2 Nman Dios, xi nkanine onbil teya ex o chin banixe tuꞌna;

3 Nman, ma chin clete tuꞌna tuj camic; ma tzul nnable tuꞌna, ma chin clete tuꞌna tuꞌn miꞌn ncyime.

4 Akeye in che niman te Kman, che bitzane bitz te, cynimsan jawe tbi xjan.

5 Porque nok chꞌin tuj in ten tkꞌoj, atzunju t-xtalbil cucx in ten tuj tcyakil kankꞌibl. Ka ma ko okꞌ te konicꞌan, atzun oc kskix ko tzalajel.

6 Tuj nwitze ka segur atine, ex cub nximane cyjaꞌ: Mintiꞌ jun jacu chin cub tzꞌake tuꞌn.

7 Nman, tuꞌnju t-xtalbila ma chin cub twabana tuj jun lugar segurxix, ex te tibajxi ma tzꞌel tewan twitza wiꞌje. Ma naj nnable tuꞌn xobajil.

8 Tiꞌja in jaw tkꞌajkꞌajel nwiꞌye Nman, ex teya in chin cubsane.

9 ¿Ti ctcambaꞌya tiꞌj ka ma chin cyime ex ka ma chinx kꞌiꞌne tuj mukbil? Oc toc nximlale te txꞌotxꞌ mlay jaw nnimsaꞌna, ex mlay chin yoline tiꞌj ju ttena tzꞌaklxix.

10 Nman, chin tbintza ex kꞌakꞌantz tcꞌuꞌja wiꞌje; chin tonintza Nman.

11 Ma tzꞌel tiꞌna bis wiꞌje ex ma tzaj tkꞌoꞌna tzalajbil te t-xel; aju nxbalune toc te techal bis, ma tzꞌel tiꞌna, ex ma tzꞌoc tkꞌoꞌna jun nxbalune te tzalajbil.

12 Cyjaꞌtzun Nman Dios, mlay chin cub tene tuꞌn mi nkꞌajte; che xel nbitzane ke bitz te nimbil teya ex cucx cxel nkꞌoꞌne chjonte teya.