꞌoj wiꞌje, porque aya colol wiꞌje.

5 Tuj tkꞌaba in xi wokxenane wanmiye; tzaja colol wiꞌje Nman, aya Dios axix toc.

6 In che el wicꞌune ke xjal in che cꞌulun cywitz ke tilbilal mintiꞌ cyajben. Oꞌcx ma tzꞌoc keꞌ ncꞌuꞌje tiꞌja Nman.

7 Chin tzalajele nim tuꞌnju at tcꞌujlalila wiꞌje. Ma tila ke nbise, ojtzkiꞌn tuꞌna aju cꞌixcꞌoj in tzaj wiꞌje;

8 mintiꞌ ma chinx tkꞌoꞌna tuj cykꞌab ke aj kꞌoj wiꞌje; cub tkꞌoꞌna kine tuj jun lugar segurxix.

9 Nman, kꞌakꞌantz tcꞌuꞌja wiꞌje porque atine tuj xobajil. Ke tbakꞌ nwitze tucꞌix nximlale ex tucꞌix wanmiye mintiꞌtl cyipun tuꞌn bis.

10 Niban tbaj nchwinklale tuꞌn cꞌixcꞌoj. Jurat niban cyel wabkꞌiyile; in baj wipune tuꞌn bis, niban tbaj tipun nximlale.

11 Ma chin oque te cyxmaybil ke aj kꞌoj wiꞌje, ax icx cyuꞌn ke nvesine; nok in che el secꞌpaj ke wamiwoye wiꞌje. Akeju in che oc queꞌyinte weye tuj cay, biꞌx in che el ok wiꞌje.

12 Biꞌx ma tzicꞌ nnaꞌnjtze cyuꞌn mer ic tzaꞌn ma chin cyime. Ic ma chin oque ic tzaꞌn jun xar ma baj pax.

13 In nbiꞌne ke xjal in che siꞌmin yol wiꞌje. At xobajil tuj tcyakil part. Cycyakil in baj cyximan mya baꞌn wiꞌje ex in baj cyximan tuꞌn ncyime cyuꞌn.

14 Atzun weye Nman, kꞌukl ncꞌuꞌje tiꞌja, in xi nmaꞌne: Aya Ndiose.

15 Cwentin kine tuꞌna tuj tcyakilju in baj wiꞌje; chin tcloma cywitz ke aj kꞌoj wiꞌje, akeju lepchoꞌc wiꞌje tuꞌn ncube cyuꞌn.

16 Chin tqueꞌyintza tucꞌil t-xtalbila, akine tmajena, ex chin tcloma tuꞌnju tcꞌujlalila.

17 Tiꞌja in jaw tkꞌajkꞌajel nwiꞌye Nman, miꞌn cub tkꞌoꞌna nchꞌixwiye. Kꞌoncuya cychꞌixwi ke xjal binchal mya baꞌn ex kꞌoncuꞌxa ke tuj cynajbil cyimni tuꞌn mi cykꞌajt.

18 Binchama tuꞌn mi cykꞌajtl ke xjal nicꞌal yol in che icꞌun ex jawni ke, ex in che yolin mya baꞌn tiꞌj ju xjal tzꞌaklxix.

19 Maꞌxix t-xtalbila cyucꞌil keju in che niman teya. In xi tcꞌuꞌna ic tzaꞌn jun kꞌinumabl, ex cywitz ke xjal in xi t-sipana cye keju kꞌukl cycꞌuꞌj tiꞌja.

20 Tuꞌnju ateꞌ tucꞌila, che cletel tuj mya baꞌn in baj cyximan xjal; in che ocx tcloꞌna ke tuj tjaya cywitz ke yol mya baꞌn cyuꞌn ke aj kꞌoj cyiꞌj.

21 Nimanxwit Kman tuꞌnju tcꞌujlalil, tbincha nimcu baꞌn weye tej nclete tuꞌn tuj jun tnam toc muro tiꞌj.

22 Tzaj nxobile ex xi nmaꞌne jun yol cyjaꞌ: Ma chin cyaj coline tuꞌn Kman, nchiye, pero tej t-xi nkanine onbil teya, tzaj tbiꞌna tkꞌajkꞌajel nwiꞌye.

23 Cycꞌujlame Kman cycyakile akeye in che niman te. In che oc tcwentin Kman keju in che bet tuj tumelxix, pero keju in jaw cyniman cyib, in cub tkꞌoꞌn cycastiw tuj tumelxix.

24 Tenx cyipune ex cyuwx cycꞌuꞌje cycyakile kꞌukl cycꞌuꞌje tiꞌj Kman.